Keth wii i kum lapor mi cimowang’

1. Pokolembe ma kani ma bikadhu ceng’ini eni?

WABEKWO i nindo ma tokcen! Ceng’ini eni Yesu bipoko lembe iwi dhanu ceke ma kwo. Yesu ukoro pi “giranyutha” ma bicwalujo i nindo maeno ni julubne, “giranyutha mi bedonuti” pare ma nen ungo, man mi ‘kajik mi ng’om.’ (Mat. 24:3) Jukiewo pi giranyuthanegi i Matayo thek 24 ku 25, man i Marko thek 13 man bende i Luka thek 21.

2. Wabiponjo lembang’o i thiwiwec maeni, man wabinwang’u ponji ma kani i kum lembenegi?

² Yesu utiyo ku lapor moko adek pi nimiyo cimowang’. Gitie lapor mi lembabola mi rombe ku diegi, mi jumanyir ma sumba ma riek ku ma jukusegu, man mi talanto. Laporne bikonyowa ninyang’ nia gin ma ng’atuman ubetimo bibedo kud adwogine i wiye i saa mi pokolembe. Kinde ma wabeng’iyo i laporneman, woth beneno ponji ma wacopo nwang’u i iye man kite ma wacopo tiyo ko kugi. Wek wacak ku ma kwong’a: Rombe ku diegi.

ROMBE KU DIEGI

3. Yesu bipoko lembe mi dhanu awene?

³ Pokolembe ma Yesu uweco pire i lapor mi rombe ku diegi, utie pi dhanu ma ginwang’u kaka mi jolo lembanyong’a man mi diko cing’gi i kum umego pare ma juwiro. (Mat. 25:31-46) Pokolembene bikadhu i thum mi “masendi ma dit,” nyanok i wang’ lwiny mi Armagedon. (Mat. 24:21) Tap calu ma jakwac poko kind rombe ku diegi, Yesu de bipoko kind dhanu ma gibediko cing’ ku gwoko bedoleng’ i kum julub pare ma juwiro ku tipo, ku ju ma gibediko ngo.

4. Nimakere kud Isaya 11:3, 4, pirang’o cwinywa tek nia Yesu bipoko lembe mi dhanu ku bedopwe? (Nen bende cal .)

⁴ Lembila mi Biblia unyutho nia Yesu ng’atu Yehova ung’iyo ubed japoklembe, bipoko lembe mi dhanu pwe man atira. (Som Isaya 11:3, 4.) Ebeneno timo, pidoic man wec mi dhanu, uketho i iye gin ma gibetimo ni umego pare ma juwiro ku tipo. (Mat. 12:36, 37; 25:40) Ebing’eyo nia ng’a m’ubediko cinge kud umego pare ma juwiro man i kum tic migi.a Yo ma kwong’a ma ng’atu m’ubedo calu rombe diko iye cinge i kum umego pa Kristu utie nikadhu kud i tic mi rweyo lembanyong’a. Jubikwanu ju m’ubediko cing’gi kugi ni “weg bedopwe” man gibinwang’u kaka mi ‘kwo rondo ku rondo’ iwi ng’om. (Mat. 25:46; Nyu. 7:16, 17) Eno mugisa ma yawe nuti? Tek gigwoko bedoleng’ migi i saa mi masendi ma dit man i ng’eye bende, e nying’gi bibedo asu akiewa “i buku mi kwo.”—Nyu. 20:15.

5. Lapor mi rombe ku diegi ubemiyo ponji ma kani, man lembene umulo kum jukani mange?

⁵ Gwok bedoleng’ peri. Lapor pa Yesu m’uweco iwi rombe ku diegi, ugwaku asagane kum ju m’utie ku genogen mi kwo iwi ng’om. Dhanu eni gibenyutho ngo kende kende yiyoyic migi nikadhu kud i tic mi lembanyong’a pi nidiko cing’gi kud umego pa Kristu, ento bende gibejolo telowic mir udul ma nok maeno ma Yesu ung’iyo. (Mat. 24:45) Re, ju ma gitie ku genogen mi cikwo i polo de gicikiri niketho wigi i kum lapor mi cimowang’ maeno. Pirang’o? Pi kum Yesu uketho wang’e i kum timo, pidoic man i kum wec migi bende. Gin de gicikiri nigwoko bedoleng’ migi. Lapor mange ario ma Yesu umiyo, ulund uweco athothi pigi; ginwang’iri i Matayo thek 25, m’uweco iwi jumanyir ma sumba ma riek ku ma jukusegu. Wakenenugi.

