Wamed bodho mwa i tic mi rweyo lembanyong’a wanwang’ dhanu ceke m’i kabedo ma warweyo ie lembanyong’a

PIRANG’O PIRE TIE TEK: Jabila Zekaria ular uewo nia dhanu mi dhok mi thek ceke bijolo lembanyong’a (Zk 8:23). Re ng’a ma biponjogi (Rm 10:13-15)? Watie ku rwom man tic mi rweyo lembanyong’a ni ng’atuman acel acel i kabedo ma warweyo ie lembanyong’a.​—od-F mba. 84 udu. 10-11.

KITE MA JUROMO TIMO KO:

• Yikiri. Nyo ibed inwang’u dhanu ma weco dhok mange? Icopo tio kud application JW Language pi ning’eyo kite m’icopo caku ko wec ku dhanu. Icopo tio ku telefon kunoke tablet peri pi ninyutho ire kite m’ecopo nwang’u ko lembe dupa i dhok pare i jw.org

• Bed ilub lembe ku weng’i. Kan iberweyo lembanyong’a ot ku bang’ ot, kud iwek kaka mi weco ibang’ dhanu m’ubewotho i yo kunoke m’ubekuro mutukari ukedhi. Kinde m’iberweyo kaka ma dhanu upong’ i ie, kud iwek lembe mange uwing wii ikum lembanyong’a m’iberweyo

• Bed won amora. Tim kero nidok ibang’ ju m’igam inwang’u ngo i pacu migi wang’ ma kwong’a. Tim tego inwang’ dhanu kaka ceke m’icopo nwang’ugi i ie, ecopo bedo i saa mange man nindo bende mange. Pi jumoko, bikwayu jukiew igi barua, julwong’gi ku telefon, kunoke junwang’gi i ndaki

• Kud iweke. Kud igal nidok ibang’ dhanu ceke ma giwinjo lembe kud ava. Ka ng’atune weco dhok mange, sai ng’atu moko ma copo nikonye cuu i dhok pare. Icopo mediri asu niliewe nitundo cil m’ibinwang’u jarwei moko ma weco dhok pare.​—od-F mba. 94 udu. 39-40

NEN VIDEO MA THIWIE TIE NIRWEYO LEMBANYONG’A “CIL I TUNG’ NG’OM,” MAN I NG’EYE, DWOK WANG’ PENJI M’ULUBO E:

• 

  Umego ku nyimego giyikiri nenedi pi nici rweyo lembanyong’a i ng’om mabor? (1Ko 9:22, 23)

• 

  Peko makani m’ukwayu giyikiri ikume?

• 

  Mugisa makani ma ginwang’u?

• Icopo niii nenedi kara inwang’ dhanu mapol i kabedo peri m’irweyo ie lembanyong’a?