Ng’atu moko umaku giramiya ma juboyo ku karatasi

Biblia uyero lembang’o iwi nimiyo?

Lembe ma Biblia udwoko

Biblia ubemiyo amora i kumwa nia wabed wamii giramiya ma ku berocwinywa man nia thelembe m’atira re m’ucwalwa nimiyo. Enyutho nia nimiyo ku berocwiny utie ku kony ni ng’atu ma jubemiyo ire kende ngo, ento ni ng’atu m’ubemiyo bende. (Lembrieko 11:25; Luka 6:38) Yesu uyero kumae: “Nimiyo nyayu anyong’a lee ma sagu nigamu agama.”—Tic mi Jukwenda 20:35.

Nimiyo utie ku bero i saa ma kani?

Nimiyo utie ku bero kinde ma ng’atini ubemiyo ku berocwinye. Biblia uwacu kumae: “Wek ng’atuman utim tap calu m’ekeco i adundene, ento m’ava lembe mbe i kume re ngo kadi ma jubediye adiya de ngo, kum Mungu maru ng’atu ma miyo kud anyong’a.”—2 Jukorintho 9:7, korolembe mi there.

Nimiyo piny kud adunde ceke utie kum theng “dini” ma Mungu foyo. (Yakobo 1:27, korolembe mi there) Ng’atu m’ubekonyo ju ma gin’i yeny ku berocwinye ubetimo karacelo ku Mungu, man Mungu neno berocwiny maeno calu ve nia ng’atune uroyo deni i iye en e Mungu. (Lembrieko 19:17) Biblia uponjo nia Mungu en gire biculo ni ng’atu m’ubemiyo ni jumange.—Luka 14:12-14.

Nimiyo umbe ku bero i saa ma kani?

Ka thelembe moko ma cuu ngo re m’ucwalu ng’atini nimiyo. Ku lapor:

Pi nitelo nen mi dhanu.—Matayo 6:2.
Pi ninwang’u piny moko kawang’e.—Luka 14:12-14.
Pi nipimo ning’iewo both.—Zaburi 49:6, 7.

Kan etie pi nitielo tic kunoke timo moko ma cik pa Mungu ukwero. Ku lapor, etie cuu ngo nimiyo sente ni ng’atini kara egoy kudo ngala, eng’iew kudo yath ma merojo, kunoke emer kudo ku kong’o. (1 Jukorintho 6:9, 10; 2 Jukorintho 7:1) Bende, etie lembe m’umaku piny ungo nimiyo sente ni ng’atu moko m’ubekwero akakaka nitimo tic ma ke etie ku copo.—2 Juthesaloniki 3:10.

Ka wabemiyo i kadhiri m’ubecerowa nipong’o rwom ma Mungu umiyo iwa. Biblia ubeponjo nia wegudi gicikiri nipong’o yeny mi juruot migi. (1 Timoteo 5:8) Etie lembe m’umaku piny ungo nia wonot moko, umii piny nisagu ni jumange ma dong’ juruot pare gibekoso piny ma gitie ku yenyne. Rom rom kumeno, Yesu unyutho nia dhanu ma gibepong’o ngo yeny mi junyodo migi ma gitii pilembe giyero nia piny migi tie “giramiya ma jung’olo nia jubithiero ni Mungu” gibetimo kosa.—Marko 7:9-13.

Verse mi Biblia m’uweco iwi nimiyo

Lembrieko 11:25: “Ng’eyong’ec ma mio piny bicwe; man ng’atu ma kwoyo pi jubikwoyo pi i wie gire bende.”

Thelembene: Nimiyo piny utie ku kony ni ng’atu ma jubemiyo ire kende ngo ento ni ng’atu m’ubemiyo bende.

Lembrieko 19:17: “Ng’atu ma ngisi nege kum jacan mio banja ni Yehova, man ebidwoko wang’ tic ma ber pare ire kendo.”

Thelembene: Mungu kethere en gire nia ve etie ku banja mi dhanu m’ubekonyo ju ma gin’i yeny, man eng’olo nia ebiculo kawang’ berocwiny ma gibetimo.

Matayo 6:2: “Kan ibemiyo giramiya ni jucan, kud ilar ikudh agwara calu ma weg umbili gibed gitimo . . . kara dhanu uyunggi.”

Thelembene: Wacikara ngo nimiyom kende kende pi nitelo nen mi dhanu i wiwa.

Tic mi Jukwenda 20:35: “Nimiyo nyayu anyong’a lee ma sagu nigamu agama.”

Thelembene: Nimiyo ku berocwiny nyayu mutoro.

2 Jukorintho 9:7: “Wek ng’atuman utim tap calu m’ekeco i adundene, ento ku minowang’ re ngo kadi ma jubediye adiya de ngo, kum Mungu maru ng’atu ma miyo kud anyong’a.”

Thelembene: Giramiya ma jumiyo ku berocwiny re ma nyayu anyong’a i Mungu.