Kite mi bedo ng’atu ma jucopo geno

NG’ATU MA JUCOPO GENO TIE NG’ATU MA NENEDI?

Cwinyjo copo bedo tek i kum ju ma jucopo geno. Tek jukwayu nia gitim tic moko, jung’eyo nia gibidare i saa m’ukwayere.

Nyathin copo ponjo nidoko ng’atu ma jucopo geno niai ma fodi oro pare nyanok. Buku moko ma nyinge Parenting Without Borders ukoro kumae: “Awiya caku bedo ku copo mi konyo dhanu niai ma gitie ku dwi apar abic, man kinde ma gidoko ku dwi apar abora ke, gimito gitim gin moko ci ma jurunyodo migi ubekwayu i bang’gi”. Bukune medo nia “i suru ma pol ke jurunyodo gikuro nia awiya migi gikegidoki ku oro abic kunoke abusiel ka gicak nitimo tic mi pacu, ma ke lundo i andha, awiya gitie ku copo mi timo tic dupa mi pacu kadok ma nwang’u fodi oro migi nyanok magwei de.”

PIRANG’O PIRE TIE TEK NIBEDO NG’ATU MA JUCOPO GENO?

Jucopo tiyo ku wec ma nia “gin ma wotho rr dwogo se” pi niweco pir aradu ma weko yo pagi pi nicicaku nikwo i wigi gigi, ento lembe yovoyogi, ci gidok ve i bang’ jurunyodo migi. Saa mange lembe ma kumeno timere pilembe nwang’u juponjo ngo nyathin ne ku kite mi tiyo ma ber ku sente, mi telo wi ot kunoke mi bedo ni ng’atu ma jucopo geno.

Pieno, e ber ma gwei nia iponj nyathin peri ubed ni ng’atu ma jucopo geno niai kawoni kara ebin edongi ni ng’atu m’atira. Buku How to Raise an Adult ukoro nia “ukwayu ngo iketh gijengiri zoo i wii nitundo ma gikadh ko oro apar abora cil ma gicak nikwo i wigi gigi”.

ICOPO PONJOGI NENEDI KARA GIDOKI NI DHANU MA JUCOPO GENO?

Bed imii igi tic mi pacu wang’ ma pol.

CIK MIR UKUNGU MI BIBLIA: “Kuloka tie i tic mi muli ma tek.”​—Lembrieko 14:23.

Awiya ma thindho gibedo lee dit kud ava mi timo tic i ng’et jurunyodo migi. Icopo miyo tic mi pacu ni awiya peri kara inwang’ bero i kum pidoic maeno ma ginyoliri ko anyola.

Jurunyodo moko gimito ngo gitim lembe maeno. Ju moko yero nia gibed gimito ngo gimii tic ni awiya migi pilembe i somo de nwang’u jumiyo igi devwar m’udodere ve got.

Ento, awiya ma betimo tic mi pacu gibed giyenyo kadhu ma ber i somo pilembe tic ma gitimone ponjogi niyiyo man nidaru tic ma jumiyo igi. M’umedo maeno, buku Parenting Without Borders uyero nia “tek wacayu ava mi timo tic ma bebedo i i awiya niai ma githindho, nwang’u wabepiko i igi pidoic ma nia tije mbe nikonyo dhanu mange . . . Bende, gicaku kuro nia jutim igi lembe ceke mi se.”

Calu ma wec maeno unyutho, tic mi pacu ma awiya timo ponjogi ku nidiko cinggi ku ju mange kakare nibecamu acama kende man nimiyo ni jumange kakare nibegamu agama kende. Tic mi pacu ketho awiya ginwang’u nia gin de tijgi tie i kind juruot mange man nia ukwayu gin re ma gitim tije.

Ponj awiya peri gibed giyii kosa migi.

CIK MIR UKUNGU MI BIBLIA: “Winj juk man ijol twiny, kara ibed riek i anyim peri.”​—Lembrieko 19:20, NWT.

Ka nyathin peri utimo kosa moko, ku lapor, tek wodi kunoke nyathin peri ma nyaku unyotho piny pa ng’atu moko mange, kud icer bang’e. Ecopere nia awiya giyii kosa ma gitimo, mans saa maeno, gicopo kwayu kisa kunoke gicopo yiko piny m’unyotherene.

Yiyo kosa bikonyo awiya peri

• nibeyero lemandha man nibeyiyo racu ma gitimo

• nibeloko ngo lembe iwi jumange

• nibecero ngo bang’gi gigi pi kosa ma gitimo

• nibekwayu kisa kan ukwayere