Nyo ibed itio ku JW Library de?

JW Library tie program ma jucopo royo i telefon, tablette, kunoke ordinater m’umbe cul. Ekonyojo nitoko niai kud i Internet, Biblia, girasoma mange, video, man som ma jumaku pir awinja, i telefon, tablette man ordinater.

KITE M’ICOPO NWANG’E KO: Yab Internet, mondi i kaka ma program ma tung’ tung’ nwang’ere i ie, ng’ii JW Library man kethe (installer) i telefon, tablette, kunoke ordinater peri. JW Library ne nwang’ere pi jamtic mi kwonde ceke. Kan idaru mondo i Internet, yab program ne, man ing’eye ng’ii girasoma kunoke video m’imaru nitoko i jamtic peri. Tekene Internet umbe i beng’i, icopo cidho i Ot Ker, i Bibliothèque ma pi dhanu ceke, kunoke i Cybercafé. Kan idaru toko girasoma moko i telefon, tablette kunoke ordinater peri, ibibedo mbe kendo ku yeny mi mondo i Internet pi nisomogi. Calu jubed jumedo lembe manyen nja i JW Library, bikwayu nindo moko ibed imondi i Internet pi niketho program manyen kan utie.

PIRANG’O UKWAYU IBED KUDE? JW Library konyo lee mandha pi nitimo ponji peri ma segi man nilubo coko m’ubekadhu. Ekonyo bende pi tic mi rweyo lembanyong’a, akecane ka juberweyo saa ma jupangu ngo.