Nyo Biblia copo konya ka cwinya daru turi?

Lembe ma Biblia udwoko

Eyo, pilembe kony ma ber m’usagu zoo beai i bang’ “Mungu ma juko ju ma cwinygi tur.”​—2 Jukorintho 7:6.

Gin ma Mungu bemiyo pi nikonyo ju ma cwinygi tur

• Emiyo tego. Kakare ma nia Mungu ukab peko peri ceke akaba, emiyo iri “tego man amora.” Bende edwoko wang’ rwo peri kinde m’iberwo nia emii iri kero m’inyeg ko ku peko perine. (Jufilipi 4:13) Icopo bedo ma cwinyi tek nia etie ayika niwinji, pilembe Biblia uyero kumae: “Yehova ni ceng’ni [ku] ju ma adundegi tur, man ebodho wagi ju ma cwinygi dieng’ kum dubo migi.” (Zaburi 34:18) I andha, Mungu copo winjo kwac peri pi kony m’ibekwayu i bang’e kadok ibenwang’u nia imbe ku copo mi koro ire tap tap kite m’ibewinjiri ko de.​—Jurumi 8:26, 27.

• Emiyo lapor ma tung’ tung’ ma beco. Jagor Biblia moko urwo i bang’ Mungu kumae: “Alwong’o i beng’i kud i ka ma thuth.” Jagor zaburi maeni unyego ku turcwiny pare m’ewotho bepoy ko nia Mungu ubemito etim iwa kisa pi dubo mwa; uketho ewacu ni Mungu kumae: “Dok in, Yehova, ineno kier, e Rwoth, ng’a ma copo cungo? Ento wekodubo nuti kudi, kara julwori.”​—Zaburi 130:1, 3, 4.

• Emiyo genogen. M’umedo miyo iwa jukocwiny pi kawoni, Mungu udaru ng’olo nia ebikabu peko ma tung’ tung’ ceke m’ubecuku miyo turcwiny ni dhanu. Kan ebipong’o lembang’ola pare nica, “jubipoi pi gin [uketho i iye turcwiny] ma kwong’a ngo, kadi ebiwok i pidoic de ngo.”​—Isaya 65:17.

Lembe ma pire tek: Kadok nwang’u Jumulembe pa Yehova ging’eyo nia Mungu bekonyogi i kum turcwiny de, re lundo gimaku yath i kum twoyo maeno (turcwiny) kan ukwayere. (Marko 2:17) Ento wambe ku kit thieth moko ma segi, kum wang’eyo nia ng’atuman ukwayu umak yub en gire iwi lembe ma kumeno niwacu mi thieth.