Ker pa Mungu ubebimo!

1. Cwinywa tek i kum lembang’o man ke pirang’o?

KAN ibeneno lembe ma rac m’ubetimere i ng’om tin, ecopo bedo iri tek niyiyo nia nindo moko lembene biyikere. Mer m’udiko kind juruot ukwiyo. Dhanu udoko jurop nisagu, man ng’atuman ubedieng’ pire gire. Nibedo ku genogen iwi jutela utie lembe ma tek ni dhanu dupa. Re lembe maeno copo konyi nibedo ma cwinyi tek nia nindo moko lembe biyikere. Pirang’o? Pilembe dhanu ubetimo tap gin ma Biblia ular uyero nia bitimere i nindo mi “kajik ceng’.” (2 Tim. 3:1-5) Ng’atu moko mbe m’atira ma copo kwero pong’o mi lembila maeno, m’ubenyutho kamaleng’ nia Kristu Yesu ucaku bebimo iwi Ker pa Mungu. Re eno utie lembila acel kende kud i kind lembila dupa m’uweco iwi Ker pa Mungu. Nineno lembila mange m’upong’o i kind oro ma ceng’ini eni, bitielo yiyoyic mwa lee mandha.

2. Wabiweco iwi lembang’o i thiwiwec maeni man ke pirang’o? (Kekor cal m’i ng’eye.)

² I thiwiwec maeni, wabiweco iwi (1) lembila moko ma bikonyowa ninyang’ i saa ma Ker pa Mungu ucaku bimo i iye, (2) lembila moko m’ukonyowa ninyang’ nia Yesu udoko ubimo mi Ker pa Mungu i polo, man (3) lembila m’ubenyutho nia jubinyotho judegi pa Mungu. Calu ma jakwoy bongu diko theng bongu ma juthumo tung’ tung’ pi niwodho bongu ma zoo, lembila ma tung’ tung’ ma wabing’iyo igi de bikonyowa ninyang’ nia watie i saa ma kani nimakere ku kalandrie pa Yehova.

SAA MA KER PA MUNGU UCAKU BIMO I IYE

3. Lembila ma nwang’ere i Daniel 7:13, 14, ubetego cwinywa nenedi i kum Jabim mi Ker pa Mungu?

³ Lembila ma nwang’ere i Daniel 7:13, 14, ubetego cwinywa nia Kristu Yesu re m’utie Jabim ma ber mi Ker pa Mungu. Dhanu mi thek ceke ‘bitimo ire’ kud anyong’a man jabim mange mbe ma biwile ku wi Ker. Lembila mange mi buku pa Daniel ular uyero nia Yesu bicaku camu Ker i ajiki mi nindo abiro mi lembila. Nyo ecopere iwa ning’eyo nindo ma Yesu udoko Ubimo i iye?

4. Kekor kite ma Daniel 4:10-17 ubekonyo kowa ninwang’u oro ma Kristu udoko Ubimo i iye. (Nen korolembe mi there.)

⁴ Som Daniel 4:10-17. “Nindo abiro” ubenyutho oro elufu ario ku dak abic pier ario (2 520). Nindo maeno ucaku i oro 607 W.N.Y., kinde ma Jubabeli gikabu ubimo ma tokcen ku wi Ker pa Yehova i Yeruzalem. Ebin ethum ke i oro 1914 N.N.Y., kinde ma Yehova uketho Yesu, ma tie ng’atu m’utie ku twero mi bedo Ubimo, iwi Ker pare.b​—Eze. 21:25-27.

5. Lembila m’uweco iwi “nindo abiro” copo konyowa i yo acel ma kani?

⁵ Lembila eno ubekonyowa nenedi? Nyang’ i lembila m’uweco iwi “nindo abiro,” konyowa nibedo ma cwinywa tek nia Yehova bepong’o lembang’ola pare tap i saane. Calu ma Ker pare ucaku bimo tap i nindo m’eketho, ebiketho lembila mange ceke de upong’ i saa m’eketho. Andha ceng’ pa Yehova “bigalu ngo.”​—Hab. 2:3.

