Lemkei mi kwong’o

13 Daudi upenjo paru mi jutelwic mi dhanu elufu, jutelwic mi dhanu dak, man mi jutela ceke. 2 I ng’eye, Daudi uyero ni cokiri ceke mir Israel kumae: “Tekene etie lembe ma ber i weng’wu man tekene Yehova Mungu mwa de uyiyo, wek waor kwenda i bang’ dong umego mwa ma gidong’ i kabedo ceke mir Israel, man i bang’ julam bende ku Julawi i adhura migi man i luba migi, kara gibin gidikiri kudwa. 3 Man dong’ wakelu Sanduku pa Mungu mwa keni.” Kum nwang’u jubed judieng’ kude ngo i nindo pa Saul. 4 E cokiri ceke uyiyo lembene, kum ebino lembe m’atira i wang’ dhanu zoo. 5 Daudi ugam ucoko dhu Israel ceke niai i kulo* mi Misiri nitundo i Lebo-hamath,* kara gigam Sanduku pa Mungu mandha kud i Kiriath-jearim.

6 Daudi ku Israel ceke gicidho i Bala i Kiriath-jearim, ma nwang’ere i Yuda pi nigamu Sanduku pa Yehova Mungu mandha m’ujany malu iwi* jukerubi, Sanduku ma dhanu lwong’o nyinge i wiye. 7 Ento giketho Sanduku pa Mungu mandha iwi magali ma nyen man gigame kud i ot p’Abinadab. Uza gikud Ahio re ma gibino telo wi magaline. 8 Daudi ku Juisrael ceke gibino timo foc i wang’ Mungu mandha ku tego migi ceke, ma gibewer, gigoyo adungu ku jamgoyo wer mange ma juthondhe, nyithi vul, ku jamgoyo wer ma woy awoya, man agwara. 9 Ento kinde ma gitundo i lela mi fwodo cam pa Kidon, dhieng’ uyenyo redho Sandukune, e Uza urieyo cinge man emake. 10 Ng’eicwiny pa Yehova ugam uopo i kum Uza man egoye, pilembe erieyo cinge i kum Sanduku, e etho keca i wang’ Mungu. 11 Ento ng’eicwiny umaku* Daudi pilembe kwinyo pa Yehova ucorere iwi Uza; man julwong’o kabedo maeno nia Perez-uza* cil tin.

12 E lworo umaku Daudi i kum Mungu mandha cing’ nica man ewacu kumae: “Eni ke dong’ acopo dwogo Sanduku pa Mungu mandha i bang’a nenedi?” 13 Pieno, Daudi utero ngo Sandukune kaka m’ebedo i iye i Adhura pa Daudi, ento eketho jutere i ot pa Obed-edom ma Jagath. 14 Sanduku pa Mungu mandha ubedo karacelo ku juruot pa Obed-edom, ebedo i ot pare pi dwi adek; man Yehova ubed umiyo mugisa ni juruot pa Obed-edom ku piny pare ceke.