THIWIWEC MIR 19
WER 6 Polo ubenyutho dwong’ pa Mungu
Lub lapor mi jumalaika ma gigwoko bedoleng’ migi
“Wupak Yehova wu malaika pare ceke.”—ZAB. 103:20.
I ADUNDO
Wabineno ponji ma wacopo nwang’u i lapor mi jumalaika ma gigwoko bedoleng’ migi ni Yehova.
1-2. (a) Ang’o m’ukoc i kindwa ku jumalaika? (b) Ang’o m’urombo i kindwa ku jumalaika?
KINDE ma Yehova uteli i lemandha, elwong’i imond i kind juruot ma dit mi ju m’uwore ma gimer i kindgi. Jumalaika milioni dupa de gin’i kind juruotne. (Dan. 7:9, 10) Ka wabeparu pi jumalaika, waromo poy i kum gin m’ukoc i kindwa kugi. Ku lapor, gilar gikwo pi oro swa dit i wang’ ma jucwii dhanu. (Yob 38:4, 7) Tego migi de usagu mwa. Bende, gi leng’ man gi pwe i kadhiri ma wan wa dhanu ma watie ku dub’alaga e wacopo tundo ngo.—Luka 9:26.
2 Re kadok nwang’u wakoc ku jumalaika i lembe dupa de, lembe m’urombo i kindwa kugi de utie lee. Ku lapor, wan bende wacopo lubo lapor mi kite ma beco pa Yehova tap calu jumalaika. Calu gin, wan de watie ku bed’agonya mi timo ng’iyong’ic. Malaikaman utie ku nyinge, ku kite pare man ku rwom ma segi. Wan de kumeno. Man tap calu gin, wan bende watie kud ava mi timo thier ni Jacwic mwa.—1 Pet. 1:12.
3. Wacopo nwang’u ponji ma kani i lapor mi jumalaika ma gigwoko bedoleng’ migi ni Yehova?
3 Calu ma lembe urombo lee i kindwa ku jumalaika, wacopo nwang’u tielocwiny man ponji ma beco dupa i lapor migi. I thiwiwec maeni, wabiweco iwi kite ma wacopo lubo ko lapor mi jwigiri migi, mi mer ma gimaru ko dhanu, lapor mi cirocir migi man mi kero ma gitimo pi nigwoko cokiri ubed leng’.
JUMALAIKA GITIE WEG JWIGIRI
4. (a) Jumalaika ginyutho jwigiri nenedi? (b) Pirang’o jumalaika gitie weg jwigiri? (Zaburi 89:7)
4 Jumalaika ma gigwoko bedoleng’ migi ni Yehova gitie weg jwigiri. Kadok nwang’u ging’eyo lembe lee, gi tek man gi riek lee de, re giworo telowic pa Yehova. (Zab. 103:20) Ka gitimo gin ma Yehova ubekwayu i bang’gi, giluliri ngo man gitelo ngo nen mi jumange iwi tego migi ma lee. Ento gitimo yeny pa Mungu kud anyong’a kadok kinde ma jubenenogi ngo de.a (Tha. 32:24, 29; 2 Ub. 19:35) Gikwero ninwang’u dwong’ ceke ma Yehova re m’uromo ko. Pirang’o ginyutho jwigiri ma rukeno ngi? Pilembe gimaru Yehova man giwore lee mandha.—Som Zaburi 89:7.
5. Malaika moko unyutho jwigiri nenedi kinde m’ebemiyo juk ni jakwenda Yohana? (Nen bende cal.)
5 Wakewec iwi kpawa moko m’ubenyutho nia jumalaika gitie weg jwigiri. I kum oro 96 N.N.Y., malaika moko ma junyutho ngo nyinge unyutho gin ma wok i wang’ ma wang’u ic ni jakwenda Yohana. (Nyu. 1:1) Yohana ujolo gin ma wok i wang’ne nenedi? Emito erwo ni malaika eno. Ento ekwero Yohana m’umbe galu man ewacu ire kumae: “Itimo ang’o no! Kud itim kumeno! Atie kende kende jamiru calu in man calu umego peri . . . Rwo ni Mungu!” (Nyu. 19:10) Etie jwigiri ma lee andha! Dwong’ ku woro ubino telo ngo nen pare. M’umbe galu, etelo nen pa Yohana iwi Yehova Mungu. Kadok acaya de ecayu ngo Yohana. Andha nwang’u dong’ edaru timo ni Yehova pi oro ma dupa man ebino ku tego m’usagu pa Yohana. Ento ejwigere man elwong’o Yohana nia jamiru wadi. Man kadok nwang’u ugam ukwayu emii juk ni Yohana de, eweco ngo ire ku kwinyo, ento ku woro. Copere enyang’ nia gin ma wok i wang’ ma Yohana uneno re m’uwang’u iye lii.
