PONJI MI 37
Biblia uyero lembang’o iwi tic man iwi sente?
Nyo nindo moko adieng’acwiny ma lee udaru mondo i ii pi tic kunoke pi sente? Andha, ecopo bedo yot ungo saa moko nipong’o yeny mwa mi kum man bende niketho yeny pa Yehova i kabedo ma kwong’a calu m’ubekwayere. Re Biblia umiyo juk moko ma beco ma romo konyowa i lembe maeno.
1. Biblia uyero lembang’o iwi tici?
Mungu ubemito nia watim tic kud anyong’a. Biblia uyero nia “gin moko mbe ma ber ni dhanu ma sagu tek . . . eketho anyong’a neg ng’eyong’ec pare kum gin ma ber mi tic mi muli pare.” (Eklizia 2:24) Yehova ubetimo tic kud amora kubang’ ceng’. Wan bende ka wabetimo tic kud amora, wabinyutho nia wabelubo lapor pare. E wabinyayu anyong’a i iye man wabibedo ma cwinywa kwiyo.
Tic pire tie tek. Ento wacikara niweko ngo nyanok de nia pire dok tek iwa nisagu thier ma wabetimo ni Yehova. (Yohana 6:27) Eng’olo nia tek waketho lembe m’uneno en i kabedo ma kwong’a i kwo mwa, ebipong’o yeny mwa mi kum.
2. Paru ma cuu m’ukwayu wabed ko iwi sente
Kadok Biblia uyero nia “sente en e jamgwok” de, re elund ecimo wang’wa bende nia sente kende romo miyo ngo iwa anyong’a mandha i kwo. (Eklizia 7:12) Pieno kakare nimaru sente akeca, Biblia ubekwayuwa nia ‘cwinywa cung i kum gin ma watie ko kawoni.’ (Som Juebrania 13:5.) De andha, ka wabefoyo ku giki ma watie ko, waromo bedo ngo kwa nyacan can pilembe nia wakoso piny moko. Bende, waromo mondo ngo i deni ma tije mbe. (Lembrieko 22:7) M’uweko maeno, wabiuro ariti mi tuko tuko mi sente, man mi yenyo ya walony nyapio pio m’umbe kero moko.
3. Waromo nyutho berocwiny ku sente mwa nenedi?
Yehova tie Mungu ma won berocwiny. Wan de wacikara nilubo lapor pare nwang’u watie “weg berocwiny” man watie “ayika nikonyo jumange ku piny” mwa. (1 Timoteo 6:18) Dong’ waromo tiyo nenedi ku sente mwa ku berocwinyi? Nwang’u wabetielo ko tic i cokiri, man wabekonyo dhanu ma gitie ku yeny, asagane ke umego ku nyimego mwa mi tipo. Gin ma foyo i Yehova lee utie ngo wend sente ma wabemiyo, ento gin m’ubecwaluwa. Tekene adunde m’upong’ ku mer re m’ubecwaluwa nimiyo ku berocwiny, wabibedo ku mutoro man wabinyayu bende mutoro i i Yehova.—Som Tic mi Jukwenda 20:35.
MED NYANG’ PERI
Kawoni wabineno bero ma wacopo nwang’u ka wabeweko tic i kabedo pare ma dhe man ka wabefoyo ku gin ma watie ko.
4. Yung Yehova ku tic peri
Tekene kindwa ku Yehova utie ceng’ini, wacikara bende nibedo ku paru ma cuu iwi tic. Nen VIDEO, man i ng’eye wuwec iwi penji m’ulubo e:
I video maeni, Jason utie ku timo ma kani ma beco i tic pare?
Ang’o m’unyutho nia eweko ngo tic ucam ire saa mi lembe pa Mungu?
Som Jukolosai 3:23, 24, man i ng’eye wuwec iwi penji m’ulubo e:
Pirang’o pire tie tek nia watim tic ku cwinywa ceke?
