Zaburi
Rwo pa ng’atu ma jubesendo kinde ma cwinye tur* man ebekonjo adieng’a pare i wang’ Yehova.
102 E Yehova, winj rwo para;
Timba wak para m’abekwayu ko kony utund i beng’i.
2 Kud ikan weng’i ira saa ma an’i can.
Cik ithi* i bang’a;
Dwok ira lembe pio pio kinde m’abelwong’i.
3 Kum nindo para gibeduny calu yiro
Man cogona wang’ ve kaka ma jukudho iye mac.
4 Jung’ondo adundena calu lum man ener
Kum wiya wil nicamu cam para.
5 Cur m’abecur ko ma tek
Uketho cogona ubemoko i kum ring’ kuma.
6 Adoko calu ugoro m’i langa;
A calu kwiriloi i uvuru.
7 Nindo kadhu ngo i wang’a;*
A calu winyo m’ubedo kende iwi ot.
8 Judegina giberoka dieceng’ duu.
Ju ma gibecaya* gibetiyo ku nyinga i kwong’ migi.
9 Kum abecamu vuru calu mukathi,
Man giramadha para ujebere ku pii wang’a,
10 Nikum ng’eicwiny peri man kwinyo peri,
Kum iting’a malu kende kende pi nibaya cen.
11 Nindo para tie calu tipopiny* m’ubemwony,
Abener calu lum.
12 Ento in ibedo mi nja, E Yehova,
Man pi nyingi m’uyik* bigalu i kind dhanu m’utuk ceke.
13 M’umbe jiji ibiay man ibitimo kisa ni Sayuni,
Kum etie saa mi nyutho ire bero peri;
Saa m’ukethere uromo.
14 Kum anyong’a nego jutic peri i kum kidine
Man gimaru kadok utur m’i iye.
15 Dhanu mi thek mange gibilworo nying’ Yehova,
Man jubim ceke m’i ng’om gibilworo dwong’ peri.
16 Kum Yehova bigiero Sayuni kendo;
Ebinyuthere i dwong’ pare.
17 Ebiketho wiye i kum rwo mi jucan;
Ebicayu ngo rwo migi.
18 Jukiewo lembe maeni ni dhanu m’utuk ma bibino
Kara dhanu ma fodi ginyoliri ngo* gipak Yah.
19 Kum eneno yo piny niai kud i kaka ma malu pare ma leng’,
Niai kud i polo, Yehova neno ng’om.
20 Pi niwinjo cur pa ng’atu ma jutwiyo i otkol,
Man pi nigonyo ju ma jung’olo tho i wigi,
21 Kara jutwong’ nying’ Yehova i Sayuni
Man pak pare i Yeruzalem.
22 Kinde ma dhanu man ker
Gicokiri karacelo pi nitimo ni Yehova.
23 Elar emaya ku tego para ma fodi;
Ejwigo nindo para.
24 Ayero kumae: “E Mungu para,
Kud ikaba cen i diere mi kwo para,
In ma bor mi rundi peri utundo i kum dhanu m’utuk ceke.
25 Yang’ con, iketho kathere mi ng’om,
Man polo gitie tic mi cingi.
26 Gibinyothiri, ento in ibidong’;
Gin ceke gibitii tap calu bongu.
Calu bongu, ibiwilogi man gibikadhu cen.
27 Ento in i rom man rundi peri bijik tak de ngo.
28 Awiya mi jutic peri gibibedo museme,
Man nyikwaygi bicungo ging’ ging’ i weng’i.