Nwang’ kony lee i kum som peri mi Biblia

1. Ang’o m’unyutho nia Yesu ubed uneno Lembagora ni gin ma pire teki?

KEPAR nia ibewinjo Yesu ubeponjo ponji. I wec pare, ebedok zoo iwi Lembagora ma leng’, m’ebelwong’o ku wiye! I andha, wec ma kwong’a m’eyero i ng’ey batizo pare, man m’edok eyero i wang’ tho pare, zoo gitie wec m’uai kud i Lembagora.b (Poi. 8:3; Zab. 31:5; Luka 4:4; 23:46) Bende, i kind oro adek ku nusu: Niai i kum batizo nitundo i kum tho pare, Yesu ubed usomo Lembagora i wang’ dhanu kunoke ebed eweco i wiye igi man ebed ekoro iye.​—Mat. 5:17, 18, 21, 22, 27, 28; Luka 4:16-20.

2. Kinde ma Yesu ubedongo, ang’o m’ukonye ning’eyo Lembagora cuu? (Nen cal m’i ng’eye.)

² Oro ma lee i wang’ nicaku tic pare, Yesu ubed usomo man ebed ewinjo Lembe pa Mungu thiri thiri. I pacu, m’umbe jiji ebed ewinjo Maria giku Yosefu gibed gidok iwi wec m’i Lembagora saa ma giweco ku juruot.c (Poi. 6:6, 7) Wacopo yero ma cwinywa tek nia, kubang’ sabatu Yesu ubed ucidho i sinagog ku juruot pagi. (Luka 4:16) Copere nia kinde ma gitundo, ebed ewinjo kilili mandha Lembagora ma jubesomo. I ng’eye, Yesu en gire de ubed usomo Lembagora ma leng’ maeno. Lembuno uketho Yesu ung’eyo Lembagora ang’eya kende ngo, ento emare bende man eweko lembene utel wi timo pare. Ku lapor, kepoy i kum lembe m’utimere i hekalu kinde ma fodi ebino ku oro 12 kende. Juponji m’ung’eyo Cik pa Musa cuu mandha, de “igi uwang’ lii i kum ng’eyong’ec pare man dwokowang’ lembe pare.”​—Luka 2:46, 47, 52.

3. Wabiweco iwi Lembang’o i thiwiwec maeni?

³ Wan de wacopo ng’eyo man wamaru Lembe pa Mungu tek wabesome thiri thiri. Dong’ wacopo timo ang’o kara wanwang’ bero i kum gin ma wabesomo? Lembe ma Yesu uyero ni dhanu ma ging’eyo Cik pa Musa cuu, niwacu ni jugorcik, Jufarisayo man ni Jusadukayo, copo konyowa lee. Judong dini eno gibed gisomo Lembagora wang’ ma pol, re gibed ginwang’u ngo kony i gin ma gibesomo. Yesu uketho peko iwi lembe adek ma nwang’u jugino umaku gitim pi ninwang’u kony i Lembagora. I thiwiwec maeni wabiweco iwi kite ma lembe m’eyero igi bikonyo kowa nimedo copo mwa (1) mi nyang’ i Lembe pa Mungu ma wabesomo, (2) mi nwang’u lonyo mi tipo i iye, man (3) mi weko lembene utwinywa.

SOM BIBLIA PI NINYANG’ I IYE

4. Luka 10:25-29 ubeponjowa ku lembang’o i kum somo Lembe pa Mungu?

⁴ Wamito wanyang’ i thelembe ma wabesomo i Lembe pa Mungu. Kan ungo, gin ma wabesomo bikonyowa ngo cuu. Ku lapor, poy i kum wec m’ubino i kind Yesu ku “ng’atu moko m’ung’eyo Cik cuu.” (Som Luka 10:25-29.) Kinde ma ng’atune upenje pi gin m’umaku etim kara enwang’ kwo ma rondo ku rondo, Yesu udwoke i Lembagora man epenje kumae: “Jukiewo lembang’o i Ciki? Man isomo nia ang’o?” Ng’atuno udwoko lembe m’atira nimakere ku giragora m’uweco iwi maru Mungu man maru wadijo. (Law. 19:18; Poi. 6:5) Re kewinj gin m’edok eyero: “Wada utie ng’a?” Penji eno unyutho nia ng’atuno unyang’ ungo cuu i gin m’ebed esomo, uketho eng’eyo ngo ayi m’ecopo tiyo ko cuu ku giragora maeno i kwo pare.

