Yohana uyiko pi bino pa Yesu

Yohana ma tie wod Zekaria gikud Elisabeti udoko jabila kinde m’edongo. Yehova utiyo kude pi ninyutho ni dhanu nia Masiya ubebino. Ento kakare niponjo i sinagog kunoke i adhura, Yohana ubed urweyo i langa. Dhanu ubed uai i Yeruzalem man i Yudea ceke pi nibino winjo lembe ma Yohana ubeponjo. Eponjogi nia kara ginyay mutoro i Mungu, gicikiri niweko timo ma reco. I ng’ey winjo lembe ma Yohana uponjo, dhanu ma dupa giyewo dubo migi man emiyo igi batizo i kulo Yordan.

Yohana ubed ukwo m’umbe piny mi kum dupa. Ebed ekendo bongu ma juyiko ku yuk ngamia, ebed ecamu bonyo man ebed enang’u miyo kic. Dhanu ubino mito dit nia ging’ey Yohana. Kadok Jufarisayo ku Jusadukayo ma weg ting’iri de gibin ginene. Yohana uwacu igi kumae: ‘Wucikuru niloko kura mwu man niyewo dubo mwu. Kud wupar nia wun re m’utie dhanu ma segi pilembe wuyero nia wutie nyikway Abraham. Eno nyutho ngo nia wutie awiya pa Mungu.’

Ju ma dupa gibed gibino i bang’ Yohana man gipenje kumae: ‘Ukwayu watim ang’o kara wanyay mutoro i Mungu?’ Yohana uyero ni Juyahudi kumae: ‘Kan itie ku koti ario, mii acel ni ng’atu ma pare mbe.’ Nyo ing’eyo nia pirang’o eyero kumeno? Ebino mito nia julub pare ging’ey nia pi ninyayu mutoro i Mungu, gicikiri nimaru dhanu mange.

Yohana uyero ni weg ajok kumae: ‘Wubed dhanu m’atira man kud wuvur ng’atu moko.’ Ni juaskari ke eyero kumae: ‘Kud wuyak ng’atu moko, kadi kud wucway ndra de.’

Julam ku Julawi bende gibino i bang’ Yohana man gipenje kumae: ‘Itie ng’a? Dhanu ceke bemito ging’eyi.’ E Yohana udwoko igi kumae: ‘An atie dwal m’ubekok i langa, m’ubetelo wi dhanu i bang’ Yehova, tap calu ma Isaya ular uyero.’

Dhanu gimaru lembe ma Yohana ubino ponjo igi. Dupa m’i kindgi gibino penjiri ka nyo Yohana utie Masiya. Ento edwoko igi kumae: ‘Ng’atu moko ma dit ubebino. Aromo ngo nigonyo kadok thondh wara pare de. Abemiyo batizo ku pii, ento en ebimiyo batizo ku tipo ma leng’.’