Kite mi doko ng’atu ma jwigere

JWIGIRI TIE ANG’O?

Dhanu ma gijwigiri gitie dhanu ma ginyutho woro. Gimbe ku kura mi ting’iri man gikuro ngo nia jumange utim igi lem moko ma ketho junen ko gi nia pigi tek lee dit nisagu. M’uweko meno, ng’atu ma jwigere lundo, edeing’ lee ku dhanu mange man ebedo ayika niponjo lembe i bang’ jumange.

Dhanu moko beparu rac nia won jwigiri tie ng’atu ma jujobo wiye ajoba ento re, eno tie ndra. I andha, etie tego ma konyo ng’atini niyiyo kosa pare man ning’eyo gin ma embe ku copo mi timo.

PIRANG’O JWIGIRI PIRE TIE TEKI?

• Bedo ku jwigiri ketho kindjo bedo ma ber. Buku moko ma julwong’o The Narcissim Epidemic uyero kumae : “I zoo, ni dhanu ma gijwigiri, nitheyo mer tie yot dit akeca.” Emedo bende nia, ni dhanu ma kumeno, niwinjiri man nidikiri ku jumange tie yot lee mandha.

• Jwigiri bikonyo nyathin peri i anyim pare. Niai kawoni man ing’eye de, niponjo nibedo mol bikonyo awiya peri ceke i kwo migi. Ku lapor, ebibedo yot ni awiya peri ninwang’u tic i saa ma gibin gidongo ka tekene giponjo nibedo ku jwigiri man mol. Dokter moko mi thieth mi maparu man leng’kum ma nyinge tie Leonard Sax ukiewo kumae: “Ka tekene aradu moko bedieng’ pire gire akeca man kieu pare de eworo ngo, kit kura meno copo ketho junene rac kan ebesayu tic. “Buku moko ma julwong’o the Colapse of parenting ulund uyero nia: “Re, aradu ma bedieng’ ning’eyo nia girang’o ma pire tek i ng’atu m’ubemito roye i tic lundo, saa moko ecopo nwang’u ticne.”

ICOPO PONJO JWIGIRI NI AWIYA PERI NENEDI?

Kony nyathin peri kud ebed epar pire gire nisagu.

CIK MIR UKUNGU MI BIBLIA: “Kum tek ng’atu moko paru nia e gin moko ma ke e gin moko ngo, nwang’u ewondere gire.​—Jugalatia 6:3

• Wek nibeweco ngilingili iwi lembe ma timere ngo ni nyathin peri. Calu ve nibeyero kumae: “Gin kpo m’ibed iparu no, nindo acel ebirombo iri” kunoke “I ng’om ma tin, icopo doko peri kit ng’atu moko ci m’imaru. Wec nino gicopo nen ve gimiyo amora i kum ng’atini ma ke, i andha lundo, wang’ ma pol kwo tie kumeno ngo. Ka tekene awiya peri gitie ku lembakeca ma cuu man ka gibetimo ma tek pi nituc i igi, saa moko gibinwang’u adwogi ma ber akeca.

• Dwok foyofoc pi lembe ma nyathin utimo. Ukwayu jurunyodo gifoy awiya migi i lembe moko m’akoya ento nibeyero kende kende nia pigi tek uromo ngo. Jondo lembe bed umbe.

• Keth mupaka mi tiyo ku telefon ni nyathin peri. Wang’ mapol i kusika mi yamu, dhanu gibed gimaru niweco iwi thenge migi ma beco kwa man iwi lembe ceke ma dongo ma gidaru timo. Eno ukoc bor ku molo man jwigiri.

• Tiel cwiny nyathin peri ubed ukway kisa mor mor. Ka tekene nyathin peri utimo lembe moko ma cuu ngo, konye enyang’ man eyii lembene.

Kony nyathin peri ubed jadwok foyofoc.

CIK MIR UKUNGU MI BIBLIA: “Wubed dhanu ma dwoko foyofoc.”​—Jukolosai 3:15.

• Ebed ku foyofoc pi giracwiya. Awiya gicopo niponjo nidoko weg foyofoc pi gin moko ci m’i giracwiya man ninyang’ nia watie ku yenyne pi kwo mwa. Watie ku yeny mi yamu pi niyuyo, pii pir amadha man giracama. Pieno, tii ku lapor mi piny maenogi pi niketho awiya peri gibed ku foyofoc man ava ma lee pi Jacwic.

• Ebed jafoy jumange. Kakare m’ebed ku nyeko i kum jumange pilembe ndhu nia gitie ku copo mi timo lembe ma en embe ko, kony nyathin peri m’inyuth ko ire kite m’ecopo niponjo ko lembe dupa i bang’ juca.

• Foy jumange. Tend nyathin peri ubed jafoy jumange i andhandha ento ungo nia ebed eyer kende kende afoyo ndhu ku dhoge kumeni. Nibedwoko foyofoc konyojo nibedo ng’atu mol.

Ponj awiya peri ginyang’ nia konyo jumange tie ber.

CIK MIR UKUNGU MI BIBLIA: “Ku jwigiri wunen nia jumange gi dit ma sagu wun, man kud wuyeny bero mwu kende, ento wuyeny bero mi jumange bende.”​—Jufilipi 2:3, 4.

• Gen nia nyathin peri bibedo jatim tic. Ka tekene ibed iyero ni nyathin peri nia embe ku yeny mi timo tic yo pagi, eno biketho ebinwang’u nia gin m’ebemito nitimo re ma pigi tie tek lee nisagu. Gin m’ukwayu ubed ma kwong’a tie tic ma yo pagi, tuko ke, i ng’eye. Nyuth ire her her kite ma tic miyo ko bero ni jumange man ayi ma jumange gibifoyo man gibiwore ko kum e jatim tic.

• Nitimo piny moko pi jumange tie ber. Awiya peri biteng’ini tekene gitimo lembe moko pi nikonyo jumange. Kadok kumeno, kara nyathin peri unwang’ dhanu ma gitie ku yeny mi kony, lund ikonye. Wuwec kude iwi gin m’ecopo timo pi nikonyogi. Ka nyathin peri ubekonyo jumange, foye man dik cingi kude.