JUMANYIR MA SUMBA MA RIEK KU MA JUKUSEGU

6. Ju manyir ma sumba abic ginyutho nenedi nia giriek? (Matayo 25:6-10)

⁶ I lapor mi jumanyir ma sumba, Yesu uweco pi jumanyir apar m’uwok pi nicirombo ku cwar mugole. (Mat. 25:1-4) Gin ceke gibino ku genogen mi bedo karacelo ku cwar mugole i agba mi foc. Yesu ukoro nia abic m’i kindgi ubino “riek” ento abic ma kucelo re ubino “jukusegu.” Ju m’ubino riek giyikiri cuu man gibedo ma gibekiyo. Gibino ayika nikuro cwar mugole pi kare m’ulwar, kadok nitundo i diewor ma ling’. Gibino ku thala migi kara uliel i saa mi mudho. Gibino kadok ku moo mange pi nikonyogi, kum saa moko cwar mugole copo galu. Eyo, gibino ayika; gitimo lembe ceke m’ukwayere kara thala migi umedere niliel. (Som Matayo 25:6-10.) Kinde ma cwar mugole utundo, jumanyir ma sumba ma riek gimondo karacelo kude i foc mi nyom. I ayi ma rom eno, Jukristu ma juwiro ku tipo de bibedo ayika nimondo karacelo ku Yesu cwar mugole i Ker mi polo, kende kende nwang’u gitie ayika ma gibekiyo man gibegwoko bedoleng’ migi nitundo i bino pa Kristu.b (Nyu. 7:1-3) E ka dong’ jumanyirne ma jukusegu ca ke, lembe migi nenedi?

7. Ang’o m’unwang’u jumanyir ma sumba abic ma jukusegu, man ke pirang’o?

⁷ Tung’ ku jumanyir ma sumba ma riek, jumanyir abic ma jukusegu gibino ngo ayika. Mac mi thala migi nwang’u dong’ ubecitho, man moo mange ma gikanu de ubino mbe. Saa ma giwinjo nia cwar mugole udhingo tundo, ka dong’ giai nicing’iewo moo. Kinde ma cwar mugole utundo, nwang’u fodi giloko ngo. Saa maeno, “jumanyir ma sumba ma gibino ayika gimondo kude i foc mi nyom, man juciko dhugola.” (Mat. 25:10) I ng’eye kinde jumanyir ma jukusegu gidwogo kara gimondi, cwar mugole uwacu igi kumae: “Ang’eyowu ngo.” (Mat. 25:11, 12) Jumanyir maeno giyikiri ngo pi nikuro cwar mugole i kadhiri m’ubino kwayere. Lembuno ubemiyo ponji ma kani ni Jukristu ma juwiro?

8-9. Jukristu ma juwiro ku tipo copo nwang’u ponji ma kani i kum lapor mi jumanyir ma sumba? (Nen bende cal.)

⁸ Bed ayika man m’ibekiyo. Yesu uwacu ngo nia ungu mi Jukristu ma juwiro ku tipo bibedo ario, ma nia acel bibedo ayika nikuro cil i ajiki mi mg’om maeni, ma kucelo ke ya ungo. Ento ekoro pi gin ma binwang’u Jukristu ma juwiro ku tipo, tek gibedo ngo ayika niciro ku gwoko bedoleng’ nitundo i ajiki. Ka gibedo ngo ayika, gibinwang’u ngo sukulia migi. (Yoh. 14:3, 4) Eno lembe mi tuko? Kadok watie ku genogen mi cikwo i polo kunoke iwi ng’om, wan ceke wacikara niketho wiwa cuu i kum lapor mi cimowang’ mi jumanyir masumba. Ng’atuman m’i kindwa ucikere nikiyo m’ebed ko ayika niciro cil i ajiki.—Mat. 24:13.

⁹ I ng’ey miyo lapor mi jumanyir ma sumba pi niketho nwoc iwi bedo ayika man nikiyo, Yesu udok umiyo lapor mange mi talanto, m’uketho nwoc iwi timo tic ku tego.

