Kite mi doko jacirlembe

CIROLEMBE UTIE ANG’O?

Jacirlembe utie ng’atu ma dok ungo yot yot i karamb kwo pare m’i wang’e i ng’ei ma lembe moko ma rac utimere. Lembe ma jubed jukadhu kud i iye i kwo re ma ketho junwang’u copo maeno. Ndhu tap calu ma kite ma nyathin ma nyanok m’ubeponjo niwotho bepodho i saa moko, ecopere ngo bende ninwang’u matoke maber i kwo pare m’umbe anyobanyoba dupa i kind saa moko.

PIRANG’O CIROLEMBE PIRE TIE TEKI?

Awiya moko cwinygi betur kinde ma gitimo gin moko cuu ngo, gibenyego ku peko ma tung’ tung’ kunoke saa ma jumange ubenwang’u nia gibetimo gin moko rac. Jumange lundo giweko lembene ma kpo. Kadok kumeno de, ukwayu ging’ey nia:

• Kud wagen nia lembe ceke ma wabetimo ci bibewok pare ma ber kwa saa zoo.​—Yakobo 3:2.

• Ng’atu moko ci i kwo pare bimulere ku lembe buu.​—Eklizia 9:11.

• Wacopo doko dhanu ma cuu ndhu kende kende tek ng’ati moko ubepoyo wiwa i kum gin ma rac ma watie katimo.​—Lembrieko 9:9.

Nyathin peri binyego ku peko mi kwo ku tegocwinye n kum cirocir.

ICOPO PONJO NYATHIN PERI NENEDI KARA EDOK JACIRLEMBE?

Ka nyathin peri utimo lembe moko ma vi.

CIK MIR UKUNGU MI BIBLIA: “Kum ng’atu ma pwe podho wang’ abiro man eai kendo.”​—Lembrieko 24:16.

Kony nyathin peri ung’ey kite mi luro lembe ma pire tek kunoke ngo. Ku lapor, ecopo timo ang’o ka nang’ ebin eyongo i kalasi? Nyo ebiwenjere magwei man nibeparu yor iye nia, “Dong’ gin m’acopo timo nya thuthuthu de mbe?”

Kony nyathin peri upar kite m’eromo timo ko ma ber m’uloyo pi macen. Ebitegere nidaru lembe m’uriwere i wang’e man i yore ma kumeno, cwinye bitur ungo.

I saa ma rom eno, lem pa nyathin peri, kud idar in giri. Re lundo, konye enwang’ en gire yore m’edar ko lembene. Icopo bepenje kumae: “Iwi lembe m’ubewecere e, in icopo timo ang’o pi ninyutho nia inyang’ pire?

Ka lembe moko ma reco uwok.

CIK MIR UKUNGU MI BIBLIA: “Wung’eyo ngo nia kwo mwu bibedo nenedi urwo.”​—Yakobo 4:14.

Urwo ng’a ng’eyo! Ng’ati copo bedo bos tin, re urwo, ecopo doko jacan ma hoi; tin, ng’atu moko copo bedo ku leng’kum ma ber, re urwo lundo, remo copo rido dhoge. Eno uketho Biblia uyero kumae: “Jung’wec sagu gin ungo i kwaya, kadi i lwiny jutego sagu gin ungo”; “ku ba dhanu ceke ng’atuman bedo ku nindo pare man gagi ma podho ire.”​—Eklizia 9:11.

Calu m’itie jaranyodo, ibed itimo gin moko ci pi nigwoko nyathin peri kara kud enwang’ere i peko. Kadok kumeno de, ng’ey nia icopo ngo nicero lembe ma reco kpo i kum nyathin peri.

Eyo, utie ngo nia nyathin peri ukeudongi kpo kan ecak bebithini ku lem koso tic kunoke can sende. Niai kawoni, icopo bekonye ninyego ku peko ma tung’ tung’, calu ve, mer ma lal i kindjo kunoke tho pa ng’atu moko ma pire tek.a

Ka jukwayu nyathin peri ukeutim alokaloka moko.

CIK MIR UKUNGU MI BIBLIA: “Winj lembapora . . . kara ibed riek i kajik peri.”​—Lembrieko 19:20.

Ka tekene ng’atu moko uyero ni nyathin peri lembe moko m’ukwayu etim mediri i iye, utie ngo pilembe ebemito nyayu mwomo i iye kunoke nitimo nyathin ne rac, ento m’uweko meno, ebemito nikonye kara etim alokaloka m’ubekwayere pi twiny.

Kinde m’ibeponjo nyathin peri nijolo twiny, wun kpo wubinwang’u faida ne. Wego moko ma nyinge John uwacu kumae: “Ka tekene jubecuku miyo ngo twiny kadok nyanok de ni awiya pi kosa migi, gibing’eyo ngo nyakudukudu de pi kosa migi nica. E gibilund bedo migi i kum nyotho lembe i kwo wi wagi wi wagi cil ma, calu m’itie jaranyodo migi, ibibebedo peri kwa niyiko lembe ma tung’ tung’ ma ginyotho. Lembuno ketho kwo pa jurunyodo ku pa nyathin ne de kpo bedo ku can.

Icopo konyo nyathin peri nenedi kara enwang’ kony i kum lembe moko m’ukwayu etim mediri i iye? Ka tekene junyutho ni nyathin peri pi gin moko m’ukwayu etim alokaloka i iye, nyo i kalasi kunoke ku kaka moko mange, kud icak niyero nia eca tie lem m’uromo ku twiny ungo. Timba penje kumae:

• Ang’o m’uketho jumiyo iri matira?

• Dong’ icopo timo ma ber nisagu ke nenedi?

• Kan ibinweng’iri ku lembe ma kumeni ma cen, ibitimo ang’o?

Poy nia timo alokaloka bikonyo nyathin peri kawoni kende kende ngo, ento bende kadok ebin edongo.