Nyo Jumulembe pa Yehova ginyotho udi mi dhanu kunoke gigiere agiera?

Wa Jumulembe pa Yehova, watimo kero kara wakwo ma ber i udi mwa man wakonyo jumange bende kara gin de gikwo ma ber i udi migi. Waworo Mungu m’ucaku the kwo mi juruot. (Thangambere 2:21-24; Juefeso 3:14, 15) I Biblia, Mungu ubeponjowa ku cik mir ukungu m’ukonyo dhanu i wang’ ng’om zoo kara gibed ku gamiri ma tie ku tego i iye man ma tie kud anyong’a.

Jumulembe pa Yehova gitimo ang’o kara gamiri ubed ku tego i iye?

Watimo kero nilubo juk ma nwang’ere i Biblia, pilembe gikonyowa nibedo cogmon m’atira, mon m’atira man junyodo m’atira. (Lembrieko 31:10-31; Juefeso 5:22–6:4; 1 Timoteo 5:8) Rieko ma nwang’ere i Biblia konyo kadok juruot ma gitie i yiyoyic m’ukoc kara gikwo ma ber. (1 Petro 3:1, 2) Kewinj lembe ma e ma jumoko ma judhogi mi gamiri gidoko Jumulembe pa Yehova giyero:

• “I kind oro abusiel ma watimo karacelo, wabed wadhau kwa adhawa man wabedo kwa nyacan can. I ng’ei ma Ivete udoko Jamulembe pa Yehova, efodoko dhanu ma ber mi tuko ngo man won cirocir. Alokaloka m’etimo ubodho gamiri mwa.”​—Clauir, niai kud i Brésil.

• “Kinde ma cwara ucaku ponjo Biblia ku Jumulembe pa Yehova, agam amaru ngo lembene magwei, pilembe abed aparu nia ginyotho kwo mi juruot. Ento niai eca, agam aneno kamaleng’ kite ma Biblia ukonyo kowa i gamiri mwa.”​—Agness, niai kud i Zambie.

Kinde ma wan’i tic mi lembanyong’a, wanyutho ni judhugola mwa kite ma nitiyo ku rieko ma nwang’ere i Biblia copo konyo kogi kara

• Ging’ii judhogi mi gamiri ku rieko

• Gicir peko ma wok i kind oro ma kwong’a i gamiri

• Giwinjiri ma ber ku wedi pa coggi man pa mon migi

• Gitii cuu ku sente

• Giwek nibeteliri iwi lembe

• Gibed giwek lembe i kindgi

• Giponj awiya migi

Nyo niwilo dini kelo atelatela i gamiri?

I andha, saa moko niwilo dini kelo atelatela. Ku lapor, rapor moko ma dikiri mi sayusac ma nyinge Sofres utimo i oro 1998 ukoro nia i udi ma nico kunoke dhaku kende re ma tie Jamulembe pa Yehova, ot 1 iwi 20 unwang’ere ku peko lee kinde ma ng’atu acel m’i kindgi uwilo dini pare.

Yesu ular uyero nia dhanu ceke ma gibilubo ponji pare, gibinwang’iri ku peko i kindgi ku wedi migi. (Matayo 10:32-36) Jakor lembatada ma nyinge Will Durant ukoro nia i the Bimobim mi Roma, “jubed judoto Jukristu nia gibenyotho udi,”a man tin bende i kabedo moko, jukelo adote ma rom eno iwi Jumulembe pa Yehova. Nyo eno nyutho nia ng’atu m’udoko Jamulembe pa Yehova re m’unyayu teliri?

Kinde ma Odi pido ma malu mir Europe ma neno twero mi dhanu (La Cour européenne des droits de l’homme) ubino ng’iyo i adote ma jukelo iwi Jumulembe pa Yehova nia ginyotho udi, giwacu nia wang’ ma pol, wedi mi Jumulembe maeno ma gitie ngo Jumulembe re ma ginyayu atelatela pilembe gikwero “niyiyo man niworo bedagonya ma wedi migi utie ko mi nyutho man mi timo lembe mi dini migi.” Odi pido maeno umedo kumae: “Lembe maeno bewok i kind ju m’ugamiri ceke ma yiyoyic migi ukoc, nik’ebed bende Jumulembe pa Yehova.”b Kadok nwang’u ubekwayu nia gicir dhanu moko m’ubeyiyo ngo dini migi de, re Jumulembe pa Yehova gitimo kero nilubo juk ma e ma Biblia umiyo: “Kud wucul wang’ rac ku rac ni ng’atu moko ci. . . . Wutim lembe ceke ma wucopo kara wukwo ku kwiyocwiny ku dhanu ceke.”​—Jurumi 12:17, 18.

Pirang’o Jumulembe pa Yehova giyiyo nia gicikiri nigamiri kende kende ku ng’atu m’i dini migi?

Jumulembe pa Yehova gilubo kilili mandha telowic mi Biblia m’uwacu nia gigamiri “kende kende i Rwoth,” niwacu ku ng’atu m’utie ku yiyoyic ma rom ku migi. (1 Jukorinto 7:39) Cik maeno uai i Biblia man etie ku kony lee. Ku lapor, i oro 2010, buku moko (Journal of Marriage and Family) uwacu nia “dhaku ku cware ma gitie i dini ma rom, ma gitimo lembe mi dini migi karacelo man gitie ku yiyoyic ma rom,” gibedo ku winjiri ma ber dit i kindgi.c

Ento Jumulembe pa Yehova gicwalu ngo juyic migi nia gipokiri ku judhogi mi gamiri ma gitie ngo Jumulembe. Biblia uwacu kumae: “Tek umego moko utie ku dhaku ma jayic ungo man ka dhakune uyiyo nia gibed kude, dong’ kud eweke; bende tek dhaku moko cware tie jayic ungo man cwarene yiyo nia gibed kude, dong’ kud eweke.” (1 Jukorinto 7:12, 13) Jumulembe pa Yehova gilubo telowic maeno.