Kas’acel, nindo 22, dwi mir 9
Wuketh dhanu m’i thek ceke udok julub, wumii igi batizo i nying’ Wego [man] i nying’ Wod.—Mat. 28:19.
Nyo Yesu ugam umito nia jumange gitii ku nying’ Woni? Eyo, m’umbe jiji. Copere nia judong dini moko mi rundi pare gibed giparu nia nying’ Mungu tie leng’ dit, ma nia mito ngo julwong’e. Ento egam eweko ngo lemsuru maeno m’ujengere ngo iwi Lembagora ucere niyungo nying’ Won. Wakewec iwi lembe m’utimere kinde m’ekeyo kum ng’atu moko mi ng’om mi Jugeraza, ma pajogi ugam umondo i iye. Lworo umaku dhanu man gikwayu Yesu nia eai cen, e ebedo ngo i ng’ombe. (Mark. 5:16, 17) Re asu ebino mito nying’ Yehova ung’eyere keca. Pieno eyero ni ng’atu m’ekeyo kumene nia ecidh ekor ni dhanu gin ma Yehova utimo, ento ungo gin ma en e Yesu etimo. (Mark. 5:19) Tin de ebemito watim lembe ma rom eno; ebemito waketh nying’ Won ung’eyere i wang’ ng’om ngung’! (Mat. 24:14; 28:20) Ka wabetimo kumeno, wanyayu anyong’a i Ubimo mwa ma tie Yesu. w24.02 mba. 10 udu. 10
Kas’ario, nindo 23, dwi mir 9
Idaru ciro masendi dupa pi nyinga.—Nyu. 2:3.
Etie iwa mugisa ma yawe mbe nibedo i dilo pa Yehova i kajik ceng’ ma rac maeni! Lembe mi ng’om ubemedere ameda ninyothere, re Yehova umiyo iwa juruot mi tipo mir umego ku nyimego ma gitie i acel. (Zab. 133:1) Ebekonyowa nikwo kud anyong’a i kind juruotne. (Efe. 5:33–6:1) Man ebemiyo iwa rieko ma watie ku yenyne pi nibedo ku kwiyocwiny mir adunde. Ento wacikara nitimo kero ma lee kara wamedara nitimo ni Yehova ku bedopwe. Pirang’o? Pilembe saa moko ng’ico mi jumange romo kierowa. Ng’ico mwa bende romo turo cwinywa, asagane ka wacuku podho i kosa ma rom kendo kendo. Re ukwayu wamedara asu nitimo ni Yehova kadok (1) kinde ma jayic wadwa moko ukierowa, (2) kinde ma jadhogwa mi gamiri uturo cwinywa, man (3) kinde ma cwinywa utur nikum ng’ico mwa giwa. w24.03 mba. 14 udu. 1-2
Kas’adek, nindo 24, dwi mir 9
I kadhiri ma wadaru timo iye mediri, dong’ wamedara asu niwotho kumeno i gengi ma rom.—Filip. 3:16.
Saa moko ibibewinjo pir umego ku nyimego ma giwodhiri pi nitimo lee i tic pa Yehova. Nyo jumoko m’i kindgi gituc nidikiri i somo mi jurwey Injili mi Ker kunoke gidok i kabedo ma yeny utie lee i iye. Tek ecopere iri niketho lembakeca ma kumeno, kud igal. Dhanu pa Yehova ceke gimaru nitimo lee i tic pare. (Tic. 16:9) Dong’ ka fodi kawoni ecopere ngo iri ke? Kud ipar nia jumange gisegi. Poy nia kwaya mi Jukristu ujengere iwi cirocir. (Mat. 10:22) Kud icay tic ceke m’ibetimo ni Yehova nimakere ku copo peri, kum eno utie yo ma ber m’icopo mediri ko nilubo tok Yesu i ng’ey batizo peri.—Zab. 26:1. w24.03 mba. 10 udu. 11