5. Pirang’o rwo man somo piny yoo konyowa ninyang’ i gin ma wabesomo?

⁵ Wacopo nyang’ cuu i Lembe pa Mungu nwang’u watie ku ng’iyo ma cuu mi somo piny. Lembe moko ni e ma copo konyi. Rwo i wang’ nicaku somo piny. Watie ku yeny mi kony pa Yehova pi ninyang’ i Lembagora; pieno, kwaye ekonyi ku tipo pare ma leng’ kara iketh wii i kum gin m’ibesomo. I ng’eye, some yoo, pio pio ngo. Eno bikonyi ninyang’ i gin m’ibesomo. Icopo some ku dwendi ma tek, kunoke nisome nwang’u ibewinjo Biblia ma jumaku mir asoma. Kan ibewinjo wec ma jumaku pir awinja man ibelube bende iwi karatasi, eno biketho Lembe pa Mungu bimondo i paru peri man i adundeni. (Yoc. 1:8) Kan idaru somne, rwo kendo i bang’ Yehova pi nifoye pi Lembe pare ma tie giramiya, man kwaye ekonyi itii ku lembe m’iai isomo.

6. Nipenjiri ku penji man nikiewo lembe moko nyanok, copo konyi nenedi kinde m’ibesomo pinyi? (Nen bende cal.)

⁶ Lembe mange ario ni e ma romo konyi ninyang’ cuu i Biblia m’ibesomo. Penjiri ku penji iwi gin m’ibesomo. Tek ibesomo kpawa moko i Biblia, icopo penjiri kumae: ‘Eni jubeweco asaga iwi jukani? Ng’a ke m’ubeweco? Ebeweco ni ng’a man ke pirang’o? Lembuni ukadhu kani man ke awene?’ Penji ma kumeno bikonyi niparu man niketho wii i kum lembe ma pigi tek m’ibesomo. Bende, kiew lembe moko nyar adundo kinde m’ibesomo piny. Kan ibekiewo lembe moko, iparu pi lembe m’ibekiewone, man ekonyi ninyang’ ma ber. Bende, kiewo piny konyojo nipoy i kum gin ma jusomo. Iromo kiewo penji m’ibepenjiri ko iwi gin m’ibesomo, adwogi mi sayusac peri; iromo kiewo bende i adundo lembe ma pigi tek, ayi m’icopo tiyo ko ku lembe m’isomo, kunoke ayi m’ibewinjiri ko pi gin m’isomone. Kiewo lembe ma kumeno copo konyi nineno Lembe pa Mungu ni wec ma Mungu ubeyero iri athothi.

7. Kite ma kani ma romo konyowa kinde ma wabesomo Biblia, man pirang’o pire tie teki? (Matayo 24:15)

⁷ Yesu unyutho nia kite ma ber ma pire tek ma romo konyowa ninyang’ i Lembe pa Mungu utie ng’iyo i lembe. (Som Matayo 24:15.) Ng’iyo i lembe utie ang’o? Ng’iyo i lembe utie copo mi nyang’ i winjiri m’utie i kind paru moko ku mange, mi neno tung’ tung’ ma n’i kindgi, man mi nyang’ i lembe ma juyero ngo ter ter. M’umedo maeno, Yesu unyutho bende nia mito wabed ku ng’iyo i lembe kara wanen lembe m’ubepong’o lembila mi Biblia. Watie ku yeny mi kite maeno kara wanwang’ kony i lembe ceke ma wabesomo i Biblia.

8. Wacopo somo piny ku ng’iyo i lembe nenedi?

⁸ Yehova bekonyo jurutic pare ning’iyo i lembe. Pieno, mito wakwaye ekonywa waceg kite mi ng’iyo i lembe. (Rie. 2:6) Dong’ icopo timo nenedi nimakere ku kwac peri? Ng’ii cuu i gin m’ibesomo, man nen winjiri m’utie i kind lembene ku gin m’idaru ng’eyo. Tii ku jamtic mwa ma konyowa niponjo lembe mi Biblia. Ku lapor, iromo tiyo ku Buku mi timo sayusac mi Jumulembe pa Yehova. Jamtic maeno bikonyi ninyang’ i giragora moko mi Biblia man nineno ayi m’iromo tiyo ko ku lembene i kwo peri. (Ebr. 5:14) Tek ibesomo piny ku ng’iyo i lembe, nyang’ peri i Lembagora bimedere ameda.

