Kite m’icopo ng’iyo ko i cokiri peri ma nyen

Nicolas giku Céline gilund ginwang’iri ku peko m’ukoc. Saa ma Bethel mi France uorogi i cokiri ma nyen, giyiyo orne. Ento gikoro kumae: “Anyong’a ma wabino ko i acaki ugalu ngo pilembe ava jurimbwa ubino negowa lee. Nwang’u fodi wadoko ngo jurimo ma ceng’ini kud umego mi cokiri mwa ma nyen.”a Ka kumeno, dong’ icopo timo ang’o kara lembe uwoth iri miero kinde m’idok i cokiri ma nyen? Jumange ke gicopo timo ang’o pi nikonyo? Ibilund nwang’u mugisa ma kani i thenge mi tipo? Cokiri peri ma nyen ke binwang’u bero ma kani nikum mugisanegi?

CIK MIR UKUNGU ANG’WEN MA COPO KONYI NIVOYO PEKO MI WILO COKIRI

1. Jengiri iwi Yehova. (Zab. 37:5) Nyamego Kazumi mi ng’om mi Japan uweko cokiri m’etimo oro 20 i iye kinde ma juwilo kaka tic pa won ot pare. ‘Eweko yo pare nenedi i cing’ Yehova’? Eyero kumae: “Lworo ubino nega lee, awinjara nia atie kenda, man cwinya de ung’abere. Pieno ayabu adundena zoo ni Yehova man akoro ire kite m’abewinjara ko. Tek atimo kumeno ci emiyo ira tego m’atie ku yenyne.”

Icopo timo ang’o kara imediri nijengiri zoo iwi Yehova? Kara yen udongi, ebedo ku yeny mi pii man cam m’enwang’u i ng’om; yiyoyic mwa de kumeno: ebedo ku yeny mi pii man cam pi nidongo. Nicolas ma wadaru weco pire unwang’u tego m’ukonye nijengere lee nisagu iwi Yehova kinde m’enyamu i lembe iwi lapor p’Abraham, pa Yesu man pa Paulo, ma ceke gimiyiri lee pi nitimo yeny pa Mungu. Woro program ma cuu mi ponji peri ma segi mi Biblia bikonyi ninyego ku peko moko ci m’ibinweng’iri ko i kwo peri. Ebiketho ibinwang’u bende giramiya mi tipo m’icopo poko kud umego ku nyimego mange mi cokiri peri ma nyen.

2. Kud ipor cokiri peri ma nyen ku ma con. (Ekl. 7:10) Ugam ukwayu umego Jules ung’ii kud alokaloka ma lee mi suru kinde m’eweko ng’om mi Bénin pi nidok i États-Unis. Ekoro kumae: “Udok ubed ve ubemito akor kpawa mi kwo para ceke ni ng’atu moko ci m’arombo ko.” Calu ma lembe maeno ugam ukoc ku kite m’elar eng’iyo ko, ecaku koyere cen kud umego mi cokiri. Ento i ng’ey m’etuc ning’eyo umego ku nyimego cuu, ewilo nen pare. Emedo kumae: “Abeparu nia dhanu ceke m’iwi ng’om utie rom. Utie kende kende nia lembe re ma gitimo i ayi m’ukoc. Lembe ma pire tek utie niyiyo jumange i kite ma gitie ko.” Pieno, kud ipor cokiri peri ma nyen ku ma con. Nyamego moko ma jayab yo ma nyinge Anne-Lise de ucwaku paru maeno. Eyero kumae: “Adok ungo i kabedo ma nyen pi ninwang’u piny m’aweko i ng’eya; adok pi ninwang’u piny ma nyen.”

Judong cokiri bende gicikiri ngo niporo cokiri migi ma nyen ku ma con. Utie ngo nia ka jubetimo lembe moko i ayi m’ukoc ci, nwang’u jubetime rac. Etie lembe mi rieko nilar ng’eyo lembe mi kabedo ma in’i iye kawoni i wang’ nimiyo paru peri. (Ekl. 3:1, 7b) Etie ber magwei ninyutho lapor ma ber kakare nidiyo dhanu mange mi cokiri ku paru peri.—2 Kor. 1:24.

3. Miyiri zoo i tic mi cokiri peri ma nyen. (Filip. 1:27) Andha wilo kabedo kwayu saa man kero ma lee. Ento pire tie tek nicidho i coko i Ot Ker ka copere, ke ndhu ndhu niai m’itundo. Kan umego mi cokiri peri ma nyen gineni ngo zoo de kunoke gineni wang’ acel acel, gicopo konyi nenedi? Lucinda m’uwilo kabedo udok i adhura moko ma dit mir Afrique du Sud ku jumanyir pare ario ubepoy i kum lembe ma e: “Jurimba giwacu ira nia ukwayu amiyara zoo i timo lembe ma ketho ang’iyo ku cokiri para ma nyen, nia abed arwey karacelo ku jumange man abed acul wang’ penji i coko. Wanyutho bende ni umego nia jucopo timo coko mi tic mi lembanyong’a i ot mwa.”

