Wubai mungu m’araga cen kud i kindwu

Yakobo ugam ung’eyo cuu nia ukwayu juwor Yehova kende, kadok nwang’u fodi emio ngo cik m’ukwero woro mungu m’araga de. (Ai 20:3-5) Pieno, i ng’ei ma Yehova uyero ire nia edok i Bethel, Yakobo ung’olo ni dhanu ceke mi ot pare nia ng’atuman ubai mungu m’araga pare. Yakobo ubayu mungu m’aragane, m’uketho i ie lengethu, ma saa moko nyo gibed gikendo calu rigi. (Th 35:1-4) Ma jiji mbe, lembe ma Yakobo utimo eno unyayu anyong’a lee i Yehova.

Wan ke wacopo nyutho nenedi nia wabeworo Yehova kende? Gin ma kwong’a m’ukwayu watim utie nikoc ku piny ceke m’utie ku winjiri ku mungu m’araga man ku lembe mi pajogi. Eno uketho i ie nibayu piny ceke m’utie ku winjiri ku lembajoga, man ning’io galuwang’ mwa cuu. Ku lapor, kepenjiri kumae: ‘Nyo abed asomo buku kunoke aneno filme ma junyutho i ie ulelu dhanu, karacika, kunoke lemb thangu? Nyo galuwang’ para cwaku nia timo thangu, lamu bila kunoke kwong’okwong’ utie rac ungo?’ Wacikara nikoc bor ku gin moko ci ma Yehova udagu.​—Zb 97:10.

NEN VIDEO MA THIWIE TIE “WUGUT NI WONABALI,” MAN I NG’EYE, DWOK WANG’ PENJI M’ULUBO E:

• 

  Lembang’o m’ugam uwok i kwo pa japonj Biblia moko ma nyinge Palesa?

• 

  Pirang’o etie lembe mi rieko nisayu kony i bang’ judong cokiri tek wan kunoke japonj Biblia mwa ubenwang’ere i lembe moko m’uneno pajogi?

• 

  Tek wamito Yehova ugwokwa, wacikara nikoc magwei ku lembang’o?

• Palesa utimo ang’o ma pire tek?

• Kaka m’ikwo i ie, icopo timo ang’o pi niuro atelatela mi pajogi?