PONJI MIR 11

Niweco ku yaw yaw

Jurumi 12:11

LEMBE M’ICOPO TIMO: Wec i kite ma copo mio amora i kum ju m’ubewinji, man ma copo yawu kumgi.

Royiri i lembe m’ibeponjo. Kinde m’ibeyiko ponji peri, par pi kony ma ponjine bimio ni dhanu. Tim kero ing’ei cuu gin m’ibeciponjo, kara iwok iponje niai kud i adundeni.
Dieng’ pi juwinj. Par pi bero ma lembe m’ibisomo kunoke m’ibiponjo copo mio ni jumange. Ponj lembe i ayi ma copo konyo ju m’ubewinji ginen kamaleng’ bero ma ponjine copo mio igi.
Mii tego i ponji peri. Wec ku yaw yaw. Tii ku jeste m’ukwayere, man ayi mi weng’i unyuth kamaleng’ nia in de iyio andhandha gin m’ibeponjo.

Kud ibed itim kwa kit jeste acel kum eno copo olo dhanu. Tim jeste m’urombo ku lembe m’ibeyero. Wec ku yaw yaw kinde m’ibeyero lembe moko ma pire tek, kunoke saa m’ibemio amora i kum dhanu kara gitim lembe moko. Re kud iwec ku yaw yaw m’ukadhu mukero niai i acaki mi ponji peri nitundo i ajikine, kum eno copo badhu cwiny dhanu.