Wamed bodho mwa i tic mi rweyo lembanyong’a​—Nikonyo dhanu m’ibeponjo kugi Biblia gitim mediri nitundo githier kwo migi ni Mungu man gilim batizo

PIRANG’O PIRE TIE TEK NITIMO KUMENO: Kara juponj Biblia ginwang’ bero pa Yehova, gicikiri nithiero kwo migi ire man nilimo batizo. (1Pet 3:21) Dhanu ma gibekwo nimakere ku thieriri migi, ginwang’u gwok mi tipo. (Zab 91:1, 2) Jakristu thiero kwo pare ni Yehova ento ungo ni ng’atu moko, ni tic kunoke ni dilo moko kumeni. Pieno, juponj Biblia gicikiri nimaru Mungu man ninyutho foyofoc migi ire.​—Rum 14:7, 8.

KITE MA JUROMO TIMO KO:

• I saa mi ponji mi Biblia, wuwec ku ng’atu m’ibeponjo kude Biblia iwi lembe ma ponjine ubenyutho iwi Yehova. Keth peko nia ebed esom Biblia kubang’ ceng’ man erwo “areri” ibang’ Yehova.​—1Tes 5:17; Yak 4:8

• Keth cwiny ng’atu m’ibeponjo kude Biblia nia eketh thieriri man batizo ubed ire ni lembakeca mi tipo. Konye bende nia etim lembakeca mi tipo m’ecopo pong’o i kind nindo ma ceng’ini, calu ve nidwoko wang’ penji i coko kunoke niyero lembe m’ebeponjo ni judhugola pare man ni jurutic wadi. Ng’ei nia Yehova diyo ngo ng’atu moko adiya nitimo ire. Thieriri tie yub ma ng’atini maku en gire.​—Poi 30:19, 20

• Keth cwiny ng’atu m’ibeponjo kude Biblia nia etim alokaloka m’ukwayere kara enyai anyong’a i Yehova man ebed ng’atu m’uromo pi nilimo batizo. (Rie 27:11) Saa moko nyo etie ku kura man timo moko ma cuu ngo m’udaru ninyang’ lee, pieno ukwayu jumediri nikonye kara ewany ng’atu macon cen man edok erony ng’atu manyen. (Ef 4:22-24) Wec kude iwi thiwiwec matung’ tung’, m’uyero “Biblia loko kwo (La Bible transforme des vies)” ma bewok i La Tour de Garde

• Kor ire pir anyong’a m’inwang’u pilembe ibetimo ni Yehova.​—Isa 48:17, 18