Tic pire tie tek. Ento wacikara ngo niweko pire dok tek iwa nisagu thier ma wabetimo ni Yehova
5. Bero mi foyo ku gin ma watie ko
Dhanu ma dupa gibetimo kero nicoko igi sente lee ve kwiyo mi dhu nam. Ento Biblia ubejukowa nitimo lembe m’ukoc ku maeno. Som 1 Timoteo 6:6-8, man i ng’eye, wuwec iwi penji m’ulubo e:
Biblia ubemiyo iwa juk ma kani?
Waromo kwo asu kud anyong’a kadok jamcingwa tie nok de. Nen VIDEO, man i ng’eye wuwec iwi penji m’ulubo e:
Kadok juruot mi video maeni gitie jucan de, re pirang’o gitie kud anyong’a?
Dong’ ka nyo watie ku piny moko de, re asu pinyne uberomo wang’wa ngo, waromo timo ang’o? Yesu ukoro kpawa moko m’unyutho ariti ma wacopo nwang’ara ko. Som Luka 12:15-21, man i ng’eye wuwec iwi penji m’ulubo e:
Ponji ang’o m’inwang’u i kum lapor maeno ma Yesu umaku?—Nen verse mir 15.
Som man por Lembrieko 10:22 ku 1 Timoteo 6:10. I ng’eye, wuwec iwi penji m’ulubo e:
Iparu nia ang’o ma pire tek nisagu? Nyo tie nibedo ku winjiri ma ceng’ini ku Yehova kunoke nyo nipong’ ku sente? Pirang’o iparu kumeno?
Nidwaru sente reke reke saa ceke romo kelo peko ma kani?
6. Yehova bipong’o yeny mwa
Koso tic man koso sente copo miyo iwa kaka mi ng’eyo ka nyo waketho genogen mwa iwi Yehova kunoke ngo. Nen VIDEO pi ning’eyo gin ma waromo timo ka wabenwang’ara i wang’ peko maeno, man i ng’eye, wuwec iwi penji m’ulubo e:
Umego mi video maeni ukadhu kud i peko ma kani?
Etimo ang’o pi ninyego ma ber ku pekone?
Som Matayo 6:25-34, man i ng’eye wuwec iwi penji m’ulubo e:
Yehova ung’olo nia ebitimo ang’o ni ju m’ubeketho yeny pare i kabedo ma kwong’a i kwo migi?
DHANU MOKO BEYERO KUMAE: “Kan anegara ngo ku tic, juruot para gibicamu ang’o? Pieno kosa mbe kan abekeng’o coko moko.”
Giragora ma kani m’ubekonyi niyiyo nia Yehova bipong’o yeny mwa ka waketho lembe m’uneno en i kabedo ma kwong’a?
I ADUNDO
Tic mi kum man sente pigi tie tek i kwo mwa, ento gicikiri ngo nyanok de niwingo wiwa i kum timo ni Yehova.
Penji mi poyowic
Ang’o ma copo konyi kara saa ceke ibed ku paru ma cuu iwi tici?
Bero ang’o ma wacopo nwang’u ka wabefoyo ku giki ma watie ko?
Icopo nyutho nenedi nia igeno lembe ma Yehova ung’olo nia ebipong’o yeny mi dhanu pare?
TIM SAYUSAC
Nimakere ku Biblia, nyo sente tie raci? Kenen.
“Nyo sente utie ulag kwond lembe ceke ma reco?” (Thiwiwec mi jw.org)
Nen kite ma waromo tiyo ko ku sente mwa pi nifoyo i Mungu.
Nyo etie ber kunoke rac nituko tuko mi sente?
Jalwo moko m’ubed utuko tuko mi sente man m’ubino won ayeki uloko kwo pare. Nen gin m’ucwale nilokere.
“Agam amaru ng’wec ma ku kana lee dit” (Otkur ma Wiw, nindo 1, dwi mir 11, 2011)