SOM BIBLIA PI NINWANG’U LONYO MI TIPO

9. Lemandha ma kani mi Lembagora ma pire tek ma Jusadukayo gibed gidieng’ ko ngo?

⁹ Jusadukayo ging’eyo cuu mandha lembe m’i buku abic ma kwong’a mi Lembagora mi dhu Juebrania, re gibed gidieng’ ungo ku lemandha ma pire tek ma nwang’ere i buku maeno ma Mungu uyuyo i wiye. Ku lapor, kinde ma gibino mulo i Yesu pi cer, Yesu upenjogi kumae: “wusomo ngo i buku pa Musa, iwi lembe ma jukoro pi yen m’udinyo nia Mungu uwacu ire kumae: ‘An a Mungu pa Abraham, Mungu pa Isak, man Mungu pa Yakobo’?” (Mark. 12:18, 26) Kadok Jusadukayo gisomo giragora maeno wang’ dupa de, re penji ma Yesu upenjo kogi unyutho kamaleng’ nia gibino dieng’ ungo ku ponji mi cer ma tie lemandha ma pire tek.​—Mark. 12:27; Luka 20:38.d

10. Wacikara niketho wiwa i kum lembang’o kinde ma wabesomo Biblia?

¹⁰ Ponji utie ang’o iwa i lembe maeno? Ka wabesomo Biblia, mito waketh wiwa i kum lembe ceke ma giragora ubeponjo kowa. Mito ngo waketh wiwa kende kende i kum ponji mir ukungu, ento bende wamed nyang’ mwa i kum lemandha man i kum cik mir ukungu m’ukanere.

11. Nimakere ku 2 Timoteo 3:16, 17, icopo nwang’u lonyo mi tipo nenedi i Biblia?

¹¹ Saa m’ibesomo Biblia, icopo nwang’u lonyo mi tipo nenedi? Wakenen gin ma 2 Timoteo 3:16, 17 uwacu. (Som.) Ewacu kumae: “Lembagora ceke . . . konyne nuti” (1)  pi ponji, (2) pi juk, (3) pi twiny, man (4) pi ponjojo pi bedopwe. Icopo nwang’u bero ang’wen maeno i buku mi Biblia, kadok m’ibed isomo ngo wang’ ma pol de. Ng’ii i lembe m’ibesomo pi nineno nia ebeponji ku lembang’o iwi Yehova, iwi lembakeca pare, kunoke iwi cik pare mir ukungu. Nen juk m’ebemiyo iri. Kinde m’ibetimo lembuno, kiew ayi ma giragorane copo konyi ko nineno man nikoc ku paru kunoke pidoic ma reco, man ayi m’iromo gwoko ko bedoleng’ peri. Nen kite m’icopo tiyo ko ku giragorane pi nitwinyo, kunoke nitiro paru ma cuu ngo ma saa moko nyo inweng’iri ko i lembanyong’a. Bende, say ponji moko ci ma giragora eno ubemiyo iri kara paru peri uromb ku pa Yehova. Kan igwoko lembe ang’wen maeno i wii, e ibinwang’u lonyo mi tipo ma bikonyi ninwang’u bero lee i som peri mi Biblia.

WEK LEMBE M’IBESOMO UTWINYI

12. Pirang’o Yesu upenjo Jufarisayo nia “wusomo ngo?”

¹² Pi nituco wi pidoic ma rac ma Jufarisayo gibino ko iwi Lembagora, Yesu upenjo gin de kumae: “Wusomo ngo?” (Mat. 12:1-7)e Saa maeno Jufarisayo gibino loko nia julub pa Yesu gibeturo cik mi Sabatu. Pi nidwoko wang’ lembe migi, Yesu umiyo lapor ario mi Lembagora man edwogo iwi giragora pa Hoseya, pi ninyutho nia Jufarisayo ginyang’ ungo i thelembe mi cik mi Sabatu man nia nyutho kisa uvoyogi. Pirang’o somo Lembe pa Mungu utwinyo ngo dhanu maeno? Pilembe gibed gisome ku pidoic mi kuhaya man mi neno kosa mi jumange. Pidoicne ucerogi ninyang’ i thelembe mi gin ma gibesomo.​—Mat. 23:23; Yoh. 5:39, 40.

