Watii ma ber ku lembe moko ma pigi tek ma nwang’ere i buku Biblia ponjo (Qu’enseigne la Bible)
Ka ng’atu ma waponjo kude Biblia ubemedere niponjo lembe ma Biblia ponjo i andha man ebetio ku lembene, ebidongo man ebicego nying’ tipo i kwo pare. (Zab. 1:1-3) Kara wakony ng’atu ma waponjo kude Biblia umedere, ukwayu watii ma ber ku lembe moko ma pigi tek ma nwang’ere i Buku Biblia ponjo (Qu’enseigne la Bible).
Penji mir acaki mi wic: I buku maeno, wicman ucaku ku penji ma tung’ tung’ ma judwoko wang’gi i ponjine. Icopo penjo penji maeno ceke m’umbe nisayu nia japonj Biblia udwok wang’gi, ento kende kende pi nimio ire ava mi lembe ma tung’ tung’ ma wubiponjo. Kunoke icopo kwayu nia ekor i adundo paru pare iwi penjiman. Kadok ekoro paru ma vii de, pire tie tek ungo nia itwiny lembe m’ekorone ndhu ndhu nica. Lembe m’eyerone bikonyi kende kende pi nineno nia ibiketho peko iwi thenge ma kani mi ponji.—Rie. 16:23; 18:13.
Thenge ma jumedo (Appendice): Ka ng’atu m’iponjo kude Biblia unyang’ man eyiyo lembe ma nwang’ere i thenge ma wubeponjo, icopo kende kende niketho cwinye nia edong’ esom lembe ma nwang’ere i thenge ma jumedo, m’urombo ku lembe ma wubeponjo, i saa m’emaru en. Nindo ma cen, icopo koyo dakika moko nyanok pi nineno ka nyo enyang’ ma ber i lembe m’edong’ esomone. Ento, tek ineno nia ecibedo ber akeca nia wuponj thenge maeno karacelo kude, wucikuru nikoyo saa moko i kind ponji mwu pi niweco iwi thenge ma jumedone kunoke ng’ete moko. Pieno, wubisomo udukuwec man ibipenje ku penji moko m’ilar iyiko i wang’e.
Sanduku mi lembe ma dongo dongo ma judok i wie: I thum pa wicman, sanduku moko tie m’udwoko wang’ penji ma nwang’ere i acaki mi wicne. Icopo tio ku sanduku maeno pi nineno nyo ng’atu m’iponjo kude Biblia unyang’ iwi paru ma dongo dongo man nyo ecopo nikoro en gire parune. Wusom karacelo lembe ma jukiewo i sandukune kubang’e kubang’e man bende verse ma tung’ tung’ ma junyutho. Ing’eye, kwai ng’atu m’iponjo kude Biblia etii ku verse maeno pi nikoro nia pirang’o lembe ma juyerone tie lemandha.—Tic 17:2, 3.