‘Ninyego karacelo’ kud umego ku nyimego i tic mi cokiri peri ma nyen bikonyi niteng’o yiyoyic peri man mi jumange. Judong cokiri pa nyamego Anne-Lise ma wadaru weco pire, gikwaye nia eii nirweyo lembanyong’a ku ng’atuman mi cokiri. Adwogine ubino ang’o? Eyero kumae: “I ng’ey nindo ma nok kende ci anyang’ nia eno ubino yore ma ber magwei mi ng’iyo kud umego.” Bende, kan icuku wodhiri pi tic mi weyo man mi gwoko Ot Ker ubed ma leng’, eno nyutho nia ibeneno cokiri ma nyenne ni cokiri peri. Tek ibemiyiri zoo i tic mi cokiri peri ma nyen, e umego ku nyimego gibing’iyo kudi pio pio man ibigalu ngo niwinjiri nia in’i kind juruot pewu.

4. Say jurimo ma nyen. (2 Kor. 6:11-13) Nidieng’ ku jumange utie yore ma ber m’uloyo zoo mi nwang’u jurimo. Pieno bed ikoy saa lee i wang’ coko man i ng’eye, pi niweco ku jumange man ning’eyogi cuu. Tim kero imak nying’gi. Kan ibed ipoy i kum nying’ jumange man ibed iweco i bang’gi ku yaw yaw man yot yot, m’umbe jiji ibitelogi i beng’i, e eno biketho wubidoko jurimo ma beco.

Kakare niparu nia umego ku nyimego peri ma nyen gibifoyo kudi ngo, keth ging’eyi cuu. Pieno icopo timo tap calu Lucinda. Ekoro kumae: “Kawoni watie ku jurimo ma ceng’ini mandha pilembe wamaku yub mi lwong’ogi i bang’wa.”

“WUJOLURU I KINDWU”

Jumoko lworo pikere lee i igi ka gimondo i Ot Ker ma dhanu m’i iye zoo utie nyen igi. Dong’ icopo timo ang’o pi nidwoko lembe yot ni dhanu m’utundo ma nyen? Jakwenda Paulo ukwayuwa kumae: “Wujoluru i kindwu tap calu ma Kristu de ujolowu.” (Rum. 15:7) Calu Kristu, judong cokiri gicopo ketho ju ma nyen giwinjiri nia gitie ajola. (Nen sanduku ma thiwiye tie, “Gin ma ketho lembe bedo miero ni ju m’uwilo cokiri.”) Ento dhanu ceke mi cokiri gicopo ketho ju m’utundo ma nyen giwinjiri ma ber, eno ke kadok awiya.

Nijolo jumange thelembene tie nilwong’ogi i pacu mwa man bende nimiyo igi kony ma gitie ku yenyne. Ku lapor, nyamego moko umiyo saa pare pi ninyutho gund adhura ceke ni nyamego moko m’utundo ma nyen i adhura migi man ekoro ire kite ma jumaku ko transpor. Lembuno uwang’u i nyamego m’utundo ma nyenne lee dit man ukonye ning’iyo ma ber.

WILO COKIRI MIYO KAKA MI DONGO I THENGE MI TIPO

Kinde ma bonyo ubeteng’ini, eroc wang’ dupa i wang’ ma vombe udok tek m’ecopo tuk ko. Kumeno bende, kinde m’idok i cokiri ma nyen, bikwayu ikab lworo ku lewic ceke ma romo ceri nimediri ku tic pa Yehova. Nicolas giku Céline giyero kumae: “Wilo kabedo ponjojo ku lembe dupa ma beco. Ning’iyo ku kit dhanu ma nyen man ku kabedo ma nyen banju nia iceg kurayung de ma nyen.” Jean-Charles ma juweco pire i acaki unyutho bero ma juruot pare unwang’u, eyero kumae: “Alokaloka uketho awiya mwa gituc nitimo mediri ma ber. I ng’ey dwi ma nok kende ci nyathin mwa ma nyaku uyiyo nicaku timo theng coko m’i kind yenga man wodwa udoko jarwey ma fodi ulimo ngo.”

Dong’ kan ecopere ngo iri niwilo cokiri calu ve pi nidok kaka ma yeny utie lee i iye ke? Ineno nenedi kan icaku lembe zoo ma nyen i cokiri peri man itemo nitiyo ku paru ma tung’ tung’ ma waweco pigi i thiwiwec maeni? Jengiri iwi Yehova man miyiri zoo i tic mi cokiri peri. Pieno, yik i program peri kara ibed irwey lee ku jumange man inwang’ jurimo ma nyen kunoke wudok jurimo ma beco ku ju ma dong’ ing’iyo kugi. Ineno nenedi kan ibed iwodhiri pi nikonyo ju m’utundo ma nyen kunoke ju ma gitie i yeny, ku piny ma gitie ku yenyne? Calu ma mer utie kite ma nyutho nia wa Jukristu mandha, timo lembe maeno ceke biketho ibitimo mediri i thenge mi tipo. (Yoh. 13:35) Bed kud andha nia “lam ma kumeno nyayu anyong’a lee i Mungu.”—Ebr. 13:16.

Lembe udaru wotho miero ni Jukristu dupa ma gidok i cokiri mange; in de lembe copo wotho iri miero! Anne-Lise uyero kumae: “Wilo cokiri ukonya nibedo ku jurimo dupa.” Kawoni Kazumi uyiyo ku cwinye zoo nia kan idok kaka mange, “ineno cing’ Yehova i kwo peri nisagu m’i wang’e.” Ka Jules ke? Eyero kumae: “Jurimo m’anwang’u ukonya niwinjara nia kakara nuti. Kawoni dong’ anwang’ara nia atie acel m’i kind umego ku nyimego mi cokiri para ma nyen, ma dong’ edoko ira tek niai ku keni.”