Biblia uyero lembang’o iwi wodhoic?

Lembe ma Biblia udwoko

Biblia utiyo ngo ku wec ma nia “wodhoic” pi ninyutho kabu akaka kwo pa nyathin moko ma nwang’u ucaku. Ento verse ma pol mi Biblia, copo konyowa ning’eyo nen ma Mungu utie ko iwi kwo mi dhanu, uketho i iye kadok kwo pa nyathin ma fodi unyolere ngo.

Kwo utie giramiya m’uai i bang’ Mungu. (Thangambere 9:6; Zaburi 36:9) I wang’ Mungu, kwo ceke pigi tie tek, kadok kwo pa nyathin ma fodi n’i ic. Pieno, ka ng’atu moko ukabu kwo pa nyathin ma fodi unyolere ngo akakaka, eno nwang’u enego nek.

Cik ma Mungu ugam umiyo ni nyithindho mir Israel uyero kumae: “Tek dhanu gidhau karacelo, man gitimo dhaku ma ie nuti rac, ketho ie dubre, man lembe ma rac ulube ngo; jubiketho eculo andha, calu ma cwar dhaku biketho i wie; man ebiculo calu jupoklembe ng’olo. Ento tek lembe ma rac ulube, ibilund culo kwo pi kwo.”​—Ai 21:22, 23.a

• Kwo pa dhanu caku saa ma kani?

• Nyo Mungu biweko ni ng’atu moko m’ugam uwodho ie?

• Nyo etie rac niwodho ic ka kwo pa min nyathin kunoke pa nyathin ni i ariti?

Kwo pa dhanu caku saa ma kani?

Niai ma ic upodho tap ci, Mungu neno nia kwo udaru caku. I Biblia ma tie Lembe pare, Mungu unyutho wang’ ma pol nia eneno nyathin ma fodi unyolere ngo ni dhanu ma zoo. Wakenen lapor moko m’unyutho nia i wang’ Mungu, tung’ tung’ umbe i kind kwo pa nyathin ma fodi ni i min ku pa ng’atu ma dong’ unyolere.

• I the telowic mi tipo ma leng’, Ubimo Daudi uyero ni Mungu kumae: “Weng’i nena ma fodi k’adoko cuu ngo.” (Zaburi 139:16) Mungu uneno Daudi nia dong’ etie dhanu ma zoo ma nwang’u fodi junyole ngo.

• Rom rom kumeno, Mungu ular ung’eyo nia ebibedo ku lembakeca ma segi pi jabila Yeremia ma nwang’u fodi junyole de ngo. Mungu uyero ire kumae: “Ma fodi ang’ini ngo i ic, nwang’u ang’ei, man ma fodi k’iwok ngo kud i ic nwang’u adwoki leng’; akethi ni jabila ni thek.”​—Yeremia 1:5.

• Munganga Luka m’ukiewo buku moko mi Biblia, utiyo ku wec ma rom mi dhu Jugiriki pi niweco iwi nyathin ma fodi unyolere ngo man pi nyathin ma dong’ junyolo.​—Luka 1:41; 2:12, 16.

Nyo Mungu biweko ni ng’atu moko m’ugam uwodho ie?

Mungu copo weko ni dhanu ma gigam giwodho igi. Ka tin eni giyiyo nen ma Mungu utie ko iwi kwo, kwayu ngo giwek can m’akeca unurgi. “Yehova en e won kisa ku bero . . . Calu yo nyangu bedo bor ku yo reto, e ecoro kier mwa bor kumeno kud i kumwa.”b (Zaburi 103:8-12) Yehova biweko ni dhanu ceke ma giyewo ku cwinygi ceke dubo ma gigam gitimo con, dok ebed wodhoic.​—Zaburi 86:5.

Nyo etie rac niwodho ic ka kwo pa min nyathin kunoke pa nyathin ni i ariti?

Nimakere ku lembe ma Biblia uyero iwi kwo pa nyathin ma fodi unyolere ngo, ng’atini umbe ku thelembe mi wodho ic pilembe ubenen ve min nyathin kunoke nyathin romo nwang’ere i ariti.

E ka dong’ ariti moko ma lee uwok i saa mi gonyiri m’uketho ubekwayu nia i kind nyathin ku min, jung’ii nibodho kwo pa ng’atu acel ke? I saa ma kumeno, dhanu ma lembene umulo kumgi gicikiri nitimo ng’iyong’ic migi gigi pi ning’eyo nia kwayu jubodh kwo pa ng’a.