Wajolu welo mwa

I nindo 23 mi dwi mir 3, wabijolo welo ma romo kunoke ma kadhu milioni 12, ma gibibino i Poi pi tho pa Kristu. Ponji ma jakorlembe bimio iwi jamgony ma en e giramia pa Yehova, man iwi mugisa ma jamgonyne bimio ni dhanu i nindo m’ubino, bibedo igi ni lembatuca ma lee dit akeca! (Isa 11:6-9; 35:5, 6; 65:21-23; Yoh 3:16) Re, jakorlembe kende ngo ma bimio lembatuca i nindo maeca ma segi. Wan ceke wacopo diko cingwa nimio lembatuca nwang’u wabejolo welo mwa ku yaw yaw. (Rum 15:7) Wakenen kite moko ma wacopo nitimo ko.

• Kakare nicidho nikuro program ku kakeri, tim kero ijol welo man dhanu m’ukwio i tipo; jolgi ku vonjo man mothgi ku yaw yaw

• Kinde m’ibejolo dhanu m’ing’eyiri kugi m’ilwong’o ubino, jol bende jumange ma julwong’ogi i saa ma jubepoko karatasi mi lwong’o. Lwong’ dhanu m’utundo manyen gibed i ng’eti. Wusom Biblia peri wukugi man wuwer ku buku mi wer peri wukugi

• Ing’ei ponji, bed ayika nidwoko wang’ penji migi. Ka saa tie nyanok pilembe wubemito niweko kaka ni cokiri mange, mak yub mi cidho ing’ei nindo ma nok niliewo ng’atu ma wuweco kude. Kan ing’eyo ngo kabedo ku namba mi telefon pare, icopo yero kumae: “Amito awinj paru peri iwi kite m’ineno program ukadhu ko. Acopo nweng’i nenedi?”