13. Wacikara nisomo Biblia ku pidoic ma kani man ke pirang’o?

¹³ Wec ma Yesu uyero ubeponjowa nia mito wabed ku pidoic ma cuu ka wabesomo Biblia. Tung’ ku Jufarisayo, wan mito wabed dhanu ma mol man ma weko Lembe pa Mungu uponje. Wacikara ‘niyiyo ku molcwiny lembe ma copo bodhowa.’ (Yak. 1:21) Tek watie dhanu ma mol, wabiweko Lembe pa Mungu ulok kothwa. Ka wakoc ku pidoic mi kuhaya man mi neno kosa mi jumange, ka dong’ ponji ma wabenwang’u iwi kisa, iwi ngisi man mer biloko kothwa.

14. Wacopo ng’eyo nenedi nia wabeweko Lembe pa Mungu utwinywa? (Nen bende cal.)

¹⁴ Ayi ma wabekwo ko ku jumange copo nyutho ka nyo wabeweko Lembe pa Mungu utwinywa kunoke ngo. Jufarisayo giweko ngo Lembe pa Mungu umul adundegi, uketho gibed ‘gipoko lembe iwi dhanu m’udubo ngo.’ (Mat. 12:7) Wan de ayi ma wabekwo ko ku jumange nyutho ka nyo wabeweko Lembe pa Mungu utwinywa kunoke ngo. Ku lapor, nyo watie ku ng’iyo mi weco iwi lembe ma beco ma waneno i bang’ jumange, kunoke nyo kosa migi re ma wok pio kud i dhogwa? Nyo watie dhanu ma timo kisa, kunoke nyo ma cayu jumange man ma bedo kud akece i iye? Dwokowang’ penji maeno copo nyutho ka nyo waweko gin ma wabesomo utwiny paru mwa, pidoic man timo mwa.​—1 Tim. 4:12, 15; Ebr. 4:12.

SOMO LEMBE PA MUNGU KETHO JUBEDO KUD ANYONG’A

15. Yesu uwinjere nenedi pi Lembagora ma leng’i?

¹⁵ Yesu ugam umaru Lembagora ma leng’ man jular juewo pi kite m’ebiwinjere ko pire i Zaburi 40:8 m’uwacu: “Anyong’a nega kum timo yeny m’iyenyo, E Munguna; eyo, cik peri ni yor i adundena.” Lembuno uketho ebedo kud anyong’a man emedere nitimo ni Yehova. Wan de wacopo nwang’u anyong’a man wamedara nitimo ni Mungu tek wabesomo Lembe pare man wakane i adundewa.​—Zab. 1:1-3.

16. Icopo nwang’u kony lee nenedi i kum somo Lembe pa Mungu? (Nen sanduku “Wec ma Yesu uyero copo konyi ninyang’ i gin m’ibesomo.”)

¹⁶ Nimakere ku wec pa Yesu man lapor pare, mito wamed bodho mwa mi somo Biblia. Wacopo medo bodho mwa mi nyang’ i Biblia nwang’u waberwo, wabesome ku dwal ma yoo, wabepenjara ku penji, man nwang’u wabekiewo lembe moko i adundo. Wacopo tiyo ku girasoma mwa m’ujengere iwi Biblia, pi nikonyowa wang’ii i lembe kinde ma wabesomo piny. Waromo tiyo ma ber ku Lembagora, kadok giragora ma wabed wasomo ngo wang’ ma pol de, pi nisayu lonyo mi tipo i iye. Bende, wacopo weko Lembe pa Mungu utwinywa tek watie ku pidoic ma cuu mi some. Ka wabemiyara nitimo lembe maeno, wabinwang’u kony lee i som mi Biblia man kindwa bibedo ceng’ini mandha ku Yehova.​—Zab. 119:17, 18; Yak. 4:8.