Icopo nwang’u kwiyocwiny i saa mi peko

1. “Kwiyocwiny pa Mungu” utie ang’o, man wanwang’u bero ma kani ka watie kude? (Jufilipi 4:6, 7)

KWIYOCWINY moko nuti ma dhanu m’i ng’om maeni ging’eyo pire ngo. Etie “kwiyocwiny pa Mungu,” niwacu bedomoth ma wanwang’u i cwinywa ka watie ku winjiri ma ceng’ini ku Wegwa m’i polo. Wabedo museme ka watie ku kwiyocwinyne. (Som Jufilipi 4:6, 7.) Wabedo ku winjiri ma ber ku jumange m’umaru Mungu. Bende, wabedo ku winjiri ma ceng’ini ku “Mungu mi kwiyocwiny.” (1 Thes. 5:23) Ka wang’eyo Wegwa m’i polo, wagene, man wabewore, kwiyocwiny pare juko adundewa kinde ma wabenwang’ara i lembe mir ang’abacwiny.

2. Pirang’o cwinywa tek nia ecopere nibedo ku kwiyocwiny pa Mungu?

² Nyo ecopere andha nibedo ku kwiyocwiny pa Mungu ka wabenwang’ara ku peko ma calu ve thong’om, lembe ma wok rek, yakini mi lwak dhanu kuonke ragedo? Lembe maenogi ceke copo piko lworo i iwa. Yesu umiyo juk ni julubne, ewacu kumae: “Cwinywu kud upidi man lworo de kud unegwu.” (Yoh. 14:27) Lembe mi mutoro utie nia, umego ku nyimego gitiyo ku juk pa Yesu. Ku kony pa Yehova, ginwang’u kwiyocwiny saa ma gibino nyego ku peko dupa ma dongo.

PI NINWANG’U KWIYOCWINY I SAA MI THONG’OM

3. Thong’om copo nyotho kwiyocwiny mwa nenedi?

³ Thong’om copo wilo ayi kit kwo mwa i kadhiri ma lee mandha. Wakenen adwogi ma Korona ukelo ni dhanu dupa. Rapor moko unyutho nia, wel ma kadhu nusu mi wend dhanu iwi ng’om ubed unindo ngo cuu i saa mi thong’om. Thong’om uketho adieng’acwiny, turcwiny, madhu kong’o, tiyo ku dawa mi mero, dhau i ot man negiri gijo umedere ameda. Tek thong’om utie i kabedo m’ikwo i iye, icopo timo ang’o kara cwinyi kud ung’abere man kara inwang’ kwiyocwiny pa Mungu?

4. Pirang’o ning’eyo lembila ma Yesu uewo pi nindo mi kajik ceng’ miyo iwa kwiyocwinyi?

⁴ Yesu ular uyero nia i nindo mi kajik ceng’, thong’om bibedo nuti “i kabedo ma tung’ tung’.” (Luka 21:11) Ng’eyo lembuno copo miyo iwa kwiyocwiny nenedi? Ka thong’om utundo, lembene wang’u iwa ngo, kum wang’eyo nia lembe maeno ubetimere calu ma Yesu uyero. Pieno, wan wabiworo mwa juk ma Yesu umiyo ni dhanu ma gibekwo i nindo mi kajik ceng’ nia, “cwinywu kud ung’abere.”​—Mat. 24:6.

5. (a) Nimakere ku Jufilipi 4:8, 9, wacikara nirwo pi lembang’o kinde wabenyego ku peko mi thong’omi? (b) Winjo som mi Biblia ma jumaku copo miyo iwa kony ma kani?

⁵ Thong’om kan upodho, lembene nyayu lworo man mielkum. Lembuno unwang’u nyamego Desi.b Kinde m’umin won, wod umin won ku dokta m’ubino thiedhogi ceke githo ku Korona, lworo umake nia en de thoje bimake man nia ebidage i kum wang’u mire ma dong’ utii. Thong’omne uketho cwinye ubino dieng’ nia ka tic uweke, ebibedo mbe ku copo mi ng’iewo gin ma gicam man mi culo ot. Lworo mi lembuno uketho nindo de ubed uwok ungo i wang’e ku diewor. Re Desi udok unwang’u kendo kwiyocwiny. Nenedi? Erwo athothi i bang’ Yehova pi lembene, ekwaye nia ekonye ebed ma kume ukwiyo man ku paru ma cuu. (Som Jufilipi 4:8, 9.) Ebed ewinjo Yehova nikadhu kud i som mi Biblia ma jumaku. Ewacu kumae: “Dwal ma yoo ma jubesomo ko piny, ukwiyo cwinya man epoyo wiya i kum kisa pa Yehova.”​—Zab. 94:19.

