Yesu urweyo rwonglembe mi Ker

Nyanok i ng’ey ma Yesu ulimo batizo, ecaku rweyo kumae: ‘Ker pa Mungu ni ceng’ini.’ Julub pare gilubo toke kinde m’ebewotho i kind ng’om mi Galilaya man mi Yudea. Kinde ma Yesu udok i Nazarethi ma tie adhura ma thuggi, ecidho i sinagog man ewok eyabu kithabu m’adola pa Isaya, e esome ku dwande ma tek kumae: ‘Yehova umiyo ira tipo ma leng’ kara arwey lembanyong’a.’ Thelembe mi wec maeno ubino ang’o? Ubino nia kadok nwang’u dhanu gibino mito ginen udu ma Yesu ubetimo de, re thelembe ma dit m’uketho enwang’u tipo ma leng’ utie pi nirweyo lembanyong’a. Pieno, eyero ni dhanu m’ubewinje kumae: ‘Tin, lembila maeni udaru pong’o.’

I ng’eye, Yesu ucidho i dhu nam mi Galilaya, kaka m’ewok enwang’u i iye judwar rec ang’wen ma gidoko julub pare. Elwong’ogi man eyero igi kumae: ‘Wubin man abidwokowu ni judwar dhanu.’ Ju m’elwong’one ubino Pethro, Andrea, Yakobo man Yohana. E ndhu ndhu nica, giweko tic migi mi dwaru rec man gilubo ng’eye. Giwotho i Galilaya ceke ma giberweyo pi Ker pa Yehova. Girweyo i sinagog, i soko, man i ndaki. Udul dhanu ma lee ubed ulubo tokgi kaka ceke ma gibecidho i iye. Pi Yesu uyik i kabedo ceke nitundo bor i Siria.

Nindo moko i ng’eye, Yesu umiyo copo mi keyo kum dhanu man mi wodho pajogi ni julub pare moko. Ebed ewotho ku jumange kinde m’eberweyo kubang’ adhura man kubang’ pacu. Jumamon dupa ma weg bedopwe, calu ve Maria Magdalene, Jan man Suzana ku jumange de gibed gikonyo Yesu man julub pare.

I ng’ey ma Yesu uponjo julub pare, eorogi gicidh girwey. Kinde ma giwotho i Galilaya zoo pi nirweyo, dhanu mange dupa gidoko julub man gilimo batizo. Pieno dhanu dupa gimito gibed julub pa Yesu, uketho eporogi ku podho ma cam m’i iye tie ayika pir akaya. Eyero kumae: ‘Wukway Yehova uor jutic pi nikayu cam.’ I ng’eye, eng’iyo julub 70 man eorogi ario ario pi nirweyo i ng’om Yudea zoo. Giponjo kwond dhanu ceke ku lembe iwi Ker pa Mungu. Kinde ma julub gidwogo i bang’ Yesu, gibedo kud anyong’a nikoro ire lembe m’utimere. Gin moko acel de mbe ma Wonabali copo timo pi nijigo tic mi rweyo lembanyong’a.

Yesu utimo lembe ceke wek kara julub pare gimediri ku tic maeno ma pire tek i ng’ey m’ebidok i polo. Eyero igi kumae: ‘Wurwey lembanyong’a i ng’om zoo. Wuponj dhanu ku lembe pa Mungu man wumii igi batizo.’