KITE MA WANG’EYO KO NIA YESU UDOKO UBIMO

6. (a) Lembang’o m’ubetimere iwi ng’om m’ubenyutho nia Yesu ubebimo i polo? (b) Lembila m’i Lembanyutha 6:2-8 udok uketho nwoc nenedi iwi lembenegi?

⁶ Kinde ma Yesu udhingo daru tic pare iwi ng’om, eweco iwi lembe moko ma bitimere iwi ng’om, ma bikonyo julub pare ning’eyo nia ecaku bebimo i polo. Kud i kind lembe m’eweco i wiyene moko ubino lwiny, ndru, man digidi. Eweco bende iwi thong’om ma bibedo nuti “i kabedo ma tung’ tung’,” calu ve thong’om mi Korona m’utimere ceng’ini eni. Eno gitie wagi lembe ma Biblia ulwong’o nia “giranyutha” mi bedonuti pa Kristu. (Mat. 24:3, 7; Luka 21:7, 10, 11) Oro ma kadhu 60 i ng’ey ma Yesu utho man edok i polo, enyutho ni jakwenda Yohana nia lembe maeno bitimere andha. (Som Lembanyutha 6:2-8.) Lembe maenogi ceke gitimiri niai ma Yesu udoko ubimo i oro 1914.

7. Pirang’o niai ma Yesu udoko Ubimo lembe ma rac utimere iwi ng’omi?

⁷ Dong’ pirang’o lembe ulund udoko rac magwei kinde ma Yesu udoko Ubimo? Lembanyutha 6:2 ukoro nia lembe ma kwong’a ma Yesu utimo kinde m’edoko Ubimo ubino nikiedo lwiny. I dhu ng’a? I dhu Wonabali ku pajogi pare. Nimakere ku Lembanyutha thek 12, lwiny uloyo Wonabali man jubaye, en ku pajogi pare iwi ng’om. Ng’eicwiny mi lembene uketho Sitani uloko kwinyo pare iwi kodhidhanu, man lembene ukelo “can ni ng’om.”​—Nyu. 12:7-12.

8. Ka wabeneno lembila m’ugwaku kum Ker pa Mungu ubepong’o, lembene konyowa nenedi?

⁸ Lembila eno ubekonyowa nenedi? Lembe m’ubetimere i ng’om, man pidoic ku timo mi dhanu m’udoko rac, copo konyowa ninyang’ nia Yesu udoko Ubimo. Pieno, kakare nimaku ng’eicwiny pi lembe wabeneno dhanu ubedieng’ pigi gigi man gi jurop, mito wapoy nia timo migine ubepong’o lembila mi Biblia. Ker pa Mungu dong’ ucaku bebimo! (Zab. 37:1) Bende, mito wang’ey nia calu ma dong’ Armagedon ni ceng’ini ma gwei, lembe ma rac mi ng’om bimedere ameda. (Mark. 13:8; 2 Tim. 3:13) Wabedwoko foyofoc lee ni Wegwa m’i polo ma jamer, pi kum eketho wanyang’ pi lembe ma rac m’ubetimere i ng’om tin.

KITE MA JUBINYOTHO KO JUDEDI PA MUNGU

9. Lembila m’ugorere i Daniel 2:28, 31-35, unyutho nenedi pi bimobim ma tokcen mi ng’om zoo, man ecaku bimo ke awene?

⁹ Som Daniel 2:28, 31-35. Wabeneno lembila maeno ubepong’o i rundi mwa eni. Lek pa Nebukadnezar uweco pi gin ma bitimere “i acoka nindo,” i ng’ey ma Kristu ucaku bebimo. Judegi pa Yesu iwi ng’om bibedo bende bimobim ma dit mi ng’om zoo ma Biblia ular uweco pire, ma junyuthe ku “tielo ma gi mi nyunyu kud ulobo.” Bimobim ma dit maeno dong’ ubebimo. Bimobimne ucaku bimo i saa mi lwiny ma kwong’a mi ng’om zoo, kinde ma ker mi Grande-Bretagne ku mir États-Unis gidikiri i acel pi nidoko ker ma dit mir Angleterre kud Amerika. Ayi gin m’acwiya ma Nebukadnezar uneno i lek pare unyutho bende pi lembe moko ario iwi bimobimne m’uketho ekoc ku bimobim mange m’ular ubino i wang’e.

