Yesu utimo udu wang’ mir arionde i Kana

Yesu utimo nindo ario kumeni i Samaria, ing’eye eloko edok i pacu ma thugi i Galilaya. Erweyo lembanyong’a lee mandha i Yahudi, re edok ungo i Galilaya nibedo abeda, ento edok ecaku tic madit i pacu maeno m’edongo i ie. Ecopo geno ngo nia jubijole maber, pilembe en gire ewacu nia, “jabila mbe ku yung i ng’om pare gire.” (Yohana 4:44) Julub pare de giwok giweke kakare nibedo karacelo kude, man gidok i pacu migi, gicaku timo tic ma gibed gitimo iwang’e.

Yesu ucaku nirweyo rwonglembe makani? Ecaku nirweyo lembe mae: “Ker pa Mungu de ni ceng’ni: wulok cwinywu, wuyi lembanyong’a ma juboth ko.” (Marko 1:15) Dhanu utimo ang’o? Ma jiji mbe, dhanu mapol mi Galilaya gijolo Yesu maber, man gimio ire yung. Gijole ngo kende kende pi rwonglembe m’ebino nirweyo igi. Dwi moko iwang’e, dhanu moko m’uai i Galilaya gicidho i Kadhukuwijo i Yerusulem, man giwok gineno udu ma Yesu utimo.​—Yohana 2:23.

Yesu ucaku tic pare ma lee mi ponji i pacu makani mi Galilaya? Ecicopere nia ecaku i Kana, kaka m’eloko i ie pii ni pigulok i nyom moko. Kawoni Yesu ubenwang’ere i pacu maeno wang’ mir arionde; e junyutho ire nia jalawobi moko ubetwoyo lee dit ma dong’ ebecitho. Jalawobine ubino wod jego p’ubimo Herode Antipas; Herodene re m’ing’eye udok uthumo wi Yohana ma Jababutisi. Jego maeno uwinjo nia Yesu uai i Yahudi edaru tundo i Kana. E eai thugi i Kapernaum, ebin enwang’u Yesu i Kana. Ekwayu Yesu ku kisa madit kumae: “Rwoth, lor piny ma fodi nyathin para ku tho ngo.”​—Yohana 4:49.

Yesu udwoko lembe m’uwang’u i jego maeno lii; ewacu kumae: “Cidh i yo peri; wodi bedo kwo.” (Yohana 4:50) Egam eyio lembe ma Yesu uyero ire, man ecoko woth pi nidok i pacu pare. Kinde ma fodi eni yo, erombo ku jurutic pare gibedhuliri pi nibino yero ire lembe mir anyong’a. Wode kei andha! Epenjogi kumae: ‘kume kei saa adi?’ Emito epor wec ma gibidwoko ku saa ma Yesu uyero ire nia kum wode ukei.

Jurutic pare gigam gidwoko ire kumae: “Nyaworo i saa mir abirone e kume m’ucek uweke.”​—Yohana 4:52.

Wang’ acel jego ugam upoi nia tap i saa maeca re ma Yesu uwacu ire nia, “wodi bedo kwo.” Ing’eye, ng’atuno m’ubino jalonyo man m’ubino ku jurutic pare dupa, gidoko julub pa Kristu ku juode ceke.

I adhura mi Kana Yesu utimo udu wang’ ario: eloko pii udoko ni pigulok man ekeyo kum jalawobi moko ku bor i kilometre 26 kumeni. Udu pare ujik ungo eno kende; re udu maeno pigi tek pilembe etimogi nwang’u fodi edwogo adwoga i Galilaya. Andhandha, Yesu utie jabila ma Mungu uyio; re jubimio yung rukani ni ‘jabila maeno i ng’om pare gire?’

Lembe maeno bing’eyere kamaleng’ kinde ma Yesu bidok i Nazareti. Lembang’o m’ubekure kuca?