Penji mi jusom
Kinde ma Yesu ucaku the Cemo mir uthieno pa Rwoth, julub 70 m’egam eoro i tic mi lembanyong’a ca gibino kani? Nyo nwang’u giweke?
Mito ngo wapar nia pilembe julub 70 ubino mbe ku Yesu kinde m’ecaku the Cemo mir uthieno pa Rwoth ci, ya nwang’u dong’ giweke kunoke ya giromo ngo nibedo julub pare. Gin ma Yesu ubino ku yenyne saa maeno, tie kende kende nibedo karacelo ku jukwenda pare.
Jukwenda 12 ku julub 70, ceke Yesu re m’ung’iyogi. Yesu ung’iyo julub 12 kud i kind julub maeno man elwong’ogi jukwenda. (Luka 6:12-16) Ebino i Galilaya kinde ‘m’elwong’o juapar ario’ man “eorogi gicidh girwey pi Ker pa Mungu man gikey kum jurutwoyo.” (Luka 9:1-6) I ng’eye kinde m’ebino i Yudea ‘eng’iyo jumange pier abiro man eorogi ario ario.’ (Luka 9:51; 10:1) Ubenen kamaleng’ nia Yesu ubino ku julub pare i kabedo ma tung’ tung’, kaka ma gibed girweyo rwonglembe pare i iye.
Juyahudi m’udoko julub pa Yesu gibed gimediri asu nitimo Kadhukuwijo kubang’ oro, copere gibed gitime karacelo ku juruot migi. (Ai 12:6-11, 17-20) Nyanok i wang’ tho pa Yesu, Yesu ku jukwenda pare gicidho i Yeruzalem. Re kuca ewok ecoko ngo dhu julub pare zoo, niwacu ju mi Yudea, mi Galilaya, man mi Perea pi nitimo Kadhukuwijo. I andha, pi kare maeno, ebino ku yeny mi bedo ku jukwenda pare kende. Eyero igi kumae: “Abedo kud ava ma lee mi camu Kadhukuwijo maeni karacelo kudwu i wang’ masendi para.”—Luka 22:15.
Yesu ubino ku yeny migi dhe, pikum nwang’u dong’ edhingo tho calu ‘nyathi rombo pa Mungu m’ubecikabu dubo mi ng’om.’ (Yoh. 1:29) Lembuno ucikere nitimere i Yeruzalem, kaka ma jubed juthiero iye lam ni Mungu niai con. Tho pa Yesu bimiyo gony ma dit nisagu ma nyithindho mir Israel ginwang’u nikum nyathi rombo ma gicamu i uthieno m’i wang’ nindo ma giwok i iye kud i Misiri. (1 Kor. 5:7, 8) Gin ma Yesu utimo biketho jukwenda apar ario bidoko ni kathere mi cokiri mi Jukristu. (Efe. 2:20-22) Poy nia Yeruzalem ma leng’ de ubino ku “kidi apar ario (12) mi kathere” ma “jukiewo nying’ apar ario mi jukwenda apar ario pa Nyathi rombo i wigi.” (Nyu. 21:10-14) M’umbe jiji, jukwenda eno ma gigwoko bedoleng’ migi gibino ku rwom ma lee mandha i pong’o mi lembakeca pa Mungu. Eno uketho wabenyang’ nia pirang’o Yesu umito gibed karacelo kude i Kadhukuwinjo ma tokcen, man i lembe m’edok etimo yor i ng’eye, niwacu Cemo mir uthieno pa Rwoth.
Julub 70 ku julu mange gibino mbe karacelo ku Yesu. Re tek gin ceke gigwoko bedoleng’ migi, e gibinwang’u bero i Cemo mir uthieno ma Yesu ucaku there. Bende, Jukristu mange ceke ma jubidok wirogi ku tipo yor i ng’eye, de gibimondo i lembariba mi ker ma Yesu uweco pire ni jukwenda pare i uthieno ma cing’ nica.—Luka 22:29, 30.