Erweyo i Galilaya man etendo jukwenda pare

Yesu urweyo lembanyong’a pi oro ma romo ario. Nyo kawoni utie saa m’edol ie cinge kunoke m’eyom i ie? Ungo, Yesu urweyo lembanyong’a kud amora, ewotho “i adhura ceke ku ba pacu de ceke, ku ponjo i kacokri, ku yero lembanyong’a mi Ker de, man ku keyo tho ceke ma kwonde tung’ tung’ m’unyang’ i kum ku tho mange ceke ma kwonde tung’ tung’.” (Matayo 9:35) Lembe m’ebino nineno uketho enyang’ nia andha ukwayu nitimo tic mi rweyo lembanyong’a. Dong’ ebitimo ticne nenedi?

Kaka ceke ma Yesu ubed uwotho i ie, eneno nia dhanu utie ku yeny mi kony mi tipo man mi lemandha. Gibedo ve rombe ma jukwac migi mbe, ma jusendogi, man ma juwenjogi. Kisa nege i kumgi, man ewacu ni julubne kumae: “Mwoka bedo dit andha [ento] jutic gilam. Ka kumeno wukwai Rwoth mi mwoka, ya eor jutic i mwoka pare.”​—Matayo 9:37, 38.

Yesu umaku yub mi konyogi. Elwong’o jukwenda pare 12, man eorogi ario ario, epokogi ni ungu abusiel. Man emio igi telowic ma e: “Kud wucidh i yo moko mi Thekdhanumange, man kud wumond i adhura moko mi Jusamaria: ento ma sagu wucidh ba rombe m’urwinyo m’i ot pa Israel. Ka wucidho de, wuwac kumae, Ker m’i polo dhingo.”​—Matayo 10:5-7.

Ker ma giberweyo pire, utie Ker ma Yesu ugam uweco pire i rwo m’enyutho igi. ‘Ker maeno udhingo’ i kite ma Yesu ma tie ng’atu ma Mungu ung’io nibedo ubimo, dong’ unuti i kindgi. Ang’o ma binyutho nia andha julub pare gicungo kaka Ker maeno? Yesu umio igi copo mi keyokum man mi cero dhanu; lembe maeno ceke gibitimo mananu ma cul umbe. Dong’ jukwenda gibipong’o yeny migi mi kum nenedi, calu ve ninwang’u cam migi ma kubang’ ceng’?

Yesu ung’olo ni julubne nia kud giting’ piny moko pi nikonyogi pi wotho mi lembanyong’a. Eyero nia kud giting’ mola ma kwar (or), mola ma tar (argent), kunoke mola (cuivre). Ukwayu ngo giting’ usau mi cam pi wotho migi, kadok bongu kadi wara ma gibiwotho bewilo. Pirang’o? Yesu uketho cwinygi kumae: “Jatic uromo ku cemo.” (Matayo 10:10) Dhanu ma gibinwang’u, ma bijolo lembe migi, gibipong’o yeny migi mi gin ma pire tek. Yesu umedo kendo: “Ka ma tek wumondo i ie i ot, wubed keca ram ma wuai ko woko.”​—Marko 6:10.

Yesu unyutho igi bende gin m’ukwayu gitim ka ginwang’u won ot, eyero kumae: “Ka wumondo de i ot, wumothe man tek ode romo, wek kwiocwiny mu bin i wie: ento tek eromo ngo, wek kwiocwiny mu dwog i beng’wu. Ng’atu ma tek bijolowu ngo, kadi m’uwinjo lembe mu ngo, ka wuai kud i oduca kadi adhura nica, wukir utur m’i tiendwu woko.”​—Matayo 10:12-14.

Adhura kunoke pacu acel zoo copo nikwero lembe migi. Lembang’o ma binwang’u adhura ma kumeno? Yesu uyero nia gibinwang’u pokolembe ma tek mandha. Ekoro kumae: “Andha awacu iwu kumae, i ceng’ mi pokolembe, pokolembe mi ng’om Sodom ku Gomora bibedo ber ma sagu mir adhura maeno.”​—Matayo 10:15.