10. (a) Lembila ma Daniel uewo pire ubenen nenedi tin i ker mir Angleterre kud Amerika? (b) Wacikara nikoc i kum ariti ma kani? (Nen sanduku “Bed ku weng’i i kum ulobo!”)

¹⁰ Mi kwong’o, tung’ ku bimobim ma juweco pigi i ginmawokiwang’, juporo ngo dikiri mi ker mir Angleterre kud Amerika ku cuma ma tek, calu ve mola ma kwar kunoke ma tar, ento jupore ku cuma m’ujebere kud ulobo. Ulobo ubenyutho ‘kodhidhanu’ kunoke lwak dhanu. (Dan. 2:43) Calu m’ubenen kamaleng’ i nindo ma tin, atelatela mi dhanu i lembe mi bolo kwir, twero migi, nyutho cwircwiny migi man dikiri migi, uketho etie tek ni jutela mi ker maeno nitimo lembe ma nwang’u gimito gitim.

11. Bimobim mi ker mir Angleterre kud Amerika ubetego cwinywa nenedi nia wabekwo i nindo ma tokcen mir ajiki?

¹¹ Mir ario, calu ma tiend ayi gin m’acwiya ubenyutho, Angleterre kud Amerika utie ker ma tokcen ma dit mi ng’om zoo ma jular juewo pire i Biblia. Ker mi dhanu mange mbe ma bidok wok i ng’eye. Ento ajiki pare bibedo i Armagedon, kinde ma Ker pa Mungu binyothe ku ker mange ceke mi dhanu.c​—Nyu. 16:13, 14, 16; 19:19, 20.

12. Lembila pa Daniel ubekonyowa ninyang’ i kum lembang’o mange m’ubemiyo iwa jukocwiny man genogeni?

¹² Lembila eno ubekonyowa nenedi? Lembila pa Daniel ubekonyowa ninyang’ i kum lembe mange m’unyutho kamaleng’ nia wabekwo i nindo mi kajik ceng’. Oro ma kadhu 2 500 udaru kadhu, Daniel ular uewo nia i ng’ey ker mi Babeli, bimobim mange ang’wen ma dongo bibedo ku tego iwi dhanu pa Mungu. M’umedo maeno, enyutho nia ker ma dit mir Angleterre kud Amerika bibedo kerne ma tokcen. Lembuno ubemiyo iwa jukocwiny man genogen nia ceng’ini eni Ker pa Mungu biweyo bimobim mi dhanu ceke ku wi ng’om, man en re m’ebibimo wi ng’om zoo.​—Dan. 2:44.

13. “Ubimo mir abora” ku “jubim apar” ma juweco pigi i Lembanyutha 17:9-12, ubenyutho ang’o, man lembilane ke upong’o nenedi?

¹³ Som Lembanyutha 17:9-12. Nyoth m’utimere i saa mi lwiny ma kwong’a mi ng’om zoo, upong’o lembila mange mi Biblia m’uweco pi kajik ceng’. Jutela mi ng’om gimito gikel akwiyacwiny iwi ng’om. Pieno i dwi mi 1, oro 1920, giketho the Dilo mi thek, ma i ng’eye Dikiri mi thek (ONU) udok uwok kakare i dwi mir 10, oro 1945. Dikiri maeno julwong’e nia “ubimo mir abora.” Re etie ngo bimobim mi ng’om zoo. Etie ku tego pilembe gavmenti ma tung’ tung’ re m’ubemiyo ire kero. Biblia ulwong’o gavmentinegi nia “jubim apar.”

14-15. (a) Lembanyutha 17:3-5 uyero lembang’o pi “Babeli ma dit”? (b) Dhanu dupa mi dini mi vupo gibetimo ang’o?

