“Acaku paru cuu mandha iwi ayi m’abetiyo ko ku kwo para?”

KWO PARA MA CON:

Adongo i Warialda, ma tie adhura ma nok mi ng’om mi Nouvelle​-Galles du Sud. Warialda utie pacu moko ma nyanok ma dhanu mi iye gitungo rombe ku dhieng’ man gipidho thiwe ma tung’ tung’ ma thindho thindho. Adhurane tie ma leng’ man dhanu ma turocik de gitie nyanok i iye.

Kinde ma oro para udoko apar adek (13) acaku timo tic pi nipong’o yeny mi juruot fwa, calu m’atie kayu i kind awiya fwa apar. Bende calu m’asomo nyanok, abed atimo tic mi kwac. Ku oro apar abic (15) acaku timo tic mi kwayu lim, man abed atimo tic mi ketho kana utuc ning’iyo ku dhanu.

Nitimo tic i luba ubino ku bero man ku racune de. I thenge moko abed afoyo nitimo ticne, ni kum kaka m’abed atimo tije i iye. Abed abedo i dhu mac ma judhuro pi nineno dwi man kor polo m’upong’ ku nyikaluku, ma nwang’u abeng’wiyo ng’wic lum ma thoy mir uthieno uketho ubengw’ii. Abepoy nia abed ayero kumae: “Ng’atu m’ucwiyo gin maeni ceke ucikere nibedo nuti kokoro.” M’uweko maeno, abino i ariti mi timo lembe ma reco ma dhanu gibed gitimo i luba. Wang’ ma pol abed awinjo wec ma reco, man ebino lembe ma yot ira nimadhu taba. E m’umbe galu, an de acaku weco wec ma reco man acaku madhu taba.

Kinde ma oro para udoko 18, adok akwo i Sydney. Atimo kero nimondo i tic mir askari, ento juyiya ngo, pilembe asomo ngo. Agam anwang’u tic mange man abedo oro acel i Sydney. I saa maeca re m’arombo ku Jumulembe pa Yehova wang’ ma kwong’a. Kinde ma gilwong’a i coko migi, ayiyo man ndhundhu awok anyang’ nia ponji migi utie lemandha.

Ento i ng’eye nyanok, agam ang’iyo nidok i pacu. Awok ajik i Goondiwindi i Queensland. E anwang’u tic man agamu dhaku, ento lem ma rac, acaku madhu kong’o kendo.

Wanyolo awiya ario waku dhaku para. I ng’ei nyolo awiyane, Acaku paru cuu mandha iwi ayi m’abetiyo ko ku kwo para. E agam apoy pi gin m’awinjo i coko mi Jumulembe i Sydney man amaku yub pi nitimo lembe moko pi gin m’agam awinjone.

Apodho iwi Otkur ma Wiw moko ma con ma tie kud adres mi Bethel mi Jumulembe pa Yehova mi ng’om mir Australie. E aoro barua pi nikwayu nia gikonya. Pi nidwoko wang’ kwac para, Jamulembe moko ma dhanu ma yoo man ma jamer ubin uliewa. E m’umbe galu ecaku ponjo Biblia kuda.

KITE MA BIBLIA ULOKO KO KWO PARA:

Anyang’ nia ukwayu atim alokaloka ma lee i kwo para kinde m’acaku ponjo Biblia. Kud i kind verse mi Biblia m’umulo adundena akeca, moko ubino 2 Jukorinto 7:1. Verse maeno ubetielo cwinywa nia “wadwokara leng’ ni gin ceke ma cido kum.”

Wang’ acel ang’iyo niweko madu taba man mer ku kong’o. Ebino yot ungo nitimo alokaloka maeno, kum nwang’u dong’ enyang’ i rimba pi oro ma lee. Ento agam akeco nikwo i ayi ma nyayu anyong’a i Mungu. Nitiyo ku cik mir ukungu ma nwang’ere i Jurumi 12:2 re m’ubino ira ku kony ma lee, m’uwacu nia, “wuwek niwotho nimakere ku ng’om maeni, ento wuwek Mungu ulok ayi ma wuparu ko lembe.” Anyang’ nia kara alok kura para, ubekwayu alok paru para man anen kura para i ayi ma Mungu ubenene ko, niwacu anene nia etie rac. Pieno, ku kony pare, aweko nimadhu taba man nimer ku kong’o.

Niweco wec ma reco re m’ubino ira lembe ma tek magwei. Ang’eyo juk mi Biblia ma nwang’ere i Juefeso 4:29 m’uyero nia, “wec m’utop kud uwok ki kud i dhogwu.” Re kadok kumeno de, atuc ungo nicaku weco wec ma cuu ndhundhu. Ninyamu i lembe ma e mi verse pa Isaya 40:26 m’uweco pi nyikaluku ukonya: “Wung’ai weng’u malu, man wunen ng’atu m’ucwio maeni, m’uwodho udulgi de woko ku wel; elwong’ogi ceke ku nying’gi; ku dit mi tego pare, man kum en e jatego i tego, acel de mbe m’urem.” Agam aparu nia, ka Mungu utie ku tego mi cwiyo polo ku ng’om ku piny m’i igi ceke, ma an abed amaru nineno, m’umbe jiji eromo miyo ira tego m’atie ku yenyne kara atim alokaloka pi ninyayu anyong’a i iye. E nok nok, nikadhu kud i rwo man kero ma lee, ajigo niweco wec ma reco.

BERO M’AGAM ANWANG’U:

Saa m’abino timo tic i luba calu jakwac, abed aweco ngo akeca ku dhanu, pilembe dhanu tie lee ngo i luba kaka m’abed atimo tic i iye. Ento ni kum ponji m’anwang’u i coko mi Jumulembe pa Yehova, aponjo kite m’aromo weco ko ku dhanu. Aponjo bende niweco ku dhanu iwi lembanyong’a mi Ker pa Mungu.​—Matayo 6:9, 10; 24:14.

Oro udaru kadhu lee kawoni niai m’abetimo calu jadit cokiri. Aneno nia etie rwom nitimo ku kero para ceke pi nikonyo umego ku nyimego para ma gitie Jukristu. Ento mugisa para ma lee utie nidikiri pi nitimo ni Yehova karacelo ku nyaramara para man awiya para ma beco.

Abefoyo Yehova m’uyiyo nia, an m’a ng’atu m’usomo nyanok, anwang’ ponji i bang’e. (Isaya 54:13) Ayiyo m’umbe jiji wec mi Lembrieko 10:22, m’uwacu kumae: “Mugisa pa Yehova, elonyojo.” An ku juruot para wabekuro kud ava niponjo lembe lee iwi Yehova man nitimo ire rondo ku rondo.