Penji Mi Jusom
I Zaburi 61:8 Daudi uwacu nia ebipaku nying’ Mungu “mi nja.” Nyo eno ebino paru nia ebitho ngo?
Ungo. Gin m’ekiewo utie lamandha.
Wakenen lembe m’ekiewo i giragora maeno man i mange m’urombo kude. Ekiewo kumae: “Kum kumeno abiwero pak ni nyingi mi nja, kara atim lembang’ola para ku ba ceng’.” “Abipeki, E Rwoth Mungu para, kud adundena ceke; man abiyungo nyingi mi nja.” “Abimio mugisa ni nyingi nja ku nja.”—Zab. 61:8; 86:12; 145:1, 2.
Kinde ma Daudi ubino kiewo lembuno, ebino paru ngo nia ya ebitho ngo. Daudi ung’eyo nia Yehova ugam ung’olo nia dhanu bitho pilembe gidubo, man en e Daudi de eyiyo nia e jadubo. (Tha. 3:3, 17-19; Zab. 51:4, 5) Eng’eyo nia kadok weg yiyoyic ma calu ve Abraham, Isak, man Yakobo de githo. Eng’eyo bende nia en de ebitho. (Zab. 37:25; 39:4) Ento wec m’ekiewo i Zaburi 61:8 ubenyutho ava m’ebino ko man lembakeca pare mi paku Mungu nja ku nja i nindo ceke mi kwo pare.—2 Sam. 7:12.
Calu ma thiwi giragora mi Zaburi 18, 51, ku mi 52 uyero, lembe moko ma Daudi ukiewo utie lembe m’enwang’ere ko en i kwo pare. I Zaburi 23, calu Daudi ubino jakwac, ekiewo nia Yehova tie jakwac m’ubetelo wiye, m’ubemiyo ire yom, man m’ubegwoke. Lembuno uketho emito etim ni Mungu ‘i nindo mi camung’om pare ceke.’—Zab. 23:6.
Poy nia lembe ceke ma Daudi ukiewo, Yehova re m’utelo wiye. Lembene moko utie lembila ma bidotimere bor i ng’eye. Ku lapor, i Zaburi 110, Daudi ukiewo pi saa ma Rwoth pare ‘bijany yo ku cing’ [Mungu] ma yor acwic” i polo man ebinwang’u dito ma dwong’. Dito mi timo ang’o? Mi bimo wi judegine man mi ‘poko lembe i kind thek’ iwi ng’om. Daudi ubino kwaru Masiya, ma tie ng’atu ma bibimo kud i polo man ma bibedo “jalam mi nja.” (Zab. 110:1-6) Yesu unyutho nia lembila m’i Zaburi 110 uweco pire man nia ebipong’o i nindo ma bibino.—Mat. 22:41-45.
Lembe ma Yehova uketho Daudi ukiewo, utie pi lembe m’utimere i rundi pare man ma bitimere kinde m’ebicer, saa m’ebipaku iye Yehova rondo ku rondo. Eno ubekonyowa ninyang’ nia Zaburi 37:10, 11, 29 ugam upong’o i rundi ma con mi nyithindho mir Israel man ebipong’o bende i nindo m’ubino iwi ng’om zoo, kinde ma Mungu bipong’o lembang’ola pare.—Nen udukuwec mir 8 mi thiwiwec “Wabibedo wakudi i Paradizo” i gazeti maeni.
Pieno Zaburi 61:8 ku giragora mange m’urombo kude, ubenyutho nia Daudi ugam umito epak Yehova con i Israel nitundo i tho pare. Gibenyutho bende lembe ma Daudi bibedo ku copo mi timo i nindo m’ubino kinde ma Yehova bicere.