Yesu udwoko hekalu leng’

I kind dwi mir ang’wen mi oro 30 N.N.Y., Yesu ucidho i Yeruzalem. Nwang’u dhanu dupa de gibino i adhura pi foc mi Kadhukuwijo. I foc maeno, jubed juthiero lim i hekalu. Pieno dhanu moko gibed gibino ku lim migi, ento jumange giwok ging’iewo i Yeruzalem.

Kinde ma Yesu ucidho i hekalu, ewok enwang’u dhanu gibelworo lim keca. Gibino timo kuloka pi niwang’u sente i ot ma jutimo iye thier ni Yehova! Yesu utimo ang’o? Ekiedo del mi thol eleko ko rombe ku dhieng’ ceke kud i hekalu. Eredho meza mi ju m’uwilo sente man eoyo sente migi mi tongolo i ng’om. Yesu uyero ni ju m’ubino lworo akuru kumae: ‘Wuwodh gin maeni cen ku keni! Kud wudwok ot pa Vwa ni soko!’

Dhanu m’ubino i hekalu igi uwang’ lii i kum gin ma Yesu utimo. E julub pare gigam gipoy i kum lembila ma e m’uweco pi Masiya: ‘Abibedo kud amora pi ot pa Yehova.’

I ng’eye i oro 33 N.N.Y., Yesu udwoko hekalu leng’ wang’ mir arionde. Eromo weko ngo nyanok de nia ng’atu moko ukos woro ni ot pa Won.