Kite ma wacopo tiyo ko ku video mi ponji mi Biblia

Watie ku video ang’wen mi ponji mi Biblia ma wacopo tiyo ko i tic mi rweyo lembanyong’a. Juyiko videonegi pi thelembe ma kani?

• 

  Pirang’o ukwayu niponjo Biblia?​—Ma bor juyiko video maeni pi nitelo nen pa ng’atini iwi Biblia m’umbe nidieng’ i kum gin m’eyiyo i dini pare. Emiyo amora i kum ju m’unene kara ginwang’ i Biblia, dwoko wang’ penji ma dongo ma gibed gipenjiri ko i kwo migi man videone miyo abila mi dwoko wang’ penji ma tap ma nwang’ere i Biblia. Ekoro bende kite ma jucopo kwayu ko ponji mi Biblia.

• 

  Pirang’o ukwayu niponjo Biblia? (m’adundo) video maeni de lembe m’i iye urombo ku m’i video ma bor ento emondo i ma bor ceng’ini wang’ adek. Eromo bedo ku kony lee i therithwar ma dhanu m’i iye gimbe ku saa akeca.

• 

  Jutimo Ponji mi Biblia Nenedi? Juyiko video maeni pi nitelo nen pa ng’atini iwi yub mwa mi ponjo Biblia ku dhanu m’umbe cul, man pi nidwoko wang’ penji moko ma dhanu bepenjiri ko wang’ ma pol iwi ponji mwa mi Biblia. Videone unyutho bende kite ma jucopo kwayu ko ponji mi Biblia.

• 

  Itie ajola pi ponji peri mi Biblia juyiko video maeni kara junyuthe ni dhanu m’ubeponjo Biblia. Kadok nang’ videone nwang’ere i mbaya mir ario mi buku Icopo kwo kud anyong’a rondo ku rondo! de, re jucopo nyuthe bende kinde ma jubeweco iwi lembe ma nwang’ere i nyathibuku Icopo kwo kud anyong’a rondo ku rondo! Videone unyutho lembe ma dongo ma nwang’ere i buku man enyutho bende lembe ma bibetimere i saa mi ponji.

Kadok nang’ juyiko videoneman pi thelembe ma tap de, re i saa mange de wacopo nyuthogi kunoke waorogi ni dhanu kan ukwayere. Ukwayu jurwey lembanyong’a ging’ey videone cuu man gitii kugi ma ber i tic migi mi rweyo lembanyong’a.