10 Nibedo ng’atu ma jugeno

THELEMBENE TIE ANG’O?

Ng’atu ma jugeno utie ng’atu ma junyodo pare, jurimbe, man judongo pare mi tic cwinygi bedo tek i wiye. Etie bende ng’atu ma woro cik, ma timo lembe m’eng’olo, man ma yero lemandha saa ceke.

PIRANG’O PIRE TIE TEK NIBEDO NG’ATU MA JUGENO

Wang’ ma pol, dhanu benwang’u bedangonya niai kud i kadhiri mi genogen ma jular juketho i wigi i wang’e.

“Kite ma ber m’icopo ketho junyodo peri gigeni ko utie ninyutho kamaleng’ nia i tie dhanu m’uteng’ini man ma zoo. Etiye ngo kende kende i saa m’itiye karacelo kugi, ento bende kan itiye kendi.”​—Sarahi.

CIK MIR UKUNGU MI BIBLIA: “Wumeduru nineno ka nyo wutie kit dhanu ma nenedi.”​—2 Jukorintho 13:5.

ICOPO TIMO ANG’O?

Kan imito jugeni lee kunoke genogen ma jubayu i wii udwogi kendo, lembe m’ulubo e copo konyi:

Bed dhanu m’atira. Piny moko mange mbe ma copo ketho jubayu genogen kud i wii nisagu ndra. Tung’ ku maeno, kan itiye dhanu m’atira, man akecane kan ibed iumo ngo wi racu m’itimo, ibiketho jumange bigeni.

“Etiye yot nibedo dhanu m’atira ka lembe ubewotho cuu. Ento kan ibed ibedo dhanu m’atira kadok i lembe ma nwang’u romo kelo peko i wii, eno biketho dhanu bigeni lee ma gwei.”​—Caiman.

CIK MIR UKUNGU MI BIBLIA: “Wabemito wawoth atira i lembe ceke.”​—Juebrania 13:18.

Bed dhanu ma jugeno. I ng’om mir États-Unis, jutimo sayusac moko i biro ma tung’ tungu’ ma neno wi lembe pa tic; biro 78 i wi 100 unwang’u nia nibedo dhanu ma jugeno utie “acel m’ikind lembe adek ma pigi tek lee ma ketho jumiyo tic ni ng’atini.” Tekene ibeii nibedo dhanu ma jugeno niai kawoni, eno bikonyi kinde m’ibidongo.

“Junyodo para ginena nia atie dhanu ma zoo kan abetimo tic mi pacu ma nwang’u girera ng’o arera. Kan abemedara nitimo kumeno, e gin de gigena lee mandha.”​—Sarah.

CIK MIR UKUNGU MI BIBLIA: “Cwinya tek nia ibitimo lembe m’akwayu, . . . m’ang’eyo ko nia ibitimo kadok nisagu gin m’ayero.”​—Filemon 21.

Bed dhanu ma mwonyolembe hai. Etiye yot ni jumange nineno nia aradu gicaku bethik, ento pi ning’eyo nia gimaku beteng’ini man gibedoko dhanu ma zoo, eting’o nindo ma lee.

“Utiye ngo gin m’ibitimo wang’ acel kende re ma biketho junyodo peri ku jumange gibigeni. Ento gibigeni yoyo nwang’u saa ceke ibecuku timo gin m’unyutho nia itiye dhanu ma zoo.”​—Brandon.

CIK MIR UKUNGU MI BIBLIA: “Wuronyuru ku . . . mwonyolembe hai.”​—Jukolosai 3:12.