¹⁴ Som Lembanyutha 17:3-5. I ginmawokiwang’ m’uai i bang’ Mungu, jakwenda Yohana uneno dhaku moko ma won asara, niwacu “Babeli ma dit” m’ubenyutho dini ceke mi vupo. Lembe m’enenone upong’o nenedi? Dilo mi dini mi vupo ucaku dikere niai con ku bimobim mi ng’om maeni. Ento ceng’ini eni Yehova biketho i adunde bimobim maeno nia “gitim paru pare.” Lembene bimiyo adwogi ma kani? Bimobimnegi, niwacu “jubim apar” gibilokiri i kum dini ceke mi vupo man gibinyothogi.​—Nyu. 17:1, 2, 16, 17.

¹⁵ Wang’eyo nenedi nia ajiki mi Babeli ma dit dong’ ni ceng’ini? Pi ninwang’u wang’ penji eno, mito walar wapoy nia kud i kind piny m’ubed ugwoko adhura mi Babeli con, moko ubino kulo ma dit mir Efrath. Buku mi Lembanyutha uporo dhanu milioni dupa ma gidiko cing’gi ku Babeli ma dit ku “pii” m’ubegwoke. (Nyu. 17:15) Re eyero bende nia piige ‘bithwo kaw’ pi ninyutho nia dhanu dupa bilal kud i dini mi vupo. (Nyu. 16:12) Lembila maeno ubepong’o, pilembe tin dhanu dupa giweko dini mi vupo man gibesayu kony kaka mange pi nidaru peko migi.

16. Nyang’ mwa iwi lembila m’uweco iwi Dikiri mi thek man iwi nyoth mi Babeli ma dit ubemiyo iwa kony ma kani?

¹⁶ Lembila eno ubekonyowa nenedi? Caku the Dikiri mi thek man dhanu dupa m’ubeweko nidiko cing’gi i kum dini mi vupo, ubenyutho kamaleng’ nia wabekwo i nindo mi kajik ceng’. Kadok pii mi lapor mi Babeli ma dit m’ubegwoke ubedwono de, re eno tie ngo gin ma binyothe. Calu ma wayero, Yehova biketho i adunde “jubim apar,” niwacu bimobim ma gibediko cing’gi ku Dikiri mi thek kara “gitim paru pare.” Dikiri mi thek eno bikelo nyoth rek iwi dini mi vupo, man lembene biwang’u i dhanu lee mandha.d (Nyu. 18:8-10) Nyoth mi Babeli ma dit biyengo ng’om man lembene saa moko bimiyo peko, ento dhanu pa Mungu gibibedo kud anyong’a pi thelembe ario. Dini mi vupo m’ucaku bedo jadegi pa Mungu niai con bibedo nuti kendo ngo, man pio pio i ng’eye wabinwang’u gony kud i ng’om maeni ma rac!​—Luka 21:28.

CWINYI BED TEK NIA YEHOVA BIGWOKO DHANU PARE I NINDO M’UBINO

17-18. (a) Wacopo medara nidwoko yiyoyic mwa ubed tek nenedi? (b) Wabiweco iwi lembang’o i thiwiwec m’ulubo?

¹⁷ Daniel ular uewo nia “ng’eyong’ec [mandha] bimedre.” De andha emedere! Kawoni wabenyang’ i lembila m’uweco pi rundi mwa. (Dan. 12:4, 9, 10) Ng’eyong’ec ma tap mi lembila maeno ubemedo woro ma wabenyutho ni Yehova, man i kum Lembe pare. (Isa. 46:10; 55:11) Pieno, mediri niponjo Lembagora aketha cwinyi kara yiyoyic peri ubed tek, man kony jumange de gibed ku winjiri mandha ku Yehova. Ebigwoko dhanu ceke m’ugene ku cwinygi zoo man ebimiyo igi ‘kwiocwiny ma cu.’​—Isa. 26:3.

¹⁸ I thiwiwec m’ulubo, wabiweco akeca iwi lembila m’uweco iwi cokiri mi Jukristu mi rundi mi kajik ceng’. Calu ma wabineno, lembila maeno gibenyutho kamaleng’ nia wabekwo i nindo mir ajiki. Wabineno bende gin m’unyutho andha nia Yesu ma tie Rwoth mwa ma dong’ ubebimo, ubetelo wi julub pare ma gibegwoko bedoleng’ migi.