Jurunyodo, wukony awiya mwu gimar Yehova

1-2. Pirang’o giragora moko pigi doko tek lee i iwa ka lembe moko ma nyen uwok i kwo mwa?

I NINDO mi nyom, cwar mugole ku mugole giwinjo cuu mandha korolembe m’ujengere iwi Biblia ma jubemiyo iwi gamiri. Giragora ma jubesomo igi saa maeno utie ngo igi ni gin ma nyen. Re niai cing’ nica, giragorane pigi bedo tek lee igi. Pirang’o? Pilembe bikwayere nia gitii kugi i gamiri migi.

² Etie bende lembe ma rom ka ju m’ugamiri gidoko jurunyodo. Copere nia pi oro ma dupa, gibed giwinjo korolembe m’ubed uweco iwi kite ma jucopo tungo ko awiya. Ento kawoni juk ma jumiyo i korolembenegi pigi tie tek lee igi. Kum gicinyolo nyathin migi gigi m’ukwayu gitungi. Eno tie rwom ma dit mi tuko ngo! Andha, ka lembe moko mayen uwok i kwo mwa, giragora moko pigi doko tek lee i iwa. Eno re m’uketho jurutic pa Yehova gisomo Lembagora, tap calu ma yang’ jung’olo ni jubim mir Israel nia gibed gisome man ginyam iye “i nindo ceke” mi kwo migi.​—Poi. 17:19.

3. Wabiweco iwi lembang’o i thiwiwec maeni?

³ Jurunyodo, wutie ku rwom ma dit mandha mi ponjo awiya mwu ging’ey Yehova. Re mito ngo wujik niponjogi aponja kende ku lembe iwi Mungu. Mito wukonygi bende gimare lee. Dong’ wucopo timo ang’o kara wukony awiya mwu gimar Yehova? I thiwiwec maeni wabiweco iwi cik mir ukungu ang’wen ma copo konyowu wu jurunyodo. (2 Tim. 3:16) Wabineno bende bero ma Jukristu moko ginwang’u i kum tiyo ku juk mi Biblia iwi lembene.

CIK MIR UKUNGU ANG’WEN MA ROMO KONYO JURUNYODO

4. Cik mir ukungu ma kani ma romo konyo jurunyodo niponjo awiya migi nimaru Yehova? (Yakobo 1:5)

⁴ Mi 1: Say telowic pa Yehova. Kway Yehova umii iri rieko m’ikony ko awiya peri kara gimare. (Som Yakobo 1:5.) En re m’etie ng’atu ma copo miyo juk ma ber m’usagu. Pirang’o? Pi thelembe dupa. Wakewec iwi thelembene moko ario. Mi kwong’o, Yehova utie jaranyodo m’ung’eyo lembe lee. (Zab. 36:9) Mir ario, juk mi rieko m’ebed emiyo utie ku bero kwa.​—Isa. 48:17.

5. (a) Yehova ubekonyo jurunyodo nenedi nikadhu kud i dilo pare? (b) Calu ma junyutho i video, inwang’u ponji ma kani i kum ayi m’umego Amorim ku min ot pare gitungo ko awiya migi?

⁵ Nikadhu kud i Lembe pare man dilo pare, Yehova ubemiyo telowic dupa m’ujengere iwi Biblia ma copo konyo jurunyodo niponjo awiya migi kara gimare. (Mat. 24:45) Ku lapor, icopo nwang’u juk dupa ma beco i thiwiwec “Juk ma beco ni juruot,” m’ubed uwok iwi karathasi i gazeti Réveillez-vous ! man ma nwang’ere kawoni i kusika mwa mir Internet. Bende, video dupa ma nwang’ere i jw.org, copo konyo jurunyodo nitiyo ku juk pa Yehova pi niponjo awiya migi.b​—Rie. 2:4-6.

