PONJI MI 55
Dik cingi pi nitielo cokiri peri
I ng’om zoo, dhanu milion ma lee dit gibetimo ni Yehova kud anyong’a i cokiri ma tung’ tung’ elufu swa. Gitie ku foyofoc man gimaru ponji ku telowic ceke ma gibenwang’u, uketho gibetielo cokiri migi kud amora i yore dupa. Nyo in de ibetielo cokiri peri kud amora kumeno?
1. Icopo tiyo ku saa man kero peri pi nitielo cokiri i yore moko ma kani?
Wan ceke wacopo diko cingwa pi nitielo cokiri mwa. Ku lapor, nyo dhanu moko nuti i cokiri peri ma gidaru tii kunoke ma gitie weg abala? Icopo miyiri pi niterogi kunoke nikonyogi kara gicidh i coko. Kunoke icopo timo igi lembe mange, calu ve nicing’iewo igi cam, nikonyogi ku tic migi moko kunoke niketho leng’o i kum ot migi. (Som Yakobo 1:27.) Wacopo bende niwodhara pi niketho leng’o i kum Ot Ker mwa. Ng’atu moko mbe ma diyowa pi nitimo lembuno zoo. Ento mer ma wamaru ko Mungu man umego mwa, re ma cwaluwa ‘nimiyara giwa ku berocwinywa.’—Zaburi 110:3.
Jumulembe m’ulimo batizo gicopo nitielo cokiri i yore mange bende. Ku lapor, umego m’uteng’ini i tipo man ma gipong’o lembe m’ubekwayere, gicopo doko jukony tic man i ng’eye ke, judong cokiri. Umego ku nyimego ceke gicopo diko cing’gi kud amora i tic mi lembanyong’a nwang’u gibetimo calu juyab yo. Jumoko copo konyo tic mi giero udi ma tung’ tung’ mi Ker, kunoke nidok i cokiri mange ma yeny utie i iye.
2. Wacopo tiyo nenedi ku jamcingwa pi nitielo cokiri mwa?
Wacopo ‘yungo Yehova ku piny mwa’ ma pigi tek. (Lembrieko 3:9) Etie rwom ma dwong’ man lembe mi mutoro iwa, nimiyo sente man jamcingwa mange pi nikonyo tic i cokiri mwa man tic mi lembanyong’a i ng’om zoo. (Som 2 Jukorintho 9:7.) Jutiyo bende ku giramiya mwa pi nimiyo kony ni ju ma peko ma rek uwok i wigi. Ju ma dupa mi kindwa gibed gimaru ‘nikoyo piny moko ang’et’ ma gibimiyo ni giramiya. (Som 1 Jukorintho 16:2.) Pi nimiyo giramiya mwa, wacopo bole i sanduku mi giramiya ma nwang’ere i Ot Ker mwa kunoke wacopo ore kud iwi yamu i kusika ma e: donate.jw.org. Yehova umiyo iwa kaka ma wanyuth ko nia wamare nikadhu kud i ayi ma wabetiyo ko ku sente mwa man jamcingwa mange.
MED NYANG’ PERI
Wakenen yore moko m’iromo diko ko cingi pi nitielo cokiri.
3. Wacopo miyo jamcingwa
Yehova giku Yesu gimaru lee dit ng’atu ma miyo ku berocwinye. Ku lapor, Yesu uweco ber akeca pi dhatho moko m’ubino jacan re m’uii nimiyo giramiya. Som Luka 21:1-4, man i ng’eye wuwec iwi penji m’ulubo e:
Pi nifoyo i Yehova, nyo wacikara nimiyo sente ma lee?
Yehova giku Yesu giwinjiri nenedi ka wabemiyo ku berocwinywa?
Pi ning’eyo kite ma jubetiyo ko ku giramiya mwa, nen VIDEO. I ng’eye ke wuwec iwi penji m’ulubo e:
Jubecuku tiyo nenedi ku giramiya mwa pi konyo cokiri mi ng’om zoo?
4. Wacopo wodhara giwa pi nikonyo tic
I rundi ma con, jurutic pa Yehova gibed gimiyiri kud amora pi niyiko kum udi ma giworo iye Mungu. Ubed ukwayu ngo gimii kende kende sente. Som 2 Lemkei 34:9-11, man i ng’eye wuwec iwi penji m’ulubo e:
Jaisraelman udiko cinge nenedi i kum tic mi yiko kum ot pa Yehova?
Jumulembe pa Yehova de gibelubo lapor mi rundi ma con eca. Pi ninyang’ ma cuu, nen VIDEO. I ng’eye, wuwec iwi penji m’ulubo e:
Pirang’o pire tek nia wagwok Ot Ker mwa ubed ma leng’ saa ceke?
Icopo diko cingi i kum tic maeno nenedi?
5. Umego gicopo ii ninwang’u rwom mange i cokiri
Lembagora ubeyawu kum jumaco nia gitim kero nipong’o lembe m’ubekwayere pi ninwang’u rwom kara gitiel cokiri cuu. Pi ning’eyo lembe moko ma giromo timo, nen VIDEO. I ng’eye, wuwec iwi penji m’ulubo e:
I video maeni, umego Ryan ucaku timo ang’o pi nitielo cokiri lee nisagu?
Biblia unyutho lembe m’umego gicikiri nipong’o pi nidoko jukony tic man judong cokiri. Som 1 Timoteo 3:1-13, man i ng’eye wuwec iwi penji m’ulubo e:
Lembang’o m’ubekwayere i bang’ umego m’ubemito edok jakony tic kunoke jadit cokiri?
Lembang’o m’ubekwayere bende i bang’ awiya man dhaku pare?—Som verse mir 4 man 11.
Tekene umego gibeii nipong’o lembe m’ubekwayere eno, nyo dhanu ceke i cokiri gicopo nwang’u bero? Kekor.
NG’ATU MOKO ROMO PENJI KUMAE: “Jumulembe pa Yehova ginwang’u sente ma gitimo ko tic migi kakani?”
Iromo dwoko nenedi?
I ADUNDO
Yehova foyo lee dit ka wabeii niwodho saa mwa, kero, sente, man jamcingwa mange pi nitielo cokiri.
Penji mi poyowic
Wacopo tiyo nenedi ku saa man kero mwa pi nitielo cokiri?
Wacopo tiyo nenedi ku jamcingwa pi nitielo cokiri?
Ibemito itiel cokiri i yore moko ma kani?
TIM SAYUSAC
Nen nia pirang’o dong’ Mungu kwayu ngo nia jutic pare gimii apaj piny migi.
“Biblia uyero ang’o iwi miyo apaj piny?” (Thiwiwec mi jw.org)
Biblia uweco pi lembe moko m’ umego m’ulimo re ma gitimo. Dong’ kan ubekwayere nia nyamego moko m’ulimo utim tije ke?
“Dito ma judong cokiri gitie ko i cokiri” (Otkur ma Wiw mi dwi mir 2, 2021)
I video ma e, kenen Jumulembe moko ma gibemiyiri i ayi ma segi pi niyeyo man nitero girasoma ni umego migi.
Kite ma jupoko ko girasoma m’ujengere iwi Biblia i Congo (4:25)
Kite ma wanwang’u ko sente mi timo tic mwa ukoc bor dit ku mi dini mange. Kenen.
“Jumulembe pa Yehova ginwang’u sente ma gitimo ko tic migi kakani?” (Thiwiwec mi jw.org)