TALANTO

10. Jutic ario ginyuthiri nenedi nia gi jutic ma jugeno? (Matayo 25:19-23)

¹⁰ I lapor mi talanto, Yesu uweco iwi jutic ario ma ginyuthiri nia gitie jutic ma jugeno, acel mange ke ma jugeno ngo. (Mat. 25:14-18) Jutic ario gitimo tic ma tek pi ninyayu lim pa rwoth migi. I wang’ nicidho i woth ma bor, rwoth migi ular umiyo igi talanto ma tie wend sente ma lee. Gitimo tic ku kero man gitiyo ku sentene ku rieko. Nyo sentene unyay? Eyo. Kinde ma rwoth migi udwogo, unwang’ere nia ginyayu sente m’emiyo igi wang’ ario. Rwoth migi ufoyogi man gimondo ‘i mutoro pare.’ (Som Matayo 25:19-23.) Kadong’ jatic mir adege ke? Etimo ang’o ku sente ma rwoth pare umiyo ire?

11. Lambang’o m’unwang’u jatic ma “janyap,” man ke pirang’o?

¹¹ Jatic mir adege unwang’u talanto acel, re ebino “janyap.” Rwoth pare ugeno nia ebitiyo ma ber ku talanto. Re elund ekunye akunya i ng’om. Kinde ma rwoth pare udwogo, edwoko sente i bang’e m’umbe faida. Jatic eno ubino ngo ku pidoic ma cuu. Kakare nikwayu kisa nia nyayu sente pa rwoth pare uvoye, elund eyero ku dhoge ma rac nia rwoth pare tie ‘ng’atu ma lembe pare iye tek.’ Jatic eni unwang’u ngo bero i wang’ rwoth pare. M’usagu zoo, jumaye ku talanto man jurieme cen.—Mat. 25:24, 26-30.

12. Jutic ario ma jugeno ubenyutho jukani?

¹² Jutic ario ma jugeno ubenyutho Jukristu ma juwiro ku tipo ma gigwoko bedong’ migi. Rwoth Yesu ubelwong’ogi ‘gimond i mutoro pare,’ man ginwang’ sukulia migi i polo, ma en e cer ma kwong’a. (Mat. 25:21, 23; Nyu. 20:5b) I thenge ma kucelo, lapor pa jatic ma janyap ubemiyo bende cimowang’ ni Jukristu ma juwiro. Nenedi?

13-14. Lapor mi talanto ubemiyo ponji ma kani ni Jukristu ma juwiro? (Nen bende cal.)

¹³ Tim tic ku tego man kud amora. I lapor mi talanto man mi jumanyir ma sumba, Yesu uyero ngo nia Jukristu ma juwiro gibidoko junyap. Re, ekoro kende kende lembe ma binwang’ugi tek giweko amora migi ukwiyo. Tek amora migi ukwiyo, ‘lwong’o ma julwong’o kogi man ng’ic ma jung’iyo kogi’ bibedo ngo “kubang’e” man jubiyiyo ngo gimond i Ker mi polo.—2 Pet. 1:10.

¹⁴ Lapor mi jumanyir ma sumba ku mi talanto, ubenyutho kamaleng’ nia Jukristu ceke ma juwiro gicikiri nibedo ayika man ma gibekiyo. Gicikiri bende nitimo tic ku tego man kud amora. Nyo lembe mange de nuti ma Yesu uyero m’ubemiyo igi cimowang’? Eyo! Pokolembe ma tokcen ma Yesu uweco pire i Matayo 24:40, 41 de ugwaku kumgi.

“JUBITING’O” NG’A?

15-16. Matayo 24:40, 41 ubenyutho nenedi nia Jukristu ma juwiro gicikiri nibedo ma gibekiyo?

¹⁵ I wang’ niweco iwi lapor adek ma waai waneno, Yesu ular uweco pi pokolembe ma tokcen mi Jukristu ma juwiro m’uweco pi ng’atu ma biboth. Eweco pi jumaco ario m’utimo tic karacelo man jumanon m’uberego rego. Ubenen nia juman ubetimo tic karacelo, re Yesu uwacu nia “jubiting’o ng’atu acel, ma kucelo ke jubiweko.” (Som Matayo 24:40, 41.) I ng’eye edok emiyo cimowang’ ma e ni julubne: “Wubed ma wubekiyo, kum wung’eyo ngo nindo ma Rwoth mwu ubebino i iye.” (Mat. 24:42) Yesu umiyo cimowang’ marom eno kinde m’eweco iwi lapor mi jumanyir ma sumba. (Mat. 25:13) Nyo winjiri nuti i kind cimowang’ ario eno? Eyo, ubeyenyo nen. Jakristu ma juwiro m’ugwoko bedoleng’ pare kende re ma “jubiting’o,” niwacu ma Yesu bijolo i Ker mi polo.—Yoh. 14:3.