6. Ponji peri ma segi man coko copo konyi nenedi?

⁶ Andha thong’om copo cerowa nitimo lembe moko ma nwang’u wang’iyo ko, re kud iwek lembene uceri nitimo ponji peri ma segi kunoke nidikiri i coko. Lembe m’umego ku nyimego mwa gikadhu kud i iye ma nwang’ere i girasoma man i video mwa, bipoyo wii nia umegone gicungo ma tek i tipo, kadok kud i peko ma kumeno. (1 Pet. 5:9) Coko bikonyi nibedo ku paru mi lembe ma ber mi Biblia. Bende, ebimiyo iri kaka m’ibitielo ko cwiny jumange man ma gin de gibitielo ko cwinyi. (Rum. 1:11, 12) Kan iparu pir ayi ma Yehova ubed ukonyo ko jurutic pare kinde ma giberemo, kinde ma lworo ubenegogi, kunoke kinde ma ginwang’iri nia gitie kendgi, yiyoyic peri bidoko tek man cwinyi bibedo tek nia ebikonyi bende.

7. Lapor pa jakwenda Yohana ubemiyo iri ponji ma kani?

⁷ Tim kero ibed iwec kud umego ku nyimego peri. Thong’om moko copo kwayu nia kindwa ubed bor bor ku jumange kadok ku juyic wadwa. I saa maeno icopo winjiri ve jakwenda Yohana. Emito nang’ ginen ku jarimbe ma Gayo wang’ ku wang’. (3 Yoh. 13, 14) Re eng’eyo nia pi saa moko ecopo nen ungo kude, uketho ekiewo ire barua. Pieno, tek ecopere ngo iri ninen kud umego ku nyimego peri wang’ ku wang’, pim niweco kugi ku simu, ku video, kunoke ku mesaj. Kan icuku weco ku juyic wedu, ibinwang’u nia itie ngo kendi man cwinyi bikwiyo. Tek inwang’u nia cwinyi ubedieng’ akeca ke, nyuth pi lembene ni judong cokiri man jol tielocwiny ma ku mer ma gibimiyo iri.​—Isa. 32:1, 2.

PI NINWANG’U KWIYOCWINY I SAA MI PEKO MA WOK REK

8. Peko ma wok rek copo nyotho kwiyocwiny peri nenedi?

⁸ Tek idaru nweng’iri ku peko mi pong’ pa pii, digidi, kunoke mac m’uwang’u piny, adieng’a mi lembene copo galu i ii pi nindo ma lee. Tek wedi peri utho i lembene, kunoke piny peri unyothere, can copo mondo i cwinyi, iromo bayu genogen kunoke ng’eicwiny romo meki. Eno nyutho ngo nia imaru giki mi kum akeca, kunoke ya yiyoyic peri nok. Calu m’ikadhu kud i lembe ma tek, jumoko romo paru nia icopo bedo ku nen ma rac. (Yob 1:11) Re kadok kud ipeko eno de, iromo nwang’u kwiyocwiny. Nenedi?

9. Yesu ular upoyowa nenedi pi peko ma wok reki?

⁹ Poy i kum lembe ma Yesu uewo. Tung’ ku dhanu ma giparu nia lembe ma wok rek bitundo ngo i wigi, wan wang’eyo nia lembene bimedere ameda man pekone moko copo mulo kumwa bende. Yesu uwacu ni julubne nia “digidi ma dongo” ku peko mange ma rek bilar timere ma fodi ajiki uwok ungo. (Luka 21:11) Ewacu bende nia “turocik binyay” man andha lembene ubenen tin, calu ve timo ma reco, rop, man nek mi ju m’ujai. (Mat. 24:12) Ku lemandha, Jumulembe pa Yehova dupa gidaru nwang’iri ku peko maenogi. Yesu uwacu ngo nia ka wabenwang’ara ku peko ma kumeno, eca nyutho nia Yehova ubedieng’ ungo piwa. (Isa. 57:1; 2 Kor. 11:25) Yehova copo gwokowa ngo i ayi mir udu i peko ceke ma romo wok, ento emiyo iwa gin ma watie ku yenyne kara wabed ku kwiyocwiny.

