Bero mi kweriri gijo

KWERIRI GIJO UTIE ANG’O?

Kweriri gijo uketh’i iye copo mi

• yiyo nikekuro i wang’ ninwang’u giramiya

• ceriri i kum timo lembe vur vur

• daru tic ma jubetimo kadok tije ubenyang’ujo ngo de

• ketho yeny mi jumange utel yo

PIRANG’O PIRE TIE TEK NIBEDO KU KWERIRI GIJO?

Awiya ma kweriri gigi andhandha copo cungo ma tek i wang’ amulaic, kadok nwang’u ubenen ve nia lembe ma jubekwayu gitimne copo nyang’ugi de. Ento, awiya ma kweriri gigi ngo i andha gicopo

• bedo weg ali

• nwang’u turcwiny

• madhu taba kunoke kong’o kunoke drog

• foyo nicamu piny ceke swa

Sayusac moko ma jutimo uwodho nia awiya ma kweriri gigi andhandha nwang’iri ngo swa swa ku remo, ang’abacwiny ma sente nyayu man lembe mi turo cik kinde ma gidongo. Angela Duckworth ma tie Profeser i iniversite mi Pennsylvania re m’utimo sayusac maeno. Edolo dhu lembene kumae: “Ve nia piny m’uloyo kweriri gijo ‘i andhandha’ ci copo bedo mbe.”

ICOPO PONJO NYATHIN PERI KU KWERIRI GIJO NENEDI?

Ponj niyero ungo man inyuthe i timo.

CIK MIR UKUNGU MI BIBLIA: “Wuwek wec mwu ma nia ‘eyo’ ubed eyo, ‘ungo’ mwu ke ubed ungo.”​—Matayo 5:37.

Pi nipimo ka nyo andha jarunyodo pare kwero lembe moko, nyathin copo maku wiye, saa moko nyo i kind dhanu. Tek jaranyodo utimo yeny pa nyathinne tap ci, ebinwang’u nia karaman kan emaku wiye ci ecopo loko paru pare yot yot.

Ka jurunyodo giyero ungo man gimiyo de ngo piny ma nyathin ubemitone, nyathin binwang’u ponji ma bikonye i kwo pare zoo​—niwacu wacopo ngo ninwang’u piny ma watie ku yenyne saa ceke. Dr. David Walsh ukiewo kumae: “I andha, ndhu dhanu ma ponjo nikweriri gigi re ma copo bedo ju mutoro m’usagu zoo.” Emedo nia: “Ka wabenyutho ni awiya mwa nia gicopo nwang’u piny ceke ma gimito se, eno nwang’u wamarugi ngo nyanok de.”a

Tek kawoni iketho nia nyathin peri kud unwang’ piny ceke m’ebemito, ng’ei nia eno bikonye nibekwerere gire i kwo pare​—ku lapor, i saa ma jubebidhe nia etii ku yath ma merojo, etim ribiri i wang’ gamiri kunoke ecak timo moko ma kelo peko i kumjo.

Kony nyathin peri unyang’ i kum adwogi ma timo ma ber kadi ma rac copo kelo.

CIK MIR UKUNGU MI BIBLIA: “Gin ma tek ng’atu moko ubecoyo, gica re m’ebikayu bende.”​—Jugalatia 6:7.

Nyathin peri utie ku yeny mi ng’eyo nia timoman utie kud adwogi pare man nia koso kweriri gijo kelo peko ma larere ngo. Ku lapor, tekene ng’eicwiny bemaku wodi yot yot kinde ma lembe moko uton i iye, juwagi copo caku ure. Tekene eponjo nikwerere gire kinde ma lembe moko uton i iye​—kunoke nibemwonyo lembe hai kakare nibekethere—​jubimaru nibedo i ng’ete. Dong’ ikony nyathin peri unyany nia tek eii nibecerere i kum lembe ma copo wok i kwo pare ci lembe bibedo ire miero.

Ponj nyathin peri ung’ei gin ma pigi tek.

CIK MIR UKUNGU MI BIBLIA: “Wung’ii gin ma pigi tek nisagu.”​—Jufilipi 1:10.

Kweriri gijo tie ngo kende kende niceriri i kum timo lembe ma rac; ento eketh’i iye bende nitimo lembe m’ukwayere, kadok nwang’u lembene ubenyang’ujo ngo de. Pire tie tek nia nyathin peri uponj ning’iyo gin ma pigi tek man ebed elar etimgi. Ku lapor, ecopo lar timo devwar pare kan ecidh etuko.

Bed ni lapor ma ber.

CIK MIR UKUNGU MI BIBLIA: “Aweko iwu lapor, kara tap calu m’atimo iwu wun de wutim kumeno.”​—Yohana 13:15.

Nyathin peri bineno kite ma in de ibed itimiri ko kinde ma lembe uton i ii. Nikadhu kud i lapor peri, nyuth nia kweriri gijo kelo adwogi ma ber. Ku lapor, ka nyathin peri utimo lembe moko m’uton i ii, nyo ibed imaku ng’eicwiny kunoke nyo ibed ikwiyo kumi?