6. Wego moko uwinjere nenedi pi telowic ma ginwang’u ku min ot pare i dilo pa Yehova?

⁶ Jurunyodo dupa ginyutho foyofoc migi pi kony ma Yehova umiyo igi nikadhu kud i dilo pare. Wego moko ma nyinge Joe uyero kumae: “Nitungo awiya adek ung’ey lemandha utie ngo lembe ma yot. An ku min ot para, wakwayu nia Yehova ukonywa. Wang’ ma pol wabed wanwang’u nia thiwiwec ku video ma bewok, ubed utundo tap i saane pi nikonyowa wanyeg ku peko mwa. Sayu telowic pa Yehova ubedo ni ng’iyo mwa.” Joe ku min ot pare ginwang’u nia thiwiwec eno ku video, ubekonyo awiya migi nicoro ceng’ini ku Yehova.

7. Pirang’o pire tie tek nia jurunyodo gitim kero nibedo lapor ma ber ni awiya migi? (Jurumi 2:21)

⁷ Mir 2: Bed lapor ma ber. Awiya gineno jurunyodo migi cuu mandha man wang’ ma pol gilubo lapor migi. I andha, jaranyodo moko mbe ma kosa vuth ungo ire. (Rum. 3:23) Kadok kumeno de, jurunyodo ma riek gitimo kero migi ceke kara gibed lapor ma ber ni awiya migi. (Som Jurumi 2:21.) Wego moko uwacu kumae: “Awiya gibedo ve umvodu (eponj) ma cwiyo pii i iye.” Edok emedo kumae: “Gibiyero iwa tek gineno nia wabetimo tung’ ku lembe ma waponjo kogi.” Pieno tek wabemito awiya mwa umar Yehova, mito mer ma wamaru ko Yehova ubed tek man enen kamaleng’.

8-9. Lembe ma Andrew ku Emma giyero ubemiyo iri ponji ma kani?

⁸ Yo tie dupa ma jurunyodo gicopo ponjo ko awiya migi nimaru Yehova. Umego Andrew ma oro pare 17 uwacu kumae: “Jurunyodo para gibed giponja wang’ ma pol nia rwo tie gin ma pire tek. Nja uthieno, baba ubed urwo kuda kadok nang’ alar arwo i wang’e de. Jurunyodo para ubed upoyo wiya wang’ ma pol kumae: ‘Icopo weco i bang’ Yehova saa moko ci m’imaru.’ Lembe maeno ma giyero iwi rwo ubedo ku matoke ma lee i wiya, man kawoni awinjara ma ber kan aberwo i bang’ Yehova man anene ni Wego m’umara.” Jurunyodo, wung’ey nia mer ma wumaru ko Yehova copo konyo awiya mwu bende nimare.

⁹ Wakewec bende iwi lapor pa Emma. Kinde ma weggi uwekogi ku meggi, ewekogi ku banja lee m’ukwayu jucul. Emma uyero kumae: “Mama ubedo mbe ku sente pi kare ma lee, re saa ceke ebed eweco iwi kite ma Yehova dieng’ ko ku jurutic pare. Aneno andha nia mama uyiyo lembe maeno nikadhu kud i kit kwo pare. Mama ubed utiyo ku lembe m’eponja ko.” Eno ubemiyo ponji ma kani? Ponji utie nia, jurunyodo copo ponjo awiya migi kadok kud i kind peko.​—Gal. 6:9.

10. Jurunyodo mir Israel gibino ku kaka ma kani mi weco kud awiya migi? (Poi mi Cik 6:6, 7)

¹⁰ Mir 3: Bed iwec kud awiya peri thiri thiri. Con Yehova ung’olo ni Nyithindho mir Israel nia gibed giponj pire thiri thiri ni awiya migi. (Som Poi mi Cik 6:6, 7.) Jurunyodo maeno gibino ku kaka dupa kubang’ ceng’ mi weco kud awiya migi man mi pidho mer pa Yehova i adundegi. Ku lapor, nyathin ma co mir Israel copo konyo won pi saa ma lee, nipidho kodhi kunoke nikayu cam kud i podho. Nyamin ke romo konyo min ku kwoyo kunoke nicwiyo bongu, man ku tic mange mi pacu. Kinde ma jurunyodo gibetimo tic karacelo kud awiya migi, gicopo weco kugi iwi lembe dupa ma pigi tek. Gicopo weco iwi berocwiny pa Yehova man iwi ayi m’ebekonyo ko juruot migi.