10. Pirang’o nilar yikiri kawoni pi peko ma wok rek nyutho nia watie ku yiyoyic? (Lembrieko 22:3)

¹⁰ Ebibedo iwa yot nibedo ma kumwa ukwiyo tek walar wayikara ma fodi lembe ma wok rek utundo ngo. Nyo nilar yikiri nyutho nia wambe ku yiyoyic i Yehova? Ungo. I andha, ka walar wayikara nyutho nia watie ku yiyoyic i copo m’eromo gwoko kowa. Nenedi? Lembe pa Mungu ubekwayuwa nia wayikara pi peko ma romo wok. (Som Lembrieko 22:3.) Dilo pa Mungu udaru poyowa wang’ dupa nikadhu kud i gazeti, coko, man atwong’a nia walar wayikara pi peko ma wok rek.c Nyo watie ku genogen iwi Yehova? Ka eyo, wabiworo juk maeno niai kwoni ma fodi peko uwok ungo.

11. Lapor pa Margaret ubemiyo iri ponji ma kani?

¹¹ Wakewec iwi lembe ma nyamego Margaret unwang’ere ko. Gavmenti ung’olo nia ewek pacu pare pio pi mac m’ubewang’u luli ceng’ini kude. Calu dhanu zoo umuk ku ng’wec, e ndaki ucikere ku mutukari man kadhu ubedo tek. Kor polo ke ucido ku yiro, man Margaret de ucungo pi saa ma lee ku mutukari pare. Re gin m’ubodhe utie nia elar eyikere i wang’e. I sakoc pare ebino ku kart moko m’ecopo neno kara ukonye enwang’ yo mange. En re m’elar ekadhu pio i yoje ku mutukari pare pi nitundo kaka m’ukwayere. Wabefoyo Margaret, pilembe yikiri pare ubodhe.

12. Pirang’o wacikara niworo telowic ma jubemiyo iwa?

¹² Pi nigwoko lwak dhanu, jurucik copo ng’olo nia jubed i pacu pi kare moko, kunoke juwor telowic moko mange ma jumiyo. Dhanu cwinygi nwang’ niworo telowic maeno pilembe nwang’u gibemito ngo giring giwek piny migi i ng’eygi. Jakristu ucikere nitimo ang’o saa maeno? Biblia ubewacu iwa kumae: “Pi Rwoth, wuwor yub ceke ma dhanu uketho, dok ebed ubimo pilembe etie ku dito, kadi jubim m’i ng’eye pilembe eorogi” en. (1 Pet. 2:13, 14) Dilo pa Mungu de ubeweko ngo nimiyo iwa telowic kara ugwokwa. Wang’ ma pol jubed jupoyo wiwa nia wamii namba simu mwa ni judong cokiri, kara ginwang’ kaka ma wan’i iye ka lembe moko uwok. Nyo idaru miyo peri? Wacopo nwang’u bende telowic nia wabed kii i pacu, nia waringi, man iwi ayi mi nwang’u kony, kunoke pi kite man saa m’umito jukony ko jumange. Ka wabeworo ngo telowic maeno, waromo ketho kwo mwa giwa i ariti man mi judong cokiri bende. Poy nia judong cokiri gibeneno wiwa pi nigwokowa. (Ebr. 13:17) Nyamego Margaret uwacu kumae: “Andha ayiyo nia woro telowic mi judong cokiri man mi dilo pa Mungu re m’ubodho kwo para.”

13. Ang’o m’ukonyo umego ku nyimego dupa ma giweko pacu migi, nibedo asu kud anyong’a man kwiyocwinyi?

¹³ Umego ku nyimego dupa ma giweko pacu migi pi peko ma wok rek, pi lwiny, kunoke pi yakini mi dhanu, gitimo kero ning’iyo ku kwo ma nyen ma gimondo i iye man nimiyiri m’umbe galu i tic pa Yehova. Gibemediri ‘nitwong’o pi lembanyong’a mi lembe pa Mungu,’ calu ma Jukristu mi rundi ma kwong’a gitimo kinde ma julalugi pi ragedo. (Tic. 8:4) Rweyo lembanyong’a ubekonyogi niketho wigi i kum Ker pa Mungu, kakare niparu kwa pi peko migi. Lembuno uketho gitie asu kud anyong’a man kwiyocwiny.

PI NINWANG’U KWIYOCWINY I SAA MI RAGEDO

14. Ragedo copo nyotho kwiyocwiny mwa nenedi?

¹⁴ Ragedo copo nyotho lembe dupa ma miyo iwa kwiyocwiny. Anyong’a negowa ka wabedikara karacelo ku jumange, waberweyo lembanyong’a, man wabetimo lembe mange ma wang’iyo ko m’umbe nilworo nia jubitwiyowa. Ka wambe ku bedagonya mi timo lembuno, cwinywa romo ng’abere pi lembe ma copo wok i ng’eye. Lworo maeno tie rac ungo. Re mito wabed ku wang’wa ; kum Yesu uyero nia ragedo copo ketho julubne kier. (Yoh. 16:1, 2) Dong’ waromo bedo asu ku kwiyocwiny nenedi saa ma jubenyayu ragedo i kumwa?

