Kite ma juromo nitio ko ku buku —Biblia ubeponjowa ku lembang’o?

Buku Biblia ubeponjowa man Biblia ponjo gitie buku ma girombo. Jamtic ario maeno ma nwang’ere i sanduku mwa mi jamtic mi ponjo Biblia ku dhanu, gitie ku lemandha ma rom man m’upangere de i kite ma rom. Ento, buku Biblia ubeponjowa utie ku wec ma yot man paru de ma yot. Juyike pi dhanu ma gicopo bedo ku peko mi nyang’ i buku Biblia ponjo. Buku Biblia ubeponjowa utie ku thenge ma jumedo m’ukoc ku thenge ma jumedo mi buku Biblia ponjo; thenge maeno ukoro i kite ma yot, wec moko man lembe ma nwang’ere i udukuwec ma tung’ tung’ mi wic madit. I acaki mi wicman, junwang’u ngo penji ma dongo, man i thumne de, junwang’u ngo sanduku m’uculo wang’ penjinegi. Ento, wicman uthum ku lemadha ma dongo dongo mi Biblia ma judaru weco pigi i wicne. Jucopo nimio buku Biblia ubeponjowa ni dhanu saa moko ci, tap calu ma jubed jumio ko Biblia ponjo, kadok nwang’u jupangu ngo nia jubimie i dwi ma wutie i ie. Wacopo tio nenedi ku thenge masegi mi buku Biblia ubeponjowa kinde ma wabetelo wi ponji mi Biblia?

LEMBE MA DONGO DONGO: Dhanu dupa gibed gimaru ayi ma watelo ko wi ponji mi Biblia, niwacu, nisomo udukuwec i buku Biblia Ponjo man ing’eye nipenjo penji. Re, kepar nia ng’atu m’ibeponjo kude Biblia ung’eyo ngo cuu dhok ma wubetimo ponjine i ie kunoke esome ngo cuu. Kan ibeponjo ku ng’atu ma kumeno, icopo ng’io nitio ku buku Biblia ubeponjowa. Man icopo tio ku thenge mi lembe ma dongo dongo pi nitelo wi ponjine, man niketho cwinye nia ebed esom udukuwec ma tung’ tung’ gire i saa mange. Jucopo niponjo lemandha acel mi Biblia pi dakika 15 kumeni. Calu ma jukoro ngo lembe lee akeca i thenge mi lembe ma dongo dongo, japonjo ucikere niyikere cuu nimakere ku yeny pa japonj Biblia. Ka japonjo ubetelo wi ponji ku thenge ma tie kud udukuwec, ecopo nitio ku thenge mi lembe ma dongo dongo pi nidok iwi lembe ma giponjo i wicne.

THENGE MA JUMEDO: Wec ma tung’ tung’ ma nwang’ere i thenge ma jumedo upangere i kite m’epangere ko i thenge ma tie kud udukuwec. Japonjo copo ning’io nia giwec iwi thenge ma jumedo mi buku Biblia ubeponjowa i saa ma gibetimo ponji kunoke ngo.