Umego ario ma nyen gimondo i Guriri m’utelowic

I NINDO 5, dwi mir 10, 2024, wanwang’u atwong’a ma segi i coko ma kubang’ oro nia, jung’iyo umego Jody Jedele kud umego Jacob Rumph nitimo calu umego mi Guriri m’utelowic mi Jumulembe pa Yehova. Umego ario eno ceke gitimo ni Yehova ku gwoko bedoleng’ pi oro ma dupa.

Umego Jedele unyolere i Missouri, i ng’om mir Amerika man edongo i lemandha. Junyodo pare ubed ukwo i theritwar ma jubed jurweyo ngo lembanyong’a akeca i iye. Lembuno uketho eng’eyere kud umego ku nyimego dupa m’ubed uai i kabedo ma tung’ tung’ pi nibino rweyo lembanyong’a. Mer man bedo i acel mir umego ku nyimego eno ubedo kud adwogi ma lee i wiye. Elimo batizo i nindo 15, dwi mir 10, 1983. Ebed emaru rweyo lembanyong’a man kinde m’edaru somo pare mi sekonder, ecaku wang’ acel tic pa jayab yo i dwi mir abung’wen oro 1989.

Kinde m’umego Jedele ubino aradu, junyodo pare gibed gitere ku nyamin pi niciliewo Bethel. Lembuno umiyo amora i kumgi pi niketho lembakeca mi citimo tic i Bethel; e de andha gin ario ceke gicidho i Bethel. Umego Jedele utundo i Bethel mi Wallkill i dwi mir abung’wen oro 1990. Elar ecaku timo tic mi lwoko ot, man i ng’eye ke tic mi miyo yath.

Saa maeno, cokiri mi dhok mir Espagnol (Spanish-language) ubino nuti ceng’ini ma mediri ubino lee i igi man yeny mir umego de ubino nuti i cokirinegi. E umego Jedele udok i acel m’i kindgi man ecaku ponjo dhok mir Espagnol. Nyanok i ng’eye, enwang’u nyamego Damaris m’ubino jayab yo i twodiri ma rom kude. I ng’ey kare gigamiri man en de emondo i Bethel.

I oro 2005, giwok kud i Bethel pi nidok gwoko jurunyodo migi. Saa maeno giwotho timo calu juyab yo ma nja. Umego Jedele ubino japonji mi Somo mi juyab yo man ebed etimo i Komite ma diko kind umego ku odiyath, man bende i Komite ma neno wi tic mi giedo i ng’om ma tung’ tung’.

I oro 2013, julwong’e ku min ot pare gidok kendo i Bethel pi giedo mi Warwick. I ng’eye gidok gitimo i Patterson man i Wallkill. Umego Jedele ubed utimo i Departema mi tic mi giedo man i Departema ma neno lembe pa yath. I dwi mir 3, 2023, jung’iye pi nidoko jakony i Komite mi tic mi lembanyong’a. Ewacu pi tic ma tung’ tung’ m’etimo kumae: “Ka jumiyo iri tic ma nyen, icopo nwang’u nia iromo ngo ku tije. Ento saa maeno re ma mito ijengiri iwi Yehova pilembe etie Ng’atu ma ketho doko.”

Umego Rumph unyolere i California, i Amerika. Kinde ma fodi enyathin, min ukeukwiyo i thenge mi tipo, re asu min utimo kero niponje ku lemandha. Kubang’ oro Rumph ubed ucidh uliewo wang’u mire ma Jamulembe pa Yehova. Wang’umire ukonye uketho ava mi lemandha umondo i iye, man kinde m’edoko ku oro 13, ekwayu ponji mi Biblia. E i nindo 27 mi dwi mir 9, 1992, elimo batizo. Lembe mir anyong’a utie nia, min ma nwang’u ukwiyo i thenge mi tipo udok unwang’u amora man wedi pare mange de gitimo mediri nitundo i batizo.

Kinde ma fodi umego Rumph tie aradu, eneno nia juyab yo gitie weg anyong’a. E saa m’edaru somo mi sekonder, ecaku tic pa jayab yo i dwi mir abung’wen oro 1995. I oro 2000, edok i ng’om mir Équateur kaka ma yeny mi jurwey ubino lee i iye. Kuca ewok enwang’u nyamego Inga ma jayab yo m’uai i Canada, man gigamiri. I ng’eye gidok i adhura moko mir Équateur i ungu moko ma nok mi jurwey lembanyong’a. Tin dong’ ungune udoko cokiri ma mediri lee i iye.

I ng’eye umego Rumph ku min ot pare gidok ginwang’u rwom mi bedo juyab yo ma segi man i ng’ey kare gidok gitimo tic mi liewo twodiri. I oro 2011, julwong’ogi i somo mi Gilead, i kalasine mi 132. Kinde ma ginwang’u diplom migi, gitimo i kabedo ma tung’ tung’. Gitimo i Bethel, gitimo tic mi misioner, man mi liewo twodiri. Umego Rumph de ubino japonji i Somo mi Jurwey injili mi Ker.

Tho ng’om mi Korona uketho giloko gidok i Amerika. Julwong’ogi i Bethel mi Wallkill kaka m’umego Rumph uwok unwang’u iye formasio i Komite mi tic mi lembanyong’a. I ng’eye, judok juorogi i filial mir Équateur, kaka m’etimo calu umego mi Komite mi filial. I oro 2023, juorogi i Warwick. I dwi mi 1, 2024, jung’iyo umego Rumph pi nitimo calu jakony i Komite mi tic mi lembanyong’a. Ewacu pi tic ma tung’ tung’ m’etimo kumae: “Gin ma ketho tic ma jubetimo bedo ni tic ma segi, tie ngo kabedo ma jubetimo tije i iye, ento dhanu ma jubetimo kugi tije re.”

Wabedwoko foyofoc lee pi tic ma tek m’umego maeno gitimo man ‘wabemedara nimaru wagi dhanu ma kumeno.’—Filip. 2:29.