Guriri m’utelowic mi Jumulembe pa Yehova utie ang’o?

Guriri m’utelowic utie nyathin ungu mi Jukristu ma giteng’ini, ma gimiyo telowic ni Jumulembe pa Yehova i wang’ ng’om zoo. Tic migi uketho i iye lembe ario ma e:

• Gineno wi tic mi yiko ponji m’ujengere iwi Biblia pi nimiyo telowic ni dhanu nikadhu kud i girasoma, coko man somo mi Jumulembe pa Yehova.​—Luka 12:42.

• Gitelo wi tic mi rweyo lembanyong’a ma Jumulembe pa Yehova gibetimo i ng’om zoo, kaka ma dhanu bepong’ i iye; gineno bende wi giramiya ma ku berocwiny.

Guriri m’utelowic ubelubo batiend “jukwenda ku judongo” mi Yeruzalem ma gibed gimaku yub ma pire tek pi nikonyo cokiri ceke mi Jukristu i rundi ma kwong’a. (Tic mi Jukwenda 15:2) Calu umego maeno ma giweg bedopwe, umego mi Guriri m’utelowic gitie ngo rwodhi mi dilo mwa. Gisayu telowic i Biblia kum ging’eyo nia Yehova Mungu ung’iyo Yesu Kristu re m’ubed Wi cokiri.​—1 Jukorintho 11:3; Juefeso 5:23.

Ng’agi ma gitie umego mi Guriri m’utelowic?

Guriri m’utelowic uketho i iye umego ma e: Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson man David Splane. Gitimo i kabedo mwa ma dit mi ng’om zoo, niwacu i Warwick, New York, U.S.A.

Guriri m’utelowic upangere nenedi?

Guriri m’utelowic uketho komite mange abusiel ma neno wi tic ma tung’ tung’, man umegoman mi Guririne timo i komite maeno acel kunoke nikadhu de.

• Komite mi jutel wi tic: Neno wi lembe m’uneno cik man ekonyo kaka ma peko ma wok rek uwok i iye, i lembe mi ragedo ma jubenyayu i kum Jumulembe pa Yehova pi yiyoyic migi, man kaka mange ma yeny mi kony ma pio pio uwok i iye iwi Jumulembe pa Yehova.

• Komite mi jurutic: Eneno wi yub ma tung’ tung’ ma jumaku pi juruot mi Bethel.

• Komite mi wodho jamtic: Eneno wi tic mi wodho man mi yeyo girasoma m’ujegere iwi Biblia, eneno wi tic mi giero kaka mi timo coko, biro mi loko dhok man kabedo ma tung’ tung’ mi filial.

• Komite mi tic mi lembanyong’a: Etelo wi tic mwa mi rweyo “lembanyong’a mi Ker.”​—Matayo 24:14.

• Komite mi ponji: Etelo wi tic mi yiko ponji mi tipo ma wanwang’u nikadhu kud i coko, i somo ma tung’ tung’, man nikadhu kud i program m’awinja man mi video.

• Komite mi kiewo girasoma: Etelo wi tic mi wodho ponji iwi karatasi, i internet man eneno wi tic mi loko dhok.

M’uweko tic mi komite, Guriri m’utelowic gitimo coko ku bang’ yenga pi ning’iyo gin ma dilo utie ku yenyne. I coko maeno, ging’iyo i lembe ma Biblia uyero, giweko tipo ma leng’ utel wigi man gitimo kero nimaku yub ma dhoggi urombo acel.​—Tic mi Jukwenda 15:25.

Ng’a ma gitie jukony mi Guriri m’utelowic?

Umego moko ma gitie Jukristu ma jugeno re ma gikonyo Guriri m’utelowic i komite ma tung’ tung’. (1 Jukorintho 4:2) Gitie ku copo man bodho mi timo tic ma komite uketho i korgi nia ginen wiye man gidikiri bende i coko ma kubang’ yenga ma komite ma gin’i iye timo. Kadok nwang’u gimaku ngo yub gin de, re gimiyo juk man gikoro bende lembe ma komitene utie ko yenyne. Gitiyo ku yub ma komite umaku, gineno i adwogi mi tic migi man mediri ma yub ma jumaku umiyo. Bende, Guriri m’utelowic romo orogi gicidh giliew umego ku nyimego mi kabedo mange i wang’ ng’om kunoke gimii ponji i lembe ma calu ve Coko ma dit ma kubang’ oro kunoke i Nindo mi maku diplom mi somo mi Gilead.