Nyo Biblia copo konyo ng’atu m’ukwo ku twoyo ma key ungo?

Lembe ma Biblia udwoko

Eyo. Mungu ubedieng’ lee pi jutic pare m’ubetwoyo. Pi jatic pa Mungu m’ubegwoko bedoleng’ pare ire, Biblia uyero kumae: “Yehova bijenge wi kavuto mi mulima.” (Zaburi 41:3) Dong’ kan ibetwoyo twoyo moko ma key ungo, juk adek m’ulubo e copo konyi:

1. Kway Mungu umii iri tego m’icir ko. Kan itimo kumeno, ibinwang’u “kwiyocwiny pa Mungu m’ukadhu gin ceke ma jucopo nyang’ i iye” ma bikonyi kara imediri asu niciro peko m’ibenweng’iri ko.​—Jufilipi 4:6, 7.

2. Keth wii i kum lembe ma beco. Biblia uyero kumae: “Adunde mi mutoro en e yath ma ber; ento cwiny m’utur talu cogo.” (Lembrieko 17:22) Bed iroy sosi i wec man i timo peri, pilembe eno copo jwigo adieng’a peri man copo ketho kumi de bedo ma leng’.

3. Bed ku genogen ma tek pi nindo m’ubino. Genogen ma tek copo konyi kara ikwo kud anyong’a kadok itie ku twoyo ma key ungo de. (Jurumi 12:12) Biblia unyutho nia i nindo m’ubino, ng’atu moko mbe ma biwacu nia ‘kume lith.’ (Isaya 33:24) Mungu bidaru twoyo ceke, uketho i iye kadok ma thiedho udaru voyo rieko pa dhanu. Ku lapor, Biblia ukoro nia cil tiyo de bijik man ju m’utii bidoko aradu kendo, eyero kumae: “Ring’kume bibedo nyen ma sagu pa nyathin; edwogo ba nindo mir aradu pare.”​—Yob 33:25.

Ng’ei lembe mae: Kadok wa Jumulembe pa Yehova wayiyo nia Mungu konyowa de, re wamaku bende yath tek waberemo remo moko m’ubethum ungo. (Marko 2:17) Ento wang’olo ngo kit thieth moko ni ng’atini, wang’eyo nia eno tie ng’iyong’ic pa ng’atini en gire.