Pi nirweyo i kabedo ma juweco dhok dupa i ie, ubekwayu winjiri

Wang’ ma pol, dhanu bejolo lembanyong’a mi Ker yot yot ka gibewinje i dhok ma thugi ma dhe. Nyo pi lembuno re m’uketho i ceng’ Pentekoste mi oro 33 R.M., Yehova umaku yub kara Juyahudi “ma lworo Mungu, ma giai kud i thek ceke ma the polo,” giwinj lembanyong’a ku ‘dhu thugi,’ kadok nwang’u i saa maeca, dhok ma juweco akeca ubino dhok mi Juebrania kunoke mi Jugiriki de. (Tic 2:5, 8) Tin bende, i kabedo ma juweco ie dhok dupa, cokiri ma gitimo coko i dhok ma tung’ tung’ gicopo bedo ku teritwar acel kende ma gin zoo girweyo i ie. Dong’ jurwei mi cokiri ma kumeno gicopo winjiri nenedi kara girwei lembanyong’a ni dhanu ceke mi teritwar migi, m’umbe nibadhu cwiny ju ma girweyo igine?

• 

  Nyang’ i bang’ jumange (Rie 15:22): Ukwayu ju ma neno wi tic mi lembanyong’a i cokiri ma rweyo i teritwar ma rom giwec i kindgi, man ginwang’ ayi ma ber ma jucopo rweyo ko lembanyong’a. Ka teritwar mi cokiri mi dhok mange utie nyanok, saa moko nyo gicopo kwayu nia cokiri mwu ubed uwek ot mi dhanu ma weco dhok migi. Ento ka gicopo rweyo ngo ni dhanu mi teritwarne zoo, pilembe dhanu ma weco dhok migi umaku kabedo ma lee, gicopo weko wurwei kubang’ ot, man wunyuth igi pi ng’atu ma weco dhok migi m’ujolo lembanyong’a. (od-F mba. 93 udu. 37) Kunoke gicopo kwayuwu nia wukonygi ninwang’u dhanu ma weco dhok mi cokiri migi, man wunyuth igi kaka ma ginwang’iri i ie. (km-F 7/12 mba. 5, sanduku) Ng’ei bende nia saa moko i ot acel, icopo nwang’u dhanu ma weco dhok ma tung’ tung’. Pi nirweyo kaka ma kumeno, ukwayu wawor cik ma gavmenti uketho pi lwak pare.

• 

  Dik cingi ku jumange (Ef 4:16): Lub cuu mandha telowic ceke ma janen wi tic mi lembanyong’a mi cokiri mwu umio. Nyo ibeponjo Biblia ku ng’atu moko ma dhok m’eweco utie ngo dhok mi cokiri peri? Kan imie ni umego kunoke nyamego mi cokiri ma ceng’ini, man ma weco dhok pare uponj kude, ecopo medere nisagu.

• 

  Lar iyikiri cuu (Rie 15:28; 16:1): Ka ng’atu m’ujoli i lembanyong’a weco dhok mange, tim kero iyer ire lembanyong’a kokoro. Kara iyikiri cuu, lar inyang’ nia dhanu mi teritwar peri weco dhok ma kani. Ing’eye, icopo toko Biblia man video mi dhok migi i telefon kunoke i tablet peri. Icopo tio bende kud application JW Language pi ning’eyo kite ma jumotho ko dhanu ku dhok mange.