Nyo acikara nikwayu jumaleng’?

Lembe ma Biblia udwoko

Ungo. Biblia unyutho nia wacikara nikwayu Mungu kende, i nying’ Yesu. Yesu uyero ni julub pare kumae: “Wurwo kumae: Wegwa ma n’i polo, nyingi bed leng’.” (Matayo 6:9) Eng’olo ngo igi nyanok de nia gibed gikway jumaleng’, jumalaika, kadi ng’atu mange m’uweko Mungu.

Yesu uyero bende ni julub pare kumae: “An a yo, lemandha man kwo. Ng’atu moko mbe ma copo bino i bang’ Wego, ndhu nikadhu kud i bang’a kende.” (Yohana 14:6) Yesu kende re ma Mungu uyiyo ubed ukway piwa.​—Juebrania 7:25.

Dong’ kan akwayu Mungu man akwayu bende jumaleng’, racune ni kani?

I Cik apar ma Mungu ugam umiyo, eyero kumae: “An a Yehova ma Mungu peri a Mungu ma janyeko.” (Ai 20:5) Mungu tie “janyeko” i ayi ma nenedi? Ebemito watim lembe ceke m’uneno thier ire kende, uketho i iye bende rwo.​—Isaya 48:11.

Pieno i wang’ Mungu, nikwayu ng’atu mange, kadok jumaleng’ kunoke jumalaika utie dubo. Eno re m’uketho saa ma jakwenda Yohana uyenyo erwo ni malaika moko, malaikane kwere man eyero ire kumae: “Kud itim kumeno! Atie kende kende jamiru calu in man calu umego peri ma gitie ku tic mi miyo lembatuca iwi Yesu. Rwo ni Mungu!”​—Lembanyutha 19:10.