Malaika unyutho jwigiri kinde m’ebeweco ku Yohana (Nen udukuwec mir 5)
6. Wacopo lubo lapor mi jwigiri mi jumalaika nenedi?
6 Wacopo lubo lapor mi jwigiri mi jumalaika nenedi? Ukwayu wan de watim tic ma Yehova umiyo i korwa m’umbe nilulara kadi nitelo nen mi jumange i wiwa. (1 Kor. 4:7) M’umedo maeno, ukwayu ngo wapar nia wa dit nisagu jumange, eno ke tek wadaru timo ni Yehova pi oro ma lee nisagugi kunoke tek watie ku rwom moko. I andha, tek rwom mwa ubemedere, ukwayu wamedara ninenara nia kabang’wa mbe. (Luka 9:48) Tap calu jumalaika, wabemito wabed jutic mi jumange. Wabemito ngo gipar nia wasagugi.
7. Wacopo nyutho jwigiri nenedi kinde m’ukwayu watwiny ng’atini kunoke wamii ire juk?
7 Wacopo nyutho bende jwigiri kinde m’ukwayu watwiny kunoke wamii juk ni jayic wadwa kunoke nyathin mwa moko. Kinde ma wabemiyo juk, romo kwayu wayer lembe thwolo thwolo. Ento tap calu malaika m’umiyo juk ni Yohana ku yoo, ukwayu ngo walund watur cwiny ng’atini magwei. Tek wabeneno ngo nia wa dit nisage, wabimiyo ire juk ku woro man ku ngisi.—Kol. 4:6.
JUMALAIKA GIMARU DHANU
8. (a) Nimakere ku Luka 15:10, jumalaika ginyutho nenedi nia gimaru dhanu? (b) Jumalaika gidikiri nenedi i tic mi rweyo lembanyong’a? (Nen bende cal.)
8 Jumalaika gidagu ngo dhanu kadi gicayugi de ngo, ento gimarugi. Anyong’a negogi kinde ma ka jadubo uloko cwinye, niwacu kinde ma rombe m’urwinyo udwogo i bang’ Yehova kunoke kinde ma ng’atini uwilo yo pare edwogo i lemandha. (Som Luka 15:10.) Jumalaika gidikiri bende i tic mi rweyo lembanyong’a mi Ker. (Nyu. 14:6) Kadok nwang’u girweyo ngo athothi ni dhanu de, re giromo telo wi jarwey moko nitundo i bang’ ng’atu m’umito ponjo lembe iwi Yehova. Re wacopo yero ngo nia malaika re m’utelo wiwa nitundo i bang’ ng’atu moko ci ma wadaru rweyo ire. Yehova copo tiyo ku yo mange de calu ve tipo pare ma leng’, pi nikonyo dhanu kunoke pi nitelo wi jutic pare. (Tic. 16:6, 7) Ento etiyo ku jumalaika i kadhiri ceke ma copere. Pieno kinde ma waberweyo lembanyong’a, cwinywa ubed tek nia jumalaika gitie kudwa pi nikonyowa.—Nen sanduku ma thiwiye tie, “Ginwang’u dwokowang’ rwo migi.”b
Umego moko giku min ot pare giai gidaru nirweyo kaka ma dhanu bepong’ i iye. Kinde ma gibedok, min ot pare uneno dhaku moko m’ubenen nia cwinye tur. Enyang’ nia jumalaika gicopo telo wiwa i bang’ dhanu ma gibeyenyo kony i thenge mi tipo. E enwang’u nia ukwayu ecidh ejuk cwiny dhakune (Nen udukuwec mir 8)
9. Wacopo lubo lapor mi jumalaika nenedi pi ninyutho nia wamaru dhanu wadwa?
9 Wacopo lubo lapor mi jumalaika nenedi pi ninyutho nia wamaru dhanu wadwa? Kinde ma wawinjo jutwong’o nia ng’atu moko udwogo i cokiri, anyong’a romo negowa calu jumalaika. Wacopo nyutho ni umego kunoke ni nyamegone nia wamare man nia etie ajola. (Luka 15:4-7; 2 Kor. 2:6-8) Wacopo lubo bende lapor mi jumalaika nwang’u wabeii ku kero mwa ceke nirweyo lembanyong’a. (Ekl. 11:6) Man tap calu jumalaika gikonyowa kinde ma waberweyo, wacopo sayu bende yore mi konyo umego ku nyimego mwa i tic mi lembanyong’a. Ku lapor, waromo pangu nirweyo ku jarwey moko ma nyen, kunoke waromo konyo umego ku nyimego mwa ma gitii man ma weg goro nirweyo.
