PONJI MI 87
Cemo ma tokcen pa Yesu
Juyahudi gibed gitimo foc mi Kadhukuwijo kubang’ oro i nindo 14 mi dwi mi Nisan. Eno ubed upoyo wigi i kum ayi ma Yehova ugam ugonyo kogi kud i ng’eca i Misiri man etero kogi i Ng’om mi lembang’ola. I oro 33 N.N.Y., Yesu karacelo ku jukwenda pare gitimo foc mi Kadhukuwijo i kusika moko ma malu i Yeruzalem. Kinde ma cam ubecithum, Yesu uyero kumae: ‘Ng’atu acel m’i kindwu biciba.’ Can umaku jukwenda, uketho gipenje kumae: ‘Tie ng’a?’ Yesu udwoko igi kumae: ‘Tie ng’atu m’abimiyo ire mukathi.’ I ng’eye, emiyo dund mukathi ni Yuda Iskarioth. E ndhu ndhu nica, Yuda uai man ewok kud i ot.
I ng’eye, Yesu urwo, eng’weko i mukathi man emiyo i cing’ jukwenda m’udong’. Eyero igi kumae: ‘Wucam mukathi maeni. Ebenyutho kuma m’abimiyo piwu.’ Bende, erwo iwi divai moko man emiye ni jukwenda pare. Eyero kumae: ‘Wumadh divai maeni. Ebenyutho rimba m’abimiyo wek kara dubo ukabere. Abeng’olo nia wubibedo jubim karacelo kuda i polo. Wubed wutim lembe maeni kubang’ oro pi nipoy pira.’ Julub pa Yesu gibed gicokiri asu uthieno mi nindo 14 mi dwi mi Nisan kubang’ oro. Cokone julwong’o Cemo mir uthieno pa Rwoth.
I ng’ey ma gidaru cam, jukwenda gicaku teliri nia ng’a m’i kindgi ma pire tek nisagu. Ento Yesu uwacu igi kumae: ‘Ng’atu ma dit nisagu i kindwu utie ng’atu m’ubenenere en gire nia e nyathin man nia pire tek ungo.’
‘Wutie jurimba. Ayero iwu lembe ceke ma Vwa umito ayer iwu. Adhingo cidho i bang’ Vwa i polo. Ento wun wubidong’, man dhanu ceke bing’eyo nia wutie julubna nikum mer ma wutie ko i kindwu. Wicikuru nimeruru i kindwu tap calu ma an de amaruwu.’
Tokcenne, Yesu urwo man ekwayu Yehova ugwok julub pare ceke. Ekwayu Yehova ukonygi kara gitim tic karacelo i kwiyocwiny. Erwo kara nying’ Yehova ubed leng’. E Yesu ku jukwenda pare giwero wer mi pak ni Yehova man giwok woko. Nwang’u saa ma jubecimaku i iye Yesu udhingo.
“Lworo kud unegwu, udul ma nok, kum Wegwu ufoyo nimiyo iwu Ker.”—Luka 12:32