11. Jurunyodo copo weco kud awiya migi saa ma kani?

¹¹ Tin kwo ukoc ku ma con. I ng’om mapol, ecopere ngo ni jurunyodo nibedo karacelo kud awiya migi kubang’ ceng’ i pacu, kum nwang’u gin’i tic, awiya ke n’i somo. Pieno, jurunyodo gicikiri nikoyo saa mange ma giwec ko kud awiya migi. (Efe. 5:15, 16; Filip. 1:10) Thier mi juruot utie acel m’i kind saa ma gicopo wecoko kugi. Umego moko m’aradu ma nyinge Alexander uyero kumae: “Baba bemaku yub thiri thiri pi nitimo thier mi juruot, man eyiyo ngo lembe moko ucerwa ku timo thierne. I ng’eye ke, waweco iwi lembe moko ci ma pigi tek.”

12. Jawiot ucikere nitimo lembang’o ketho thier mi juruot ubed ma nyang’ujo?

¹² Tek itie jawiot, icopo timo ang’o kara thier mwu mi juruot ubed ma nyang’u awiya peri? Nyo ecibedo ber ungo nia wuponj kugi buku mwa ma nyen Icopo kwo kud anyong’a rondo ku rondo!? Buku maeno bimiyo iwu kaka ma wuwec ko ma ber i kindwu. M’umbe jiji, ibemito awiya peri gikor kite ma giwinjiri ko man pidoic migi, pieno kud itii ku saa mi thier mi juruot pi nidhaw i wigi kunoke nitwinyogi. Bende, ng’eicwiny kud umeki tek awiya peri uyero lembe moko m’ukoc ku paru m’i Biblia. Ento bed ku foyofoc pilembe gikoro kite ma gibewinjiri ko, man mii amora i kumgi nia gibed gikor paru migi. Ibikonyo awiya peri ma ber kan ing’eyo kite ma gibewinjiri ko.

13. Jurunyodo copo tiyo ku yo mange ma kani pi nikonyo awiya migi ucor ceng’ini ku Yehova?

¹³ Jurunyodo, wusay kubang’ ceng’ yo ma copo ketho wukonyo awiya mwu ucor ceng’ini ku Yehova. Kud ikur saa ma wubeponjo kugi Biblia kadong’ iponjgi ku lembe iwi Mungu mwa ma jamer. Mego moko ma nyinge Lisa uyero kumae: “Watiyo ku giracwiya ceke m’udhokowa pi niponjo lembe iwi Yehova ni awiya mwa. Ku lapor, tek gwok mwa utimo lembe moko m’uketho awiya ung’iero, wayero igi nia eno ubenyutho nia Yehova utie Mungu ma jamutoro man ebemito wan de wabed jumutoro.”

14. Pirang’o pire tie tek nia jurunyodo gikony awiya migi ning’iyo jurimo ku rieko? (Lembrieko 13:20)

¹⁴ Mir 4: Kony awiya peri ginwang’ jurimo ma beco. Lembe pa Mungu unyutho kamaleng’ nia jurimbwa romo bedo ku matoke ma ber kunoke ma rac i wiwa. (Som Lembrieko 13:20.) Jurunyodo, nyo wung’eyo jurimb awiya mwu? Nyo wudaru rombo kugi man wubedo kugi pi saa moko de? Wucopo timo ang’o pi nikonyo awiya mwu kara ginwang’ jurimo i kind dhanu m’umaru Yehova? (1 Kor. 15:33) Wuromo konyogi ninwang’u jurimo ma beco nang’u wucuku lwong’o dhanu ma gitie ku winjiri ma ceng’ini ku Yehova nidikiri kudwu i lembe ma tung’ tung’.​—Zab. 119:63.