15. Pirang’o wacikara ngo nilworo ragedo? (Yohana 15:20; 16:33)

¹⁵ Lembe pa Mungu ubewacu kumae: “dhanu ceke ma gibemito giwor Mungu man gibed ku winjiri ku Kristu Yesu gibinwang’iri bende ku ragedo.” (2 Tim. 3:12) Yiyo lembuno ubino tek ni umego Andrei kinde ma jukwero tic mwa i ng’om m’ebekwo i iye. Eparu kumae: ‘Jumulembe pa Yehova utie dupa i ng’ombuni. Ecopere andha nia gavmenti utwii wan ceke?’ Re kakare ma paru maeno uketh Andrei ubed ku kwiyocwiny, elund ebedo kwa kud ang’abacwiny. Umego mange gibed giweko lembene i cing’ Yehova. Ging’eyo nia jucopo twiyogi, lembuno uketho gibino mbe kud adieng’a ma hai calu Andrei. E Andrei de unwang’u nia mito ebed ku pidoic ma rom ku migi man eketh genogen pare zoo iwi Mungu. Enwang’u kwiyocwiny ndhundhu i ng’eye, man kawoni etie kud anyong’a kadok kud i kind peko. Wan de wacopo nwang’u anyong’a. Saa ma Yesu uyero nia jubinyayu ragedo i kumwa, eyero bende nia wacopo gwoko bedoleng’ mwa.​—Som Yohana 15:20; 16:33.

16. Wacikara niworo telowic ma kani i saa mi ragedo?

¹⁶ Ka jukwero tic mwa i ng’om ma wakwo i iye, kunoke jukwero ayi tije moko, wacopo nwang’u telowic pi lembene kud i filial kunoke i bang’ judong cokiri. Telowicne utie pi nigwokowa, pi niketho wanwang’ cam mi tipo, man pi nikonyowa wamedara nirweyo lembanyong’a i kadhiri ma wacopo. Tim kero iwor telowic m’ibenwang’u, kadok nang’ inyang’ ungo cuu i thelembe m’uketho jumiye de. (Yak. 3:17) Bende, kud inyuth lembe moko ki iwi umego ku nyimego, kunoke lembe mi cokiri ni ju ma gimbe ku twero mi ng’eyo lembene.​—Ekl. 3:7.

17. Wakeco nitimo ang’o calu ma jukwenda gitimo i rundi ma kwong’a?

¹⁷ Kud i kind thelembe ma Sitani ubekiedo ko lwiny i dhu dhanu pa Mungu acel utie pilembe “ginwang’u tic mi miyo lembatuca iwi Yesu.” (Nyu. 12:17) Kud iwek Sitani ku ng’om pare ginyay lworo i ii. Rweyo lembanyong’a man ponjo dhanu kadok kud i kind ragedo miyo iwa anyong’a man kwiyocwiny. I rundi ma kwang’a saa ma judong Juyahudi ging’olo nia jukwenda giwek nirweyo lembanyong’a, jukwenda ging’iyo migi niworo Mungu. Gimediri asu nirweyo man tije uketho gibedo kud anyong’a. (Tic. 5:27-29, 41, 42) I andha ka jucero tic mwa, wacikara nibedo ku wang’wa ka waberweyo. (Mat. 10:16) Ka watimo lembene ku kero mwa ceke, wabinwang’u kwiyocwiny pilembe wabenyayu anyong’a i Yehova man wabetimo tic ma bodho kwo.

“MUNGU MI KWIYOCWINY BIBEDO KARACELO KUDWU”

18. Wacopo nwang’u kwiyocwiny mandha i bang’ ng’a?

¹⁸ Cwinyi bed tek nia kadok i saa mi peko ma lee de, wacopo bedo ku kwiyocwiny. Saa maeno mito wapoy nia kwiyocwiny ma watie ku yenyne utie kwiyocwiny pa Mungu, ma Yehova kende re ma miyo. Jengiri i wiye kinde m’ibenweng’iri ku peko mi thong’om, peko ma wok rek, kunoke ragedo. Bed kii i dilo pare. Keth wii i kum mugisa ma wang’u ijo m’ubekuri i nindo m’ubino. Kan itimo kumeno, e ‘Mungu mi kwiyocwiny bibedo karacelo kudi.’ (Filip. 4:9) I thiwiwec m’ulubo, wabineno ayi ma wacopo konyo ko Jukristu wadwa ma gibenwang’iri ku peko kara gibed ku kwiyocwiny pa Mungu.