Dini mi Jukristu umew i ng’om ma dupa

Jukwenda giworo lembe ma Yesu ung’olo igi ma nia girwey lembanyong’a i ng’om zoo. E i oro 47 N.N.Y., umego mi cokiri mir Antiokia gioro Paulo giku Barnaba gicidh girwey lembanyong’a i adhura ma tung’ tung’. Jurwey lembanyong’a ario maeno ma weg amora giwotho nitundo i Azia ma nok i kabedo ma calu ve Derbe, Lustra man Ikonio.

Paulo giku Barnaba girweyo ni kwond dhanu ceke, nik’ebed julonyo, jucan, aradu kunoke judongo. Dhanu ma dupa giyiyo lemandha iwi Kristu. Kinde ma Paulo giku Barnaba girweyo lembanyong’a ni Sergio Paulo ma tie jabim mi Kupro, ajoga moko umito cerogi. E Paulo uyero ni ajogane kumae: ‘Yehova bimiyo iri matira.’ E ndhu ndhu nica, ajoga maeno udoko abinga. Kinde ma Sergio Paulo ma jabim uneno lembe maeno, edoko jayic.

Paulo giku Barnaba gibed girweyo lembanyong’a kaka ceke: ot kubang’ ot, i soko, i gengi man i kacokiri. Nindo moko, kinde ma gikeyo kum abala moko i adhura mi Lustra, dhanu ma gineno udu maeno giparu nia Paulo giku Barnaba gitie mungu man gimito githier igi lam. Ento Paulo giku Barnaba gijukogi man giyero kumae: ‘Wuwor Mungu kende! Wan de watie dhanu ve wun!’ I ng’eye, Juyahudi moko gibin gicung’o lembe i udul dhanu man gicwayugi i kum Paulo. Pieno, udul dhanu ging’ure ku kidi man giwaye gitere woko i ng’ey adhura ma gibeparu nia etho. Ento ku lembe ma ber, Paulo ubino kwo! Ndhu ndhu nica, umego gibin gilare man gikome gidok kude i adhura. I ng’eye, Paulo udok i Antiokia.

I oro 49 N.N.Y., Paulo ucaku woth pare mir ario mi rweyo lembanyong’a. I ng’ey m’eliewo umego mir Azia ma nok, ecidh erweyo lembanyong’a i kabedo ma bor i Europe. Ecidho nitundo i adhura mir Athene, mir Efeso, mi Filipi, mi Thesaloniki man i kabedo mange bende. Sila, Luka man jalawobi moko ma nyinge Timoteo gicidho giku Paulogi i woth maeno. Gitimo tic karacelo pi nicaku the cokiri ma tung’ tung’ man gikonyo umego ku nyimego mi cokiri maeno kara giteng’ini i thenge mi tipo. Ku lapor, Paulo ubedo pi oro acel ku nusu i cokiri mi Korintho pi nitielo cwiny umego ku nyimego ma kuca. Ebed erweyo lembanyong’a, eponjo dhanu man egoro barua ni cokiri moko. Ebed etimo bende tic mi yiko hema. I ng’eye, edok i Antiokia.

I oro 52 N.N.Y., Paulo ucidho i woth mir adek mi rweyo lembanyong’a. Ecaku wodhe i Azia ma nok. Ecidho nitundo yo malu i adhura mi Filipi man edok eloro yo piny i adhura mi Korintho. Kinde ma Paulo utundo i adhura mir Efeso, ewok etimo oro ma lee keca. I saa maeno eponjo umego ku nyimego, ekeyo kumgi man ekonyogi. Bende, ebed emiyo korolembe ni dhanu kubang’ ceng’ i ot kalasi moko. Dhanu ma dupa gijolo lembe m’eponjo man giwilo kura migi. Tokcenne, i ng’ey ma Paulo urweyo lembanyong’a i ng’om ma tung’ tung’, edok ecidho i Yeruzalem.