15. Jurunyodo copo timo ang’o kara gikony awiya migi ginwang’ jurimo ma beco?

¹⁵ Wego moko ma nyinge Tony ukoro lembe ma gitimo ku min ot pare pi nikonyo awiya migi kara ginwang’ jurimo ma beco. Eyero kumae: “Pi oro ma dupa, waku min ot para wabed walwong’o umego ku nyimego m’aradu ku m’uteng’ini ceke i bang’wa. Wacamu cam karacelo kugi man wadikara kugi i thier mwa mi juruot. Eno tie yo ma ber mandha ma jung’eyo ko dhanu m’umaru Yehova man m’ubetimo ire kud anyong’a. Wanwang’u kaka mi bedo karacelo i pacu mwa ku juliew mi twodiri, jumisioner, man jumange. Amora migi man tic ma tek ma gitimo ni Yehova ma gikoro pire, ukonyo awiya mwa nicoro ceng’ini ku Yehova.” Jurunyodo, wubed ku lembakeca mi konyo awiya mwu ginwang’ jurimo ma beco.

KUD IBAY GENOGEN!

16. Icopo timo ang’o ka nyathin peri uwacu nia emaru ngo nitimo ni Yehova?

¹⁶ Dong’ kan itimo kero peri ceke pi nikonyo awiya peri, re acel m’i kindgi uwacu nia emaru ngo nitimo ni Yehova ke? Kudi cwinyi utur nia dong’ lembe uvoyi. Wan ceke Yehova umiyo iwa bedagonya ma wang’ii ko wan giwa nitimo ire kunoke ungo; emiye kadok ni nyathin peri bende. Tek nyathin peri ung’iyo niweko Yehova, bed ku genogen nia ebidwogo nindo moko. Poy i kum lembabola pa nyathin m’urwinyo. (Luka 15:11-19, 22-24) Jalawobi maeno utimo lembe dupa ma reco, re tokcen ne elokere edwogo i bang’ won. Jumoko copo wacu nia “haa eno lembabola. Lembuno romo timere ngo i kwo pa ng’atini!” Nyo eno tie lemandha? Ungo. Aradu ma nyinge Elie unwang’ere ku lembuno.

17. Lembe ma Elie unwang’ere ko ubetielo cwinyi nenedi?

¹⁷ Elie ukoro pi jurunyodo pare kumae: “Gitimo kero niponja amar Yehova man Lembe pare Biblia. Ento kinde m’adoko aradu, ajai.” Elie ucaku timo lembe ma rac i aponda, man ekwero niwinjo juk mi jurunyodo pare. Kinde m’evaru kud i pacu, edok emondo amonda i timo ma reco. Re kadok kumeno de, ebed eweco ku jarimbe moko iwi lembe mi Biblia. Ekoro kumae: “Kinde m’abino weco pi Yehova ni jarimba, acaku paru bende pi Yehova. E nok nok, lemadha mi Biblia ma jurunyodo para gipidho i adundena ma nwang’u wiye uling’, ucaku dongo.” I ng’eye, Elie udwogo kendo i lemadha.c Kepar pir anyong’a ma jurunyodo pare gibino ko, pi kero ma gitimo pi niponje emar Yehova ma fodi e nyathin!​—2 Tim. 3:14, 15.

18. Ibewinjiri nenedi pi tic ma tek ma jurunyodo gibetimo pi niponjo awiya migi gimar Yehova?

¹⁸ Jurunyodo, wutie ku rwom ma dit mi tuko ngo, mi ponjo awiya mwu kara gidok jurutic pa Yehova. (Zab. 78:4-6) Eno tie lembe ma yot ungo, man wabedwoko iwu foyofoc lee pi tic ma tek ma wubetimo pi niponjo awiya mwu! Wung’ey nia tek wubemeduru nitimo kero mwu ceke pi nikonyo awiya mwu gimar Yehova man wubeponjogi kara gibed wor ire, anyong’a binego Wegwa mi polo lee i kumwu.​—Efe. 6:4.