KETH DHANU UDOK JULUB
PONJI MIR 11
Ponj ponji i ayi ma yot
Cik mir ukungu: “Tek wubeyero lembe ma nyang’ i iye tek, jubinyang’ nenedi i lembe ma wubeyero?”—1 Kor. 14:9.
Gin ma Yesu utimo
1. Nen VIDEO, kunoke som Matayo 6:25-27. I ng’eye dwok wang’ penji m’ulubo:
Yesu unyutho nenedi nia Yehova ubedieng’ piwa?
Kadok nwang’u Yesu ung’eyo lembe lee iwi winyo de, re eketho nwoc iwi lembene ma yot ma kani? Pirang’o eno ubino bodho ma beri?
Ponji ma wacopo nwang’u
2. Ka wabeponjo i ayi ma yot, dhanu bipoy i kum gin ma waponjo igi man wabimulo adundegi.
Lub lapor pa Yesu
3. Kud iwec akeca. Kakare nikoro lembe ceke m’ing’eyo iwi ponji moko, keth nwoc iwi paru man’i buku ma wubeponjo. I ng’ey m’ipenjo japonj Biblia ku penji moko, kur dwokowang’ lembe pare ku cirocir. Tek eng’eyo ngo dwokowang’e kunoke emiyo paru m’ukoc ku mi Biblia, tii ku penji mange pi nitiro paru pare. Kan enyang’ i lembe ma pire tek, kadh iwi mange.
4. Kony japonj Biblia unyang’ i winjiri m’utie i kind ponji ma nyen ku m’edaru ng’eyo. Ku lapor, i wang’ nicaku ponji moko m’uweco iwi cer, icopo koro i adundo lembe ma dong’ eng’eyo iwi ju m’utho.
5. Tii cuu ku lapor. I wang’ nitiyo ku lapor moko, kepenjiri kumae:
‘Nyo lapor eni tie yoti?’
‘Nyo japonj Biblia binyang’ i iye ma beri?’
‘Nyo ebikonye nipoy i kum lembe ma pire tek, kakare nipoy i kum laporne kende?’