Yesu ung’iyo Saul

Saul ubino anyoli mi Roma m’unyolere i Tharso. Ebino Jafarisayo m’ung’eyo Cik mi Juyahudi cuu mandha, man egam edagu Jukristu lee dit. Ebed ewayu Jukristu ma co ku ma mon niai kud i ot migi pi nibologi i otkol. Bende, egam ecungo pi nineno udul dhanu ma kwinyo uopo i igi ma gibecanyu jalub ma nyinge Stefano nitundo m’etho.

Saul unwang’u nia nitwiyo man nisendo Jukristu mi Yeruzalem kende uromo ngo. Pieno ekwayu jalam ma dit uore ecidh i adhura mi Dameski bende. Ento kinde ma Saul udhingo adhurane, der moko ma tar ucare man egam epodho i ng’om. Ewinjo dwal moko ubeyero ire kumae: ‘Saul, pirang’o ibenyayu ragedo i kuma?’ Saul upenjo kumae: ‘In i ng’a?’ Dwalne udwoko ire kumae: ‘An a Yesu. Cidh i Dameski, e abinyutho iri gin m’ibitimo.’ I saa nica, wang’ Saul ugam utho man jucaku peye apeya ku cinge nitundo i adhura.

Nwang’u Jakristu moko ma nyinge Anania bedo i Dameski keca. Yesu uyero ire i gin ma wok i wang’ kumae: ‘Cidh i ot pa Yuda, i gengi ma julwong’o Atira man isay kaka Saul.’ Ento Anania udwoko kumae: ‘Rwoth, ang’eyo lembe pa ng’atu maeno zoo! Ebed ebolo julub peri i kol!’ Yesu uwacu ire kumae: ‘Cidh i bang’e. Ang’iyo Saul kara erwey lembanyong’a ni thek dupa.’

E Anania ucidh unwang’u Saul man eyero ire kumae: ‘Umira Saul, Yesu uora kara abin ayab weng’i.’ Ndhu ndhu nica, Saul ucaku neno piny kendo. Eponjo lembe iwi Yesu man edoko jalub pare. Calu ma dong’ Saul udoko Jakristu m’ulimo batizo, ecaku rweyo i kacokiri karacelo ku Jukristu wagi. Kepar kite ma Juyahudi gizungo ko kinde ma gibeneno Saul ubeponjo dhanu iwi nying’ Yesu! Giyero kumae: ‘Eni tie ngo ng’atu ma rom m’ubino sendo julub pa Yesu e?’

Pi oro adek zoo, Saul urweyo ni dhanu mir adhura mi Dameski. Juyahudi gidagu Saul man gipangu nia mito ginege cen. Ento umego giwinjo pi gambane man gikonye kara eringi. Pieno, gikethe i katoko man gilure piny i ng’om kud i wang’ gang’ mir adhura.

Kinde ma Saul utundo i Yeruzalem, emito edikere kud umego ma kuca. Ento gibino lwore lee mandha. I ng’eye, umego moko ma mol ma nyinge Barnaba utero Saul i bang’ jukwenda man eketho giyiyo nia Saul udaru lokere i andha. E Saul ucaku rweyo lembanyong’a kud amora karacelo ku cokiri mi Yeruzalem. I ng’eye, edok eng’eyere ku nyinge ma Paulo.