¹⁶ Bed m’ibekiyo. Tek Jakristu ma juwiro ku tipo ubemedere ngo nibedo ku wang’e i thenge mi tipo, kakare bibedo mbe i kind ju “ma jung’iyo.” (Mat. 24:31) Re wec ma Yesu uyero utie cimowang’ ni Jukristu ceke, kadok m’utie ku genogen mi cikwo i polo kunoke ngo; kum ng’atuman ucikere nigwoko bedoleng’ pare man nikiyo.

17. Tek Yehova ung’iyo nia ewir ng’atu moko ku tipo pare i rundi mwa tin, pirang’o lembene ucikere ngo nidieng’o cwinywa?

¹⁷ Wang’eyo Yehova cuu man wayiyo bende nia lembe ceke m’etimo utie atira. Pieno, cwinywa kud udieng’ tek ewiro ng’atu moko ku tipo pare i rundi mwa tin.c Poy i kum lapor ma Yesu umiyo iwi podho ulok, m’uweco pi jurutic m’utundo i kum saa 11 mi reto. (Mat. 20:1-16) Ju ma tokcen ma julwong’o ubin utim tic, i mwony pa ceng’ ceke ginwang’u cul ma rom ku ju m’ular ucaku tic kugweno. Kumeno bende, kadok nwang’u Yehova uwiro Jukristu moko i saa ma kani de, gibinwang’u sukulia migi i polo kende kende nwang’u gigwoko bedoleng’ migi.

KETH WII I KUM CIMOWANG’

18-19. Ponji man cimowang’ ma kani ma waweco i wigi?

¹⁸ Waponjo lembang’o? Ni ju m’utie ku genogen mi kwo iwi ng’om, waponjo nia lapor mi rombe ku mi diegi uketho nwoc iwi gwoko bedoleng’ migi ni Yehova niai kawoni man i saa mi masendi ma dit m’ubebino. I ajiki mi saa maeno, Yesu bipoko lembe mi ju m’ugwoko gwoko bedoleng’ migi nia giromo nimondo “i kwo ma rondo ku rondo.”—Mat. 25:46.

¹⁹ Waneno bende lapor ario m’umiyo cimowang’ ni Jukristu ma juwiro ku tipo. I lapor ma Yesu umiyo m’uweco iwi jumanyir ma sumba, abic m’i kindgi ubino riek, niwacu gikiyo man gibedo ayika nikuro cwar mugole i kadhiri m’ukwayere. Ento abic ma jukusegu giyikiri ngo, uketho cwar mugole ukwerogi nimondo i foc mi nyom. Wan de wacikara nibedo ayika nikuro i kadhiri m’ukwayere, nitundo ma Yesu bikelo ko nyoth iwi ng’om ma rac maeni. Bende, i lapor mi talanto, waweco iwi jutic ario ma jugeno ma gitimo tic ku tego man kud amora. Gitimo kero ginyayu lim pa rwoth migi man ginwang’u bero i wang’e. Ento jaticne ma janyap juriemo cen. Ponji ma wacopo nwang’u: Wacikara nitimo ni Yehova ku tego mwa ceke, ke nitundo i ajiki. Tokcenne, waneno nia Jukristu ma juwiro gicikiri nimediri nikiyo kara Yesu ‘uting’gi’ pi ninwang’u sukulia migi mi kwo i polo. Gibekuro kud ava ‘cok ma jubicoko kogi karacelo’ ku Yesu i polo. I ng’ey lwiny mi Armagedon, gibibedo mugele pa Yesu i nyom pa nyathi rombo.—2 Thes. 2:1; Nyu. 19:9.

20. Yehova bitimo ang’o ni dhanu ma giketho wigi cuu i kum lapor mi cimowang’?

²⁰ Wambe ku thelembe mi bedo ku lworo i kum pokolembe m’udhingo ceng’ini eni. Tek andha wagwoko bedoleng’ mwa, Wegwa m’i polo ma jamer bimiyo iwa “tego m’usagu ceke” kara ‘wacung i wang’ Wod dhanu.’ (2 Kor. 4:7; Luka 21:36) Dok nwang’u watie ku genogen mi cikwo i polo kunoke iwi ng’om, wabinyayu anyong’a i Wegwa, ndhu nwang’u wabeketho wiwa i kum lapor mi cimowang’ ma Yesu umiyo, man nikum bero ma yawe mbe pa Yehova, ‘jubinwang’u nyingwa ugorere i kitabu’ mi kwo.—Dan. 12:1; Nyu. 3:5.