10. Wacopo nwang’u ponji ma kani i lembe ma Sara ukadhu kud i iye?
10 Dong’ tek ecopere ngo iwa nitimo lee i tic pa Mungu ke? Asu wacopo nwang’u yore mi timo tic mi lembanyong’a karacelo ku jumalaika. Wakewec iwi lembe ma nyamego moko mi India ma nyinge Sarac ukadhu kud i iye. Kinde m’etimo tic pa jayab yo pi oro ma romo 20, twoyo ugoye uketho egonjo iwi kavuto. Cwinye utur lee mandha. Ento ku kony mi juruot pare mi tipo man nikadhu kud i som ma nja mi Biblia, nok nok enwang’u anyong’a pare kendo. Andha re ugam ukwayu esay yore mange mi rweyo. Calu m’ebed ecopere ngo ire kadok nibedo abeda pi nikiewo barua, ebed erweyo kende kende ku telefon. Pieno ebed elwong’o dhanu m’ebed eliewo, man gibed ginyutho ire pi jumange de ma gitie kud ava mi winjo lemandha. Adwogine ubino nia, i ng’ey dwi ma nok kende ci, Sara unwang’u ponji mi Biblia 70. Egam ecopere ngo ire niponjo kugi ceke. Pieno emiyo jumoko ni umego ku nyimego mange mi cokiri. Kawoni juponj Bibliane ma dupa gicidho i coko. Anyong’a ucikere ninego jumalaika lee dit nitimo tic karacelo kud umego ku nyimego ma gibeii ku kero migi ceke nirweyo lembanyong’a tap calu Sara!
JUMALAIKA GINYUTHO CIROCIR
11. Jumalaika ma gigwoko bedoleng’ migi ni Yehova gituc ninyutho cirocir ma lee nenedi?
11 Jumalaika ma gigwoko bedoleng’ migi ni Yehova gitie lapor ma ber mandha mi cirocir. Giciro camuco ku timo ma reco pi oro elufu swa. Gineno jai pa Sitani ku mi jumalaika mange dupa ma gibed gitimo ni Yehova karacelo kugi. (Tha. 3:1; 6:1, 2; Yuda 6) Biblia ukoro pi malaika moko ma won bedopwe m’ugam unyego ku pajogi pi nindo ma dupa. (Dan. 10:13) Bende, niai i rundi p’Adamu giku Eva, jumalaika gineno nia dhanu ma wendgi nok kendgi re ma ging’iyo nitimo thier ni Yehova. Ento jumalaika ma gigwoko bedoleng’ migi ni Yehova gibemediri nitimo ire kud anyong’a man kud amora. Ging’eyo nia Mungu bikabu lembe ceke ma reco i saane.
12. Ang’o ma copo konyowa niciro?
12 Wacopo lubo lapor mi cirocir mi jumalaika nenedi? Wan de waromo neno timo ma reco. Ento calu jumalaika, cwinywa tek nia Mungu bikabu timo ceke ma reco i saane. Pieno tap calu jumalaika ma gigwoko bedoleng’ migi ni Yehova, “kud waol ku timo lembe ma ber.” (Gal. 6:9) Yehova ung’olo nia ebikonyowa niciro. (1 Kor. 10:13) Pieno wabed wakway tipo pare ma konyowa nicego cirocir ku mutoro. (Gal. 5:22; Kol. 1:11) Dong’ kan ibenweng’iri i wang’ jai ke? Jengiri zoo iwi Yehova man ndiri kud unegi. Saa ceke ebikonyi man ebimiyo iri tego.—Ebr. 13:6.
JUMALAIKA GIKONYO PI NIGWOKO COKIRI UBED LENG’
13. Jumalaika gibetimo tic ma kani ma segi i kajik ceng’ maeni? (Matayo 13:47-49)
13 Yehova umiyo tic moko ma segi ni jumalaika i kajik ceng’ maeni. (Som Matayo 13:47-49.) I wang’ ng’om zoo, dhanu mi kwonde ma tung’ tung’ gibejolo lembanyong’a. Jumoko m’i kindgi gitimo mediri gidoko Jukristu mandha, jumange ke gitimo ngo. Jumiyo ni jumalaika tic mi “[koyo] kind ju ma reco ku weg bedopwe.” Eno ubenyutho nia jumiyo igi tic mi gwoko cokiri ubed leng’. Re eno nyutho ngo nia ng’atu moko ci m’uweko nidikere kudwa romo dwogo ngo i dilo pa Yehova, kadi nia ng’atu moko acel de mbe i cokiri ma bidubo. Ento cwinywa ubed tek nia jumalaika gibetimo tic ma tek pi nigwoko cokiri ubed leng’.
14-15. Wacopo lubo lapor mi jumalaika nenedi pi ninyutho nia wabedieng’ nia cokiri ubed leng’? (Nen bende cal.)
14 Wacopo lubo lapor mi jumalaika nenedi pi ninyutho nia wabedieng’ nia cokiri ubed leng’? Nwang’u wabetimo thenge ma ka mwa pi nigwoko cokiri ubed leng’ i thenge mi tipo man mi kurajo. Pi thelembe maeno, waii nigwoko adundewa; wang’iyo jurimo ma beco man wauro piny ceke ma romo nyotho kura mwa ma ber. (Zab. 101:3) Wakonyo bende juyic wadwa gimediri nigwoko bedoleng’ migi ni Yehova. Ku lapor, ukwayu watim ang’o tek wawinjo nia jayic wadwa moko utimo dubo ma pek? Mer ma wamare ko bicwaluwa nikwaye ecidh ewec ku judong cokiri. Tek ecidho ngo, wabinyutho lembene wan giwa igi. Wabemito jayic wadwa moko ci m’ubetwoyo i thenge mi tipo unwang’ kony m’umbe galu!—Yak. 5:14, 15.
15 Ku lembe ma rac, saa moko kwayu juwodh jumoko m’utimo dubo ma pek cen kud i cokiri. E ‘waweko nidikara’ ku dhanu ma kumeno.d (1 Kor. 5:9-13) Yub maeno konyo pi nigwoko cokiri ubed leng’. Bende, tek wabedikara ngo ku ju ma juwodho kud i cokiri, nwang’u wabenyutho nia wamarugi. Nenedi? Eno romo cwalugi ninyang’ nia kwayu gidwog i bang’ Yehova. E tek gitimo kumeno, anyong’a negowa karacelo ku Yehova man jumalaika pare.—Luka 15:7.
Ukwayu watim ang’o tek wawinjo nia jayic wadwa moko utimo dubo ma pek? (Nen udukuwec mir 14)e
16. Ibitimo kero nilubo lapor mi jumalaika nenedi?
16 Etie iwa rwom ma lee nineno lembe m’ubekadhu i polo ku wang’ mi yiyoyic, man nitimo tic karacelo ku jumalaika! Dong’ wek walub lapor migi ma ber, niwacu lapor mi jwigiri migi, mi mer ma gimaru ko dhanu, mi cirocir migi, man mi kite ma gidieng’ ko pi leng’o mi cokiri i thenge mi tipo man mi kurajo. Tek wabelubo lapor mi jumalaika ma gigwoko bedoleng’ migi ni Yehova, e wan de wabibedo i kind juruot mi jutic pa Yehova pi nja.
WER 123 Wawor telowic mi Theokrasi
a Kud i kind jumalaika milioni dak swa, ario kende re ma nying’gi nwang’ere i Biblia: Mikael giku Gabriel.—Dan. 12:1; Luka 1:19.
b Icopo nwang’u lembe mange dupa m’umego ku nyimego mwa gikadhu kud i igi i Index des publications des Témoins de Jéhovah i the thiwiwec “Anges,” nyathi thiwiwec “direction angélique (exemples).”
c Juloko nying’ moko.
d Calu ma jukoro i Lembe ma nyen mir 2 i kind oro 2024 m’uai i Guriri mʼutelowic, tek ngʼatu moko ma juwodho kud i cokiri ubino i coko, jarweyman copo neno en gire nimakere ku pidocwinye ma Biblia uponjo, nia emothe i adundo man ejole kunoke ngo.
e KORO I CAL: Nyamego moko ubekwayu jarimbe ucidh unyuth pi dubo m’etimo ni judong cokiri. I ng’ey ma nindo moko ukadhu ma jarimbene ucidho ngo, ecidh enyutho lembene en gire ni judong cokiri.