Kite m’icopo ponjo ko nyathin peri

Kinde ma Yehova caku the kwo mi juruot, eketho awiya i the loc mi junyodo. (Jukolosai 3:20) Etie tic peri in i janyodo niponjo nyathin peri nimaru Yehova man nidoko ni ng’atu m’uteng’ni ma jucopo geno. (2 Timoteo 1:5; 3:15) Icikiri bende niponjo ning’eyo lembe ma nwang’ere i adunde nyathin peri ma co kunoke ma nyaku. Ng’ei nia lapor peri pire tie tek lee. Icopo niponjo maleng’ mandha Lembe pa Yehova i adunde nyathin peri ka in de iketho lembene i adundeni.​—Zaburi 40:8.

1 KETH AWIYA PERI BED AGONYA NIWECO I BENG’I

LEMBE MA BIBLIA YERO: ‘Bed m’iwinj pio, bed yoo kum wec.’ (Yakobo 1:19) Ukwayu awiya peri unwang’ nia gitie agonya niweco i beng’i. Umaku ging’ei nia itie ayika niwinjogi kinde ma gibemito niweco i beng’i. Keth kakare ma wuni iie ubed kakare mi mutoro, kara ginwang’ nia gitie agonya nikoro lembe m’uloth i igi. (Yakobo 3:18) Tek ginwang’u nia itie kwiny kunoke ibed imio m’atira pio pio, gicopo ngo niweco i beng’i thwolo thwolo. Bed kud awiya peri ku cirolembe, man bed inyuth igi cu nia imarugi.​—Matayo 3:17; 1 Jukorinto 8:1.

LEMBE M’ICOPO TIMO:

• Nweng’iri kinde ma awiya peri ubemito niweco i beng’i

• Bed iwec kud awiya peri nja, kud iwec kugi kende kende kinde ma lembe moko tie

2 TIM KERO NINYANG’ CU I KUM LEMBE M’AWIYA MITO YERO

LEMBE MA BIBLIA YERO: “Ng’atu ma ng’io i lembe binwang’u gin ma ber.” (Lembrieko 16:20) Saa mange, bikwayu ibed ilur cu i wec mir awiya peri pi ninyang’ i pidoic migi mandha. Wang’ mapol awiya ma thindho gibed gimedo kor lembe kunoke giyero ngo lembe i kite ma gibeparu i andha. “Ng’atu ma loko lembe ma fok’ewinjo ngo, en e lem ma kite mbe [ming’o].” (Lembrieko 18:13) Ng’ecwiny kud umeki pio pio.​—Lembrieko 19:11.

LEMBE M’ICOPO TIMO:

• Kud ibed ing’ol dhog’gi kunoke niweco kugi ku kwinyo, kadok gibeyero lembang’o de

• Kepar kite m’ibed iwinjiri ko kinde ma ibino ku oro migi man lembe ma pire bedo tek iri

3 WUDIKURU ADIKA

LEMBE MA BIBLIA YERO: “Woda, winj ponji pa wuru, man kud iwek ponji pa meru.” (Lembrieko 1:8) Yehova mio tic mi telo wi awiya ni wego ku mego gin ario zoo. Wucikuru niponjo awiya mwu niworowu. (Juefeso 6:1-3) Awiya gicopo ninyang’ ka junyodo migi gitie ngo ku ‘ribri ma karacelo i pidoic ma calacel.’ (1 Jukorinto 1:10) Kadok iyiyo ngo paru pa jadhogi mi gamiri de, tim kisa, kud inyuth lembene i wang’ awiya, kum timo kumeno copo nijwigo woro migi i beng’wu.

LEMBE M’ICOPO TIMO:

• Wuweci man wuwinjuru iwi kite ma wubitwinyo ko awiya mwu

• Ka in ku jadhogi mi gamiri wutie ku paru ma tung’ tung’ iwi kite mi ponjo awiya, kepim niwinjo bende paru pa jadhogi

4 PANG LEMBE

LEMBE MA BIBLIA YERO: “Ponj nyathin uwoth i yo m’umaku piny.” (Lembrieko 22:6) Awiya peri binwang’u ngo ponji m’ulil mbwang’ kumeni. Ukwayu ibed ku program mi ponji, m’uketho iie nitwinyo nyathin peri. (Zaburi 127:4; Lembrieko 29:17) Twinyo awiya utie ngo kende kende nimio igi m’atira, ento twiny uketho iie bende nikonyo awiya peri ginyang’ i thelembe m’uketho ibemio igi cik. (Lembrieko 28:7) Bende, ponjgi gimar Lembe pa Yehova man ginyang’ i kum cik pare mir ukungu. (Zaburi 1:2) Eno bikonyogi gituc nibedo ku pidoic ma cu.​—Juebrania 5:14.

LEMBE M’ICOPO TIMO:

• Kony awiya peri ginen Mungu ni Ng’atu m’unuti andha man ma gicopo nigeno

• Konygi giponj ning’io man niuro lemb sasa, calu ve ma nwang’ere i Internet ku kusika mi weco ku jurimo nikadhu kud i Internet. Ponjgi kite ma giromo nigwokiri ko i kum jugero mi tarwang’