PONJI MI 24
Jumalaika gitie jukani man tic migi tie ang’o?
Yehova ubemito wang’ey juruot pare mi polo. I kindgi, junwang’u jumalaika man Biblia ulwong’ogi nia “wot Mungu.” (Yob 38:7) Biblia ukoro lembang’o i wigi? Tic migi tie ang’o i kwo mwa wa dhanu? Man nyo gin ceke gitie ju pa Mungu?
1. Jumalaika gitie jukani?
Yehova ular ucwiyo jumalaika i wang’ nicwiyo ng’om. Jumalaika gitie giracwiya ma kwo i polo man gitie ku kum mi tipo ma waromo neno ngo, tap calu kum Mungu. (Juebrania 1:14) Wendgi tie milion ma swa, man ng’atuman utie ku kite m’ukoc ku mi juwagi. (Lembanyutha 5:11) ‘Gibetimo [calku] lembe pa [Yehova],’ man gibeworo “badwal mi lembe pare.” (Zaburi 103:20) I rundi ma con, saa moko Yehova ubed uoro jumalaika gicidh giter lembkwenda pare, gikony dhanu man gibodhgi. Tin eni, jumalaika gibetelo wi Jukristu kara gitund i bang’ dhanu m’ubemito niponjo lembe iwi Mungu.
2. Sitani ku pajogi pare gitie jukani?
Jumalaika moko gigwoko ngo bedoleng’ migi ni Yehova uketho gijai ire. Malaika m’ular ujai ‘julwong’e Wonabali man Sitani, en m’ebewondo ng’om zoo.’ (Lembanyutha 12:9) Sitani umito nia en re m’ebim wi jumange, uketho ebidho wang’ dhanu ma kwong’a, niwacu Adamu giku Eva, man i ng’eye edok etelo kadok jumalaika mange gilubo toke i jai parene. Jumalaika maeno m’ujai julwong’ogi pajogi. Yehova uriemogi cen kud i polo man ceng’ini eni, ebinyothogi ceke.—Som Lembanyutha 12:9, 12.
3. Sitani ku pajogi pare gibewondo dhanu nenedi?
Sitani ku pajogi pare gibewondo dhanu dupa tin eni nikadhu kud i timo mi weco ku tipo kunoke weco ku pajogi. Eno tie timo ma rac dit ma ng’atini pimo niweco ko ku tipo m’ucido kunoke niyenyo lembe moko i bang’ pajogi. Ecopo bedo dhok ku dhok kunoke nikadhu kud i bang’ ng’atu mange. Ku lapor, dhanu moko bemito ging’ey lembe mi nindo m’ubino kunoke m’ung’eyere ngo. Pieno, gicidho i bang’ ajoga man i bang’ ju ma somo nyikaluku, ju ma sayu bati migi, ju ma somo leni mi diecingjo kunoke ma somo kieu (maraya). Jumange ke pi nikeyo twoyo, gisayu thieth mir ajoga. Dhanu dupa giparu nia timo maeno tie rac ungo, ento paru migine tie vupo. Bende, Sitani ku pajogi pare gibewondo dhanu nia gicopo weco ku ju m’utho. Ento Yehova ucimo wang’wa kumae: “Kud wulokru ba ju ma weg tipo, kadi ba jucwitho; kud wuyenygi.” (Lembe mi Julawi 19:31) Emiyo iwa cimowang’ maeno pi nigwokowa i kum Sitani ku pajogi pare. Gitie judegi pa Mungu man gibeyenyo yore ceke ma gitim kowa rac.
MED NYANG’ PERI
Wakenen kawoni lembe ma beco ma jumalaika gibetimo, peko ma weco ku tipo m’ucido copo kelo i wiwa, man kite ma wacopo gwokara ko i kum Sitani ku pajogi pare.
4. Jumalaika gibekonyo tic mi nyutho pi Yehova ni dhanu
Jumalaika pa Mungu girweyo ngo lembanyong’a ni dhanu dhok ku dhok calu wan. Ento gibetelo wi dhanu pa Mungu kara gicidh i bang’ dhanu m’ubemito ponjo lembe i wiye. Som Lembanyutha 14:6, 7, man i ng’eye wuwec iwi penji m’ulubo e:
Pirang’o watie ku yeny mi kony mi jumalaika kara warwey ma beri?
Ning’eyo nia karaman jumalaika gibetelo wiwa i bang’ dhanu m’ubemito ponjo Biblia uketho ibewinjiri nenedi? Pirang’o ibewinjiri kumeno?
5. Ceriri cen ni tipo m’ucido
Sitani ku pajogi pare gitie ngo jurimb Yehova ento judegine. Gitie bende judegi mwa. Som Luka 9:38-42, man i ng’eye wuwec iwi penji m’ulubo e:
Pajogi gibetiyo ku dhanu nenedi?
Wacikara ngo nilwong’o kunoke niweko kaka ma pajogi romo mondo ko i bang’wa. Som Poi mi Cik 18:10-12, man i ng’eye wuwec iwi penji m’ulubo e:
Pajogi gibepimo nimondo i kwo mwa kunoke niweco kudwa i yore ma kani? Kaka m’ibekwo i iye, timo ma kani mi weco ku pajogi m’unyay lee?
Yehova ukwero kud wamond i timo mi weco ku pajogi. Nyo iparu nia etimo rac nikwerowa ku lembuno? Pirang’o ibeparu kumeno?
Nen VIDEO, man i ng’eye wuwec iwi penji m’ulubo e:
Nyo rigi ma Palesa utwiyo i cing nyathin pare ubino kelo ngo en peko i wiye? Pirang’o iyero kumeno?
Ugam ukwayu Palesa utim ang’o kara pajogi kud gisende?
Jukristu mandha gijay cen ni pajogi man gimbe ku winjiri kugi niai con. Som Tic mi Jukwenda 19:19 man 1 Jukorintho 10:21, man i ng’eye wuwec iwi penji m’ulubo e:
Pirang’o pire tek ninyotho piny moko ci ma nyo itie ko ma romo bedo ku winjiri ku tipo m’ucido?
6. Voy sitani ku pajogi pare
Sitani re m’ubebimo wi pajogi. Jumalaika ke ng’atu m’ubetelo wigi tie Mikael ma malaika ma dit, niwacu Yesu. Mikael utie ku tego ma rukani? Som Lembanyutha 12:7-9, man i ng’eye wuwec iwi penji m’ulubo e:
I kind Mikael ku jumalaika pare man Sitani ku pajogi pare, jukani ma tek nisagu?
Nyo julub pa Yesu gicikiri nilworo Sitani ku pajogi pare? Pirang’o iyero kumeno?
Icopo voyo Sitani ku pajogi pare. Som Yakobo 4:7, man i ng’eye wuwec iwi penji m’ulubo e:
Icopo gwokiri nenedi ni Sitani ku pajogi pare?
DHANU MOKO BEYERO KUMAE: “Etie rac ungo nineno filme pa karacika kunoke mir ulelo dhanu, pilembe gitie kende kende jamb nambu.”
Pirang’o eno tie paru ma raci?
I ADUNDO
Jumalaika ma pwe gibekonyowa. Ento Sitani ku pajogi pare gitie judegi pa Yehova, man gibewondo dhanu nikadhu kud i timo mi weco ku tipo m’ucido.
Penji mi poyowic
Jumalaika pa Yehova gibekonyo dhanu nenedi ning’eye?
Sitani ku pajogi pare gitie jukani?
Pirang’o ubekwayu ngo imond i timo moko ci mi weco ku tipo m’ucido?
TIM SAYUSAC
Nen gin m’ubenyutho nia Mikael ma malaika ma dit utie Yesu.
“Mikael ma tie jadit mi jumalaika utie ng’a?” (Thiwiwec mi jw.org)
Nen gin m’unyutho nia Wonabali tie ng’atu m’unuti andha, ento etie ngo ayi ma julwong’o ko lembe ma reco.
Nen kite ma dhaku moko utuc nivudhere ko cen i the cing pajogi.
“Enwang’u thelembe m’uketho wabekwo” (Otkur ma Wiw, nindo 1, dwi mir 7, 1993)
Nen ayi ma Sitani ubewingo ko dhanu nikadhu kud i timo mi weco ku pajogi.