PONJI MI 20

Kite ma lembe ukperere ko i cokiri mi Jukristu

Ma juwodho iwi karatasi

Yehova tie Mungu ma telo wi lembe ma ber man ma kpero lembe ceke kakare kakare. (1 Jukorintho 14:33, 40) Pieno, ubekwayu lembe mi dhanu pare bende ukperere man uwothi ma ber i the telowic pare. Dong’ lembene ukperere nenedi, niwacu, Yehova ubetelo wi cokiri pare nenedi nikadh’i bang’ Yesu? Man wan ke, waromo timo ang’o kara lembe ceke uwothi ma ber i cokirine?

1. Jawi cokiri tie ng’a?

“Kristu tie wic mi cokiri.” (Juefeso 5:23) Kud i polo, ebeneno man ebetelo wi tic mi dhanu pa Yehova i ng’om zoo. Pieno, Yesu ung’iyo “jamiru mandha man ma riek,” ma julwong’o bende Guriri m’utelowic. Eno tie ungu ma nyanok mi judong cokiri ma gidaru riyo lee i tije man ma Yesu ubetiyo kugi. (Som Matayo 24:45-47.) Guriri m’utelowic ubemiyo telowic ni cokiri mi ng’om zoo, tap calu ma jukwenda ku judongo mi Yeruzalem gibed gitimo i rundi ma kwong’a. (Tic mi Jukwenda 15:2) Ento umego maeno gibetelo wi dilo mwa gin ungo. Gisomo Biblia pi ning’eyo gin ma Yehova ubemito gitim, man gilubo telowic pa Yesu kubang’e kubang’e.

2. Judong cokiri gitie jukani man tic migi tie ang’o?

Judong cokiri tie umego ma gidaru timo ni Yehova ku bedopwe pi nindo ma lee. Tic migi tie nikwayu rombe pa Mungu. Pieno, gitiyo ku Biblia pi niponjo dhanu pa Yehova, gikonyogi man gitielo cwinygi. Juculogi ngo acula pi tic maeno, ento gitie “ayika nitimo [tije] i wang’ Mungu; ungo nikum mer mi nwang’u piny i ayi m’atira ngo, ento ni kum ava m’anzilo.” (1 Pethro 5:1, 2) Ju ma konyogi i tic migine tie umego ma julwong’o jukony tic. I ng’ei nindo moko, jukony tic bende giromo doko judong cokiri ka gipong’o lembe ma Biblia ubekwayu.

Guriri m’utelowic beng’iyo judong cokiri moko kara gibed juliew mi twodiri. Giliewo cokiri ma tung’ tung’ pi nimiyo igi telowic m’ubekwayere, nitielo cwinygi man nimiyo amora i kumgi. Gin re ma giketho umego ubed judong cokiri man jukony tic, tekene gineno cuu nia umegone gipong’o lembe ma Biblia ubekwayu pi ninwang’u rwom maeno.—1 Timoteo 3:1-10, 12; Tito 1:5-9.

3. Jamulembe pa Yehova acel acel utie ku tic ma kani?

I cokiri, dhanu ceke ‘gipaku nying’ Yehova.’ (Som Zaburi 148:12, 13.) Nenedi? Nwang’u gibecokiri man gibedikiri i lembe ma tung’ tung’ ma betimere i cokone calu ve nidwoko wang’ penji, nimiyo theng ponji man niwero wer. Bende, nwang’u gibedikiri i tic mi rweyo lembanyong’a nimakere ku copo migi.

MED NYANG’ PERI

Wakenen kawoni nia Yesu tie jatela ma nenedi, wanen kite ma judong cokiri gibetimo ko kero nilubo lapor pare, man ayi ma wacopo diko ko cingwa ku Yesu man ku judong cokiri.

4. Yesu tie jatela ma ber akeca

Yesu ubelwong’owa ku yaw yaw nia wayii etel wiwa. Som Matayo 11:28-30, man i ng’eye wuwec iwi penji m’ulubo e:

Yesu tie jatela ma nenedi, man ebemito wawinjara nenedi i the tela parene?

Judong cokiri bende gibelubo lapor pa Yesu. Nenedi? Nen VIDEO.

VIDEO: Judong cokiri gimiyo kony i ng’ei digidi m’uyengo ng’om i Nepal (4:56)

Biblia unyutho kamaleng’ ayi ma judong cokiri gicikiri nitimo ko tic migi.

Som Isaya 32:2 man 1 Pethro 5:1-3, man i ng’eye wuwec iwi penji m’ulubo e:

Calu Yesu, judong cokiri bende gibeii kara jumange gibed ma ber. Eno uketho ibewinjiri nenedi?
Judong cokiri gilubo lapor pa Yesu i yo mange ma kani?

5. Judong cokiri gibeponjowa nikadh’i lapor migi

Yesu ubemito nia judong cokiri ginen tic migi nenedi? Nen VIDEO.

VIDEO: Judong cokiri gibenyutho lapor! (7:39)

Yesu unyutho kite ma judong cokiri gicikiri nibedo ko. Som Matayo 23:8-12, man i ng’eye wuwec iwi penji m’ulubo e:

Biblia ubekwayu lembang’o i bang’ judong cokiri? Nyo judong dini mange gibelubo lembe ma Biblia ubekwayu eno? Kekor.

A. Cal: jadit cokiri moko ubedieng’ pi thenge pare mi tipo ku mi juruot pare. 1. Eberwo i wang’ nicaku ponjo Biblia. 2. Ebeponjo nyare ku lembe mi Biblia; dhaku pare de ubedikere kude.

B. Jadit cokiri ma rom giku dhaku pare gibeliewo nyamego mi cokiri migi ma jucero i odiyath.

Judong cokiri gitimo kero nigwoko winjiri migi ku mi juruot migi karacelo ku Yehova ubed ma tek kwa
Judong cokiri gidieng’ pi dhanu ceke mi cokiri
Judong cokiri girweyo lembanyong’a areri
Judong cokiri gitie juponji. Re gikonyo bende tic mi ketho leng’o i kum Ot Ker man bende tic mange

6. Kwayu wadik cingwa ku judong cokiri

Biblia unyutho thelembe ma pire tek m’ucikere nicwaluwa nidiko cingwa ku judong cokiri. Som Juebrania 13:17, man i ng’eye wuwec iwi penji m’ulubo e:

Pirang’o Biblia ubekwayu nia wabed wor man wajwigara ni ju m’ubetelo wiwa? In ke paru peri tie ang’o iwi nyutho woro igi?

Som Luka 16:10, man i ng’eye wuwec iwi penji m’ulubo e:

Pirang’o wacikara niworo judong cokiri saa ceke kadok i lembe ma thindho thindho?

DHANU MOKO BEYERO KUMAE: “Imbe ku yeny mi bedo i dini moko pilembe dini tie cwinyjo.”

Pirang’o iparu nia etie ber ya wabed kokoro i cokiri pa Mungu ka wabemito nitimo ire?

I ADUNDO

Yesu re ma tie wic mi cokiri. Wadiko cingwa ku mutoro ku judong cokiri m’ubetelo wiwa pilembe gibeii kara wawinjara ma ber man gibeponjowa